方向正確
如果呢個方法並不存在, 你係會選擇
A) 為左阿媽, 繼續同老豆見面, 然後次次有得佢俾說話你聽, 定係
B) sorry 媽媽, 以後我地whatsapp 可以繼續私訊傾偈, 但我真係無辦法同老豆和平共處, 不如唔好見了
過來人想講、唔係嚇你、係佢既控制慾係會伸延至你下一代、我既case 係一個情緒不穩既控制慾阿媽、你講既好多我都遇過、又無能力又要控制你、更甚係女人一喊連其他人都會幫埋口、我亦受唔住太大群眾壓力、最後都係要自己強硬d同有返啲距離、唔會再咩都同佢分享。記得有次只係因為係我屋企煮飯問題唔受佢指揮都喊住自怨自艾話知自己人老乞人憎、最後爆係因為佢管唔到我就管我啲仔女
其實佢哋既心理問題我哋幫唔到、我話過同佢搵專人傾、點都好啦、顧好自己身體同家庭先
1個讚
暫時我嘅觀察，佢冇乜點干涉我家姐管教我姨甥女，我知我媽平時都幾經常會上我家姐屋企同我姨甥女玩，但我老竇就從來唔會，所以佢同個孫會同場嘅時間，通常我家姐都會喺度，我家姐都唔會畀佢亂嚟。
我自己就一定會make sure我唔會畀我父母同我個仔單獨相處，我覺得我老竇未必會伸延去控制我嘅小朋友，但佢嘅言行就一定會影響到，例如佢一樣會喺小朋友面前發表歪理、亂發脾氣、鬧我阿媽之類，如果到時有呢d事發生，我會學另一位網友講，拉我老公同個仔起身走人，因為冇人有義務受佢嘅脾氣同無理取鬧，我亦都唔想個仔覺得家人之間係可以咁樣辱罵對方，爸爸係可以咁樣辱罵媽媽，或者有至高無上嘅權威去控制全家人嘅人生自由，佢製造一個唔安全嘅環境出嚟，我就拉隊走人，我無必要困喺一個佢製造出嚟令人唔舒服嘅空間入面，我唔係佢嘅囚犯。
阿樓主仲未明，佢理想嘅解決方法係雙方一齊解決，但我覺得佢老豆連自己衰咩、傷害咗屋企人都唔知。
1個讚
我諗我而家只可以接受呢個方法係不存在… 咁只可以係將接觸減到最少，尤其是喺我自己狀態都唔好嘅時候… 亦要接受喺唔想令父母唔開心/失望，同自己嘅情緒/感受之間，選擇prioritize後者
呢篇文內容係來自Recovering from Emotionally Immature Parents呢本書，其實嗰個｢理想解決方法｣係存在(文章最後部分)，而係唔需要父母認知到自己嘅問題/改變/一齊解決(因為冇可能)，但就好靠自己嘅修行：父母情緒不成熟難相處？心理師：掌握3方法，輕鬆互動還能做自己 | 50+
我只能夠講，我好想做到，但我冇呢種修行，所以我都無謂再迫自己… 因為我連recover嗰部分都未做到，我連同自己和解都未做到，所以我而家係要首先做到第一步先。
其實道歉係冇用，要改過先有用
我都知我老竇80幾歲人，要佢突然作出咁大反思同改變，根本係冇可能。我只可以改變我自己心態同反應，好好保護自己，唔再受佢影響。
不過有時諗返我讀書嗰時，我阿媽知我好頂唔順老竇d無理同脾氣，但同我講，老竇年紀大，改唔到，話我仲後生，叫我改變自己嘅性格去遷就佢… 而家諗返真係覺得呢d想法好錯，咁樣教我都好錯… 如果當時大家一齊反抗，畀佢知佢冇呢個權力去控制同箝制所有人，今時今日或者佢冇咁肆無忌憚…
我好多時都會覺得我媽好慘，不過你講得啱，同埋其實我自己都係咁諗，就係個老公係佢揀嘅，咁多年容忍咁嘅相處模式、容忍無理取鬧(甚至叫埋d仔女一齊忍)，都係佢揀嘅… 我拯救唔到佢，亦都冇責任拯救佢…
其實我奶奶生前都係咁，畀個男人日鬧夜鬧，每次出嚟食飯佢都會趁個男人行開咗同我地呻，甚至可以話係求救… 曾經有次佢真係頂唔順，離家出走，個男人先知驚，氹返佢返屋企，但其實喺奶奶離家出走期間，我老公係幫佢安排晒、換晒電話卡咁，我心底裡都好支持佢一走了之，唔好再返去對住呢個男人，可惜佢最後都係畀人氹咗返去，而個男人過咗一排都係故態復萌… 到我奶奶出事，喺醫院瞓左一排，但其實已經腦幹死亡，個男人先日日喺床邊無微不至咁照顧佢，有咩用呀？其實人已經走咗架喇，只係靠強心針吊命… 到奶奶d器官衰竭晒，心跳停頓，真係要say goodbye喇，佢激動到跪喺地叩頭同奶奶道歉，仲話下世再做夫婦，我當時心諗：奶奶你下世千祈唔好搵返呢個人，見到佢你要調頭走呀，你下世要做一個自由自在嘅人呀…
