家父從來係一個有佢講冇人講嘅人，所有嘢佢都要人哋順從佢嘅想法，唔會接受你say no，而且脾氣好大，好易情緒失控，好小事佢就會發好大脾氣，亦會用各種方法迫你接受、屈服，完全唔會尊重你嘅個人想法、意願同界線。
我有記憶以來就係咁，大家從來都係做下靶硬食。由我十幾歲開始，阿媽就叫我要遷就同容忍老竇，因為老竇年紀大改唔到。所以一直以來全家人咩都順佢意，維繫表面和諧。
但上年農曆新年左右，發生咗一件事，令到我冇辦法再對佢寬容，甚至唔能夠再同佢溝通，我覺得我有d創傷後遺，對住佢我就成個人shut down咗，要完全落晒閘去保護自己…
事緣係當時我老竇再一次私自拆我細佬d信，發現稅局追細佬5萬幾蚊遲交嘅稅款，仲有一張漏報稅嘅法庭傳票… 佢打畀我，話細佬一定係有困難先會冇錢交稅，要我立即幫細佬還錢，又不斷問我點解細佬會被傳上庭，佢覺得細佬會坐監會畀人整死，又問我係唔係要請律師…
總之所有嘢佢一定會諗到最差，明明最簡單直接合理嘅解決方法係問細佬發生咩事，但佢唔畀我問，但又要我解答問題同埋照佢意思去"解決"問題(硬食幫細佬還錢唔可以出聲同反抗)。我諗佢唔畀我同細佬講，係因為佢唔想細佬知佢私自拆信會嬲佢，但佢就搵其他藉口，話細佬當時去咗旅行，叫我唔好掃細佬興喎。即係佢同細佬嘅情緒同心情就最重要，我嘅感受就完全唔需要理會。
佢一開始賣慘情勒我，話為咗呢件事擔心到好多日都食唔到嘢瞓唔到覺，話我應該都唔想見到佢咁… 佢唔肯收線死lur，我好想收線就話要同家姐商量下先，佢就即刻發難，好激動咁鬧我點解唔即刻幫細佬還咗錢先，點解仲要嘥時間同家姐講…
我當時畀佢迫到就快癲，搞到我都好激動，嘈咗一輪終於收到線，但一收線我就崩潰喪喊，其中一大原因係我當時已經做咗半年IVF，過程好煎熬，亦經歷咗一次流產，家人完全唔知情，我一直喺佢哋面前扮無事，好努力地撐住，但佢令到我一直勉強去穩定住嘅情緒一瞬間崩潰…
其二係呢類型事情喺過去十幾廿年發生過好多次，每次都搞到我好困擾好唔開心… 佢試過好多次拆細佬d銀行信，發現細佬爭銀行卡數/貸款，少至兩萬幾，多至八萬幾，佢都會發晒茅打嚟叫我幫細佬還錢，但唔畀我同細佬講，我唔順佢意就會鬧我做人家姐睇住個細佬死都唔幫… 但其實再之前，我同家姐已經幫細佬拆掂過一次30幾萬嘅債務，只係佢唔知情，我哋唔敢畀佢知，因為佢一定會發癲失控，對件事冇幫助反而令事情惡化。
交稅呢件事最後我同家姐私下問咗細佬，細佬話會自己解決(包括即刻上網交咗稅)，但就好嬲咁喺屋企個whatsapp group鬧我老竇喺度搞事，唔使兩秒我電話就響，係我老竇打嚟責怪我同咗細佬講，搞到細佬而家嬲咗佢… 我當時已經喊到崩潰咗，人生第一次給咗佢線…
之後我就再唔能夠直視佢，好驚再畀佢傷害，同時亦對佢失去所有尊重，覺得佢係一個冇承擔又冇能力解決問題、但又不斷製造問題同內耗嘅人，所有屋企人喺佢箝制同影響下都係長期受害者。
(未完下續…)
(承上文…)
到上年年尾，我終於成功懷孕，我以為同佢關係會變好，但原來都係冇幫助，我仍然無法釋懷。雖然呢年幾佢冇再製造問題出嚟滾搞我，但喺日常小事中，佢都係冇改變過，仍然係覺得自己嘅想法做法係啱晒，你一定要聽佢講，幾小嘅事都唔容許你有自由意志。
例如佢煲蔘湯畀我，我話我唔飲得，一嚟呢d活血化瘀嘅嘢孕婦已經要謹服，二嚟係我有血栓問題要長期食薄血藥同打薄血針去保胎，唔可以同時食人蔘，流過產真係好大陰影… 但佢覺得人蔘有益，係都要煲，仲買咗一樽花旗蔘畀我，我重申我唔食得，但佢迫我要，仲叫我平時攞嚟沖水飲喎… 當然我一啖都冇飲過，但我覺得你係咪想我死？點解唔肯聽人講？點解要迫人？
