如果有屋企係支持, 有老公係身邊咁會好好多.
身邊都有成功例子, 一開始生活好差, 要屋企人接濟. 後來老公工作越來越好. 而+個仔大左, 個媽媽重好後生, 重可以同老公周圍去玩
一般人睇後生媽媽或者後生媽媽擔心人點睇都不外乎以下原因︰
1, 咁後生一定係讀唔成書學壞左啦
2, 咁後生一定係比人搞大左肚啦
3, 咁後生一定湊唔掂個細路啦
4, 咁後生一定自己都未識諗啦點教仔
唔岩聽，但無可否認以上真係大多數人睇法，但唔代表係事實。但樓主你問得呢個問題，應該都係心裡面有條刺，擔心人點睇。
你首先要糾正左自己諗法。讀得大學都成年人，唔理識唔識諗都要為自己行為負責。無論之前係因為乜原因、未深思熟慮、未準備好，都放埋一邊先。仔已生已成定局，依家諗點響現有資源下湊好個仔就得。第一第二點人地要點諗都冇辦法，但最起碼你唔好比人睇死第三第四點。
其實早唔早生唔係問題，係你有幾識諗。如果你都覺得「咁早生不知所謂」、「自己受咪算何苦連累下一代」…咁你咪諗方法令人跌眼鏡囉！你係大學生黎，學術上可以幫個仔，理論上明是非可以教到小朋友好多人生道理。將個小朋友湊得好，你對自己、老公同個仔已有交待。我相信到時你根本唔會在意人地講乜。
嗱，但係又要回歸現實問題喎。你同老公依家冇經濟獨立到，仲係要屋企幫，你真係要生生性性為屋企出十二分努力，要幫手做家務，孝順下奶奶做個好新抱，仲要對你父母好呀，因為我相信你父母對你入大學好大期望，對你將來成就都好有期望。唔係話要為父母期望而做野比家用，而係佢地養到你咁大，而你未貢獻社會就突然生左個仔，響香港價值觀下，連樓都未有喎…佢地可能都擔心你委屈。記得多D關心父母，唔好要佢地擔心。
到BB大個D，你可以再睇下屋企經濟環境係咪要出黎幫手，但冇社會經驗預左第一份工未必咁如意，咁咪由低D職位開始囉。你用左兩年時間湊仔，知唔知道係幾多在職媽咪既夢想，冇得想又可以用兩年時間陪小朋友，出返黎又可以即刻搵到份高薪筍工既，係唔係？Everything got a price!
最後，其實日本好多女仔大學畢業之後都係做全職媽媽，因為佢地覺得一個大學生可以教育一個出色既孩子，對社會質素會好有貢獻。你都要抱持同樣信念，加油！
7個讚
根本同年齡無關吧，見過唔少「合適」年紀+有經濟能力先生既父母，咪又係唔識湊唔識教？唯一比人強就係識比錢囉
教養兒女講心最重要，唔識就去學，冇人一生出黎就識湊小朋友的。
每個人經歷不一, 珍惜上天給你的安排!
無論係咩年紀既媽媽, 緊記要好好教育子女! 加油!
你講得啱，我都冇打算出嚟搵咩筍工要幾高人工，係怕搵唔到工。我老公話我咩都驚定先，太杞人憂天，俾香港價值觀捆綁住。至於家務，目前我都冇乜大貢獻，個仔仲太細，之後會分擔一半！
至於我父母，家家有本難念的經，我媽好貪錢，喺我有咗之後唔理我困境一直問我攞錢逼我幫佢哋交租，又為幾千蚊嚟嘈，我99去送禮金佢屈我老公偷錢，早排仲嚟屋企搗亂差啲整傷我99搞到報警收場。只能說我會盡心盡力去孝順爸爸，我媽媽自細對我心裡造成好大傷害，呢度唔多講。
我都有信心會教好我個仔，多謝你咁大一段說話
湊仔真係一門學問嚟，唔生唔知，但學識點去照顧佢，見到佢健康成長每日唔同變化都有另樣嘅滿足感。
其實每個人嘅preference 都唔同，你將來可以享受到好多遲生媽媽享受唔到嘅野，人地點講其實唔洗理咁多。
至於工作方面就預左會遲過人起步，不如諗下宜家做ftm有無野可以係屋企開始準備？
我都係20歲意外有左就生左大女唔夠2年再生埋細佬(因為都生左1個, 不如快快手生多個, 因為我覺得得1個冇人陪伴長大好孤獨), 當年好多人睇死我搞唔掂, 聽過無數咁多說話, 不過我冇理其他人講咩, 生得出我就會養得掂, 就係咁我做左FTM 4年, 呢4年捱得好辛苦, 老公一個搵錢, 但又搵得唔多…4年後細佬N班我就返出黎做野, 終於可以過返D正常生活.