我都好明白樓主嘅情況，任何嘢都小事化大，無限焦慮到極致，仲要你爸爸50歲之後已經冇返工，既然一個人冇寄託自然就會不停咁搞屋企人，到你bb出世，盡量都唔好畀爸爸湊。呢類人應該係有PTSD先會咁，異常極端嘅成長環境影響。但PTSD最慘係搞到屋企人，而家你爸爸差唔多80歲，呢樣野解決唔到，只可以等佢… bb就出世點都係好事，到時樓主忙到甩轆都唔得閒應酬爸爸。
我屋企人都類似樓主爸爸情況，所以好早就決定乜都唔會同佢哋講，病咗唔講、冇錢唔講、離婚唔講，講咗只會令自己更加煩多一百倍… 有啲人唔明，其實唔係人人都有能力正常溝通…
可能有啲又會話「佢哋都係擔心你先咁啫。」但呢種「擔心」係會令一個人壓力爆升，幾乎係真係會想死個地步…
可能又有啲人會話「你屋企人成日講到啲嘢咁嚴重，無非都係想你關注撒下嬌啫。」「撒嬌」唔係咁，唔會下下話「就死」、「好大鑊」嚟引你關注，一兩次就算，十年廿年都係咁樣係好難受… 而家就算移埋民，佢哋打電話嚟都會有啲panic attack。樓主已經好勁！有事盡量搵細佬同家姐幫手，三個人頂一定好過一個人受晒。
3個讚
多謝你嘅回應呀，轉下眼我已經生左，的確會忙到冇時間理佢/有個藉口唔理佢咁多。
你提好PTSD，其實佢近年佢自己都會攞呢樣嘢嚟解釋/為自己開脫，佢當然唔知咩係PTSD，但就成日話佢以前點樣逃難落嚟香港，嗰d政權迫害呀，偷渡落嚟差d死嗰d… 咁我唔知有幾成真，而其實佢屋企都有大半人係冇落嚟香港，咁當年佢落嚟香港係真係被迫害要走難定點(咁點解我阿麻同佢d家姐又冇走？)，成日講到好悲慘… ok就算係，都幾十年喇，仲放唔低？幾十歲人，咪當呢d係人生歷練，將佢轉化為人生智慧，守護下一代，而唔係將你嘅苦難同痛苦延續落去我地身上… 然後自己有咩理虧，就用呢樣嘢去為自己辯護，覺得所有人要體諒你… 你當年發生咩事都好，我地都未出世呀..
我同你一樣，好細個開始已經好多嘢唔會同佢講，講左只會更煩，唔會得到任何情感或實際上嘅support。
我已經好努力置身事外，但最近都係畀佢搞到心情唔多好。上個月啱啱幫BB搞完百日宴，兩三日後佢突然喺屋企whatsapp度感懷身世，話好懷念鄉下，以前快樂嘅童年同埋之後走難嘅痛苦，然後話今年我地家族流年不利，因為佢有個家姐同哥哥先後離世，但又話佢地已經成百歲唔需要傷心，但接住又話佢六兄弟姐妹死剩兩個，希望自己過得到今年…
我地都冇人知道點覆佢好，我家姐細佬都係覆個emoji，我就冇覆，唔知講咩好… BB啱啱搞完百日宴你就傷春悲秋，話全家都流年不利我真係覺得大吉利事，你唔諗下自己今年添咗個男孫？成日諗埋一邊諗到最衰仲要發放負能量，後來我媽同我講佢嗰幾日牙痛唔舒服，食唔到嘢，我就諗可能因為佢唔食唔到嘢覺得成個人好虛弱就諗到最差覺得自己就死… 其實牙痛你咪去睇牙囉.. 過左幾日佢終於肯去剝左隻牙就冇事喇…
然後上星期我生日嗰日，佢又唔知做乜鬼，叫阿媽同我地講，佢個頭好痛好痛，叫我地要有心理準備… 咩料呀？咁阿媽就叫我地有時間返屋企睇下佢，咁啱嗰日我去左我家姐度(同娘家步行距離)，我就返咗去睇佢，但佢喺度執緊屋又唔似頭痛到要死，只不過佢呢個頭痛已經斷斷續續維持咗一兩年，佢仲曾經覺得自己係生腦瘤走去照腦… 所以就係話佢一定諗到最差… 其實醫生有開藥畀佢係止到痛，但佢覺得食完好眼瞓佢唔鍾意就冇食啫… 咁其實唔係嚴重到死咁因乜事無lala要喺人地生日嗰日又講埋d大吉利事嘅嘢？
睇完佢嗰晚我媽就話佢好精神，心情好好… exactly好似你所講，想人關注，我明嘅，但就係下下以死脅迫咁，係令人好困擾同難受… 其實佢有冇聽過狼來了嘅故事…
得罪講句，傷春悲秋，你都係一樣。Quit group已經可以。所有道理你都明晒，但你連減少接觸都做唔到，你都係自找的 ，同你老竇啲自尋煩惱係一樣。
2個讚
JM你講得好好，係咪讀過心理輔導？
有D搞笑..
辛苦樓主啦..見到你UPDATE,希望你同BB順順利利~
專注係自己既家庭先,呀爸有佢既人生課題,係佢同你媽媽要修練..
1個讚