到最近佢買坐月用的食材，同咗佢講我餵人奶唔可以食花膠，佢又係都要買，買咗一大盒，我問我媽點解會買花膠架呢，阿媽話當時都有再同佢講陪月冇叫我哋買，我餵人奶唔食得花膠會塞奶，但佢都係唔肯聽我媽講，死都要買(聽得出我媽當時一定有畀佢鬧，因為阿媽無論講乜做乜，只要係同佢想法唔同，就算好小事佢都會破口大罵)。
可能佢覺得咁又係為我好？但如果食花膠食到我塞奶乳腺炎，飲蔘湯飲到我流產，咁係害咗我，害咗個BB，點解佢唔去諗下事情嚴重性？點解佢覺得自己啱就要全世界聽佢講？點解所有人，包括醫生、陪月，包括最清楚我自己身體狀況嘅我本人，講嘅任何嘢佢都覺得唔啱，得佢啱晒？
如果你覺得佢花錢買人蔘、花膠etc.畀我，我仲埋怨，畀我補充一點，佢都係用我哋嘅錢去買，因為佢自己係完全冇錢嘅，佢50歲失業之後就一直冇做嘢冇收入。如果佢真係為我哋好，就應該將d家用使喺應使嘅地方度，例如有病痛就唔好等政府排期排幾年先去做檢查/手術，拎d錢去睇私家，唔好明明係畏疾忌醫，但講到自己寧願捱病捱痛都唔"嘥錢"去睇醫生，講到寧願將d錢使喺我哋身上… 自以為係偉大係犧牲去令自我感覺良好，但完全冇理過人哋感受同意願。
其實我都唔想搞到咁，但交稅嗰件事，係壓死駱駝嘅最後一根稻草，令我回想返呢幾十年嚟種種對佢嘅忍讓換來只係變本加厲嘅傷害，我真係無法釋懷。我唔知生咗之後情況會唔會好轉，我淨係知成個孕期，其實我已經唔係好能夠放鬆心情，每星期都要同佢哋飲茶，但每同佢見一次面，我心情就會差一兩日… 其實黑口黑面對住佢，我都覺得好痛苦，但咁樣係我唯一可以保護到自己嘅方法，我冇辦法當咩事都冇發生過。
點解迫自己接受？
我個人想法係「令自己唔開心既人 - 唔見！」
父母又好、兄弟姊妹又好
電話唔聽，訊息唔睇
明明自己心情愉快，同bb開開心心，點解冇啦啦又令自己心情變壞？我拒絕！
食飯？唔得閒，好忙，遲啲先，再遲啲，再遲啲
唔食咪唔食，唔見咪唔見，so what?
我對自己負責，令自己開心！
我對bb負責，一樣首先令自己開心！
你大肚，成日唔舒服！最好既藉口！
所以冇咩唔洗個個星期見！
7個讚
我無睇晒你所有內容既
但我覺得人生在世時間有限
家家都唔同情況, 如果你同佢相處咁多年都好唔舒服, 點解仲要迫自己同佢相處?
唔想同佢飲茶就借d 意唔好去, 盡量保持距離
你已經要陀BB, 照顧自己身心, 仲要迫自己去應酬佢真係好難頂
第時唔好旨意佢地湊BB, 自己湊番, 如果屋企無工人, 就排定育嬰園
宜家係你覺得佢講極唔聽, 即係努力多年情況將來都唔會改善啦? 咁你就放過自己啦
接受自己做一個同父親保持遠距離既女
如果佢去到主動滋擾你既程度, 有需要時同老公商量下, 直情搬屋改電話算
3個讚
講真，唔會修補到，佢一定肯定唔會改。
你只能夠對自己、屋企（即係老公+bb 嗰個家）好d，見面會影響到自己嘅，直情唔見。
電話、message block 咗佢，總之唔好俾佢影響到自己。
你唔想無端端消失嘅，咪喺屋企group 講點解要避開佢，佢仍然覺得自己無問題就斷絕關係，唔好俾佢同自己所謂道德枷鎖勒索自己。
3個讚
老人家幾十年都係咁性格，你改唔到，唔使修補，你狀況又唔係咁穩定，請照顧自己先
1個讚
我好認同你講法，我都係咁同自己講
尤其是之前流過產，到而家BB終於返返嚟
但成個過程，包括IVF期間種種辛酸
其實都係我同老公兩個人去面對
屋企人，父母，係幫唔到我哋
我甚至覺得如果同咗佢哋講
只會令件事更差，令我壓力更大
因為我仲要照顧返佢哋嘅擔心同情緒
所以既然一直所有嘢都係靠自己去面對同解決
一直我都係為自己負責，冇煩過佢哋
點解佢哋嘅問題，甚至乎人生，要我去負責同買單？