大女依家已經中三, 依家聽既野完全相反,e.g. 你就好啦咁後生仔女咁大…就快甩身鍾意去邊就去邊…可以同你個女做姊妹一齊行街…你個仔過多2年可以做你男朋友等等
但佢地冇諗過我捱個時佢地係出面風花雪月囉!!
不過有樣野我估計唔到既係5年前多左個妹妹出現…哈哈! 所有野從頭黎過呀, 不過因為妹妹隔得遠, 家姐哥哥勁錫佢, 佢既出世帶左好多歡樂俾我地, 係屋企既開心果!
不過我唔理喇…妹妹再大D家姐都大學, 我決定功課交哂俾家姐, 哈哈哈! 咁我就可以一年去N次旅行
1個讚
真係唔洗介意其他人點睇〜每個人都有自己嘅選擇〜
選擇就一定會有好同唔好嘅一面〜
最梗要自己過得開心啊嘛 生活先係自己嘅！
1個讚
我覺得好多人都會帶有色眼鏡睇後生媽媽但最重要嘅係你自己點諗
如果你有好努力做好媽媽呢個角色我覺得旁人真係唔洗理佢哋點諗
如果路人多口問嘅咪吹水話自己36喇係keep得好啫，又唔識嘅轉個頭可能呢世都唔會再見，唔洗交晒個心出嚟同呢d人吹水
最緊要係4大可以做你強大後盾，因為出嚟做嘢後點都要有人幫你湊下仔你先可以專心事業
加油呀媽媽
1個讚
唔使問人賒借，使乜理人點睇，後生定老，關人咩事
2個讚
咩年紀生都無問題，只要係自己承擔番教養責任。
畀你三十幾歲生，生完出嚟掉畀人照顧自己唔問唔理唔通又無連累下一代咩？
工嘅嘢，肯捱肯搏唔會餓死。
1個讚
唔洗理人點睇
到時小朋友大 你重好後生
人地就羨慕架喇
路係自己 洗乜理佢地點諗
老生又比人話 早生又比人話 洗乜理
1個讚
每個年齡層嘅媽媽都有優勢，年輕媽媽活力充沛，可以陪小朋友跑跑跳跳，接受新事物嘅能力亦都比較高。
曾經聽過有媽媽話自己冇精神體力去應付扭計嘅小朋友，所以管教方面只能放任⋯⋯
但你要記住，到小朋友獨立嘅時候你仲好後生，仲有大把日子要過，唔好將子女當成自己嘅全世界，要繼續成長，學習新事物。兩年唔算好耐，要搵工會搵到
我覺得只要唔好太細 (中學都未畢業)
有責任去承擔, 有能力去湊, 教育, 後生生不知幾好
我細個成日想25結婚28生仔
可惜, 29先拍拖31先結婚, 依家努力備孕中
我朋友25就生左, 依家女都小學, 我不知幾羡慕佢
我25歲再生咗個大仔， 啱啱生咗個女。
返大仔嗰時其實大學畢業冇耐， 過左時機入職場。依家係公司係一個small potato
1個讚
我諗都係喺屋企睇下書提高自己修養&盡量做多啲運動keep住健康
1個讚
都好好吖～但我唔會諗第二個住，起碼都自己做翻幾年嘢有多餘錢先，你講得啱，後生嘅話等仔女大仲可以周圍走～
加油，最緊要自己唔後悔
我相信新一代嘅父母都唔會當仔女係全世界嘅…我都有自己想做嘅嘢，同埋我都唔會放任佢