而家我只需要為自己組織嘅家庭負責
所以自從交稅呢條導火線之後
我已經好少理屋企嘅嘢，whatsapp group我都冇出聲
我覺得我顧掂咗自己先去顧你哋
唔該唔好製造問題出嚟煩我
我已經保持咗距離…
至於每個星期同父母飲茶，其實我有推過
我推一次，佢哋冇咩，但好快會約我下星期
到下星期我再推，佢哋就會開始有說話
因為我係home office，佢哋知我唔使出去做嘢
而佢哋每個星期都係嚟到我屋企樓下茶樓同我飲茶
佢哋會覺得有乜理由我落樓下食個飯都話唔得閒
我自己都搵唔到藉口
我媽就快70，老竇80幾
我係會唔忍心佢哋特登入嚟搵我，我都唔見
所以一直以來，推到一次推唔到第二次
一個月推到一次都仲要見三次…
如果我話我唔舒服，仲大鑊
一定踩上嚟我屋企，又煲湯又煲粥咁
我老竇係好stubborn
例如疫情嗰時，大家都好少見
有次我同老公中咗招好返無幾耐
佢就即刻話煲咗蔘湯要拎過嚟畀你
話中完covid要飲佢呢個湯補返先得
講真你d蔘湯係仙丹咩？唔飲係咪會死？
疫情嚴峻，叫佢呢d時勢唔好周圍走
我係咁推佢，佢就話如果我唔見佢去拎壺湯
佢都會搭車拎上嚟放喺我屋企門口
總之佢要咁，就一定要做到先會心息
講起嗰時，佢80幾歲人但覺得自己百毒不侵
因為我哋三姊弟中過晒佢都未中
佢覺得自己勁過晒我哋d後生
但其實只係佢唔舒服都唔肯做快測或睇醫生
後來我媽中咗，其實都係畀佢傳染
係佢中先但佢唔肯做快測，然後傳咗畀我媽
之後我媽好返，冇幾耐成個屋村畀衛生署洗樓
佢畀人驗到係陽性，佢就即刻世界末日咁
同我哋講要畀人捉去隔籬營，話死緊，話無命出返嚟
發晒癲，搞到全家人都崩潰，阿媽係咁問我點算
我嗰時已經好懷疑其實係咪真係捉佢去隔籬
因為嗰時已經係話d隔籬營full晒，中咗都係在家隔籬
但佢講到人哋已經嚟到要捉佢上車咁
我同佢講其實捉你去隔籬營自己一間房
好過捉你入醫院喺度交叉感染呀，你驚乜啫？
但總之佢就發晒茅，覺得死緊架喇，會死喺入面…
嘈咗一大輪，到最後其實係在家隔籬囉
人哋都冇車冇營冇資源去隔籬你呀
係佢自己小小事就發晒茅發晒癲，講到死人咁
但到頭來原來全部係佢自己幻想同9up…
我想講，同交稅件事一樣，所有事都同出一徹
明明無事，係佢自己諗到好大件事，諗到最差
沉淪到十八層地獄，然後拉全家人同佢一齊落地獄
唔肯聽人講，唔畀你合理地解決問題
係都要大家一齊攬炒…
所以點解只可以報喜不報憂
點解有事唔可以同佢講，唔可以畀佢知
因為一定唔會有好結果，一定會make things worse
所以，唔使搵藉口，直情同佢哋講點解唔想見。
佢哋唔明咪唔好聽電話、已讀不回。
去到屋企門口都可以唔開門㗎啫！
因為我home office, 而佢哋係嚟到我屋企樓下茶樓同我飲茶，我推到一次，推唔到第二次，佢地會覺得冇理由我落樓下食個飯都會唔得閒… 我真係唔去的話，佢哋會直接踩上門…
同埋我會出去飲茶，都係因為我阿媽，我唔想見我老竇啫，但我阿媽都幾無辜嘅，平時約飲茶都係我媽約我，你話如果淨係同我老竇飲茶我就一定唔會出去，但當然就算我係睇在阿媽份上而去飲茶，只要我老竇喺度我都一樣會心情好差，一樣會黑口黑面…
其實我就快生喇，生完之後大家關係會變成點我真係唔知，我係咪可以將佢視為我個仔嘅公公而可以對佢寬容d? 至於湊B, 從來冇諗過假手於人，我無工人，但會自己湊，我父母(尤其是老竇)做父母嗰一套，我覺得係唔合格，係反面教材，所以我冇諗過畀佢哋湊。
我知道我係可以同佢保持距離，只不過而家都係要睇在阿媽份上而同佢見面，因為佢哋兩個係一個單位，我想見阿媽就冇得唔見佢…
Leila
10
其實我媽知道我頂唔順老竇，唔鍾意老竇。我家姐細佬，大概知咩事，因為交稅嗰件事，點解我細佬會嬲到喺whatsapp group鬧我老竇，係因為我地三姊弟私底下傾時，我講咗畀佢哋知我當時流產冇耐，情緒唔穩定，唔可以再承受老竇的情緒勒索同無理取鬧，我知我細佬係因為咁而忍唔住鬧我老竇，但佢冇諗過佢咁樣，老竇係會更加怪責我… 我家姐當然心痛我，我後來仲同佢講埋我係做緊IVF… 其實呢段時間，我諗我家姐細佬盡可能都幫我頂左屋企d嘢，又或者呢段時間其實冇乜特別嘢發生，我唔知喇因為我都冇理喇… 加上交稅事件冇耐，我奶奶突然走咗… 嚴格嚟講係一出事就腦幹死亡，但喺醫院植物人咁瞓咗一排，瞓到所有器官壞死先走，然後我哋又要辦後事，所以我老竇有一排唔敢煩我… 或者佢應該知道，喺生死面前其他事都係微不足道，佢就冇乜點再搞事… 有時成家人聚餐，聽到佢同我家姐細佬講d嘢/叫佢哋幫手做嗰d事，我係完全冇聽過唔知情，即係佢都跳過左我，唔煩我，有咩係搵我家姐細佬先… 其實過去嗰十年，佢有咩都走嚟煩我，應該係因為家姐生咗小朋友，佢覺得家姐要湊女又要返工好忙，而我冇小朋友又唔使返工(我home office接job但佢眼中係覺得我好得閒冇嘢做)，所以有事就一定係搵我煩我，但我諗我生B之後佢未必會，而我都會將自己嘅家庭(我同老公同BB)放第一。
可唔可以叫佢地唔好過黎，煩死
我明白喇，佢係一個好pushy既人！
但冇辦法，只能夠不停拒絕，就算真係要畫公仔畫出腸都要做！「我唔想見到你，我見到你唔開心」
可能真係要再狠心啲。
可唔可以唔好話比佢知你home office,話公司呢排突然要返工！點解？你理得點解？公司決定既野有得解咩？！
啊媽冇辦法，相信啊媽明的。假如成功飛甩你爸再慢慢搵機會約媽。
我擔心你第日生左bb會比佢影響心情！
希望盡量有機會依家解決呢個麻煩。
1個讚
樓主真係辛苦你地一家…~
其實唯有惡先可以禁得住呢類人 (你老豆驚你細佬就係甘既原因)
佢地只會由自己角度出發去諗,即自私
所以你地唔需要去思考點樣先可以令佢同理你地
也盡量慳返啖氣唔洗同理佢,因為佢都感受唔到呢樣野
孕婦最大,你提到既佢會好忟塞做一些佢覺得對你’‘好’'既野
你就盡量發脾氣冇問題架…! 當你扮到情緒易失控過佢,佢就會安靜
eg:
個小朋友有d咩事你負責,你出錢呀?
你又唔係醫生,我梗係聽專業架
拿,我生完情緒好唔穩定,你唔好嘈我迫我,唔係我會爆煲!!
亦因睇得出佢可能對你家姐細佬比較關心,你可以攞埋佢地做橋(我睇你地3姐弟感情唔係太差?單聲佢地應該ok)
我真係有d咩,你地兩個年紀甘大幫唔到手,到時搞著家姐細佬呀!
3個讚
記住點都好. 以自己同BB為先. 你地先係最重要.
而且你就快要生了. 佢既野你暫時都點唔好理.
生完之後要睇BB更多野要去處理. 花膠你真係千萬唔好食呀!
有咩就發惡啦. 唔好再因以前既事困住自己.
加油 
1個讚
Leila
15
我父母通常係weekday過嚟搵我飲茶，因為我home office，佢哋知我隨時行得開… 有時佢哋會約weekend，但其實我老公都唔想同佢哋飲茶，主要原因當然都係我老竇，因為佢都覺得我老竇好pushy，會係咁迫佢食嘢… 迫人食嘢呢單嘢都係好難頂架，咁多年嚟都係咁，而我係到呢段時間都終於反抗，但就真係搞到一齊飲茶好似搭檯咁…
話說我懷孕頭5個月其實都唔係好食到嘢，胃口都變晒，所以我要阻止佢叫到成檯都係食物迫我食，我一坐低就話我淨係食碗粥就得，就算之後可以食到多d嘢，咁我會叫碗粥加個點心，然後同佢講我已經叫咗我食嘅嘢，其他嗰d你自己係食先好叫，但結果佢都係會叫d佢唔食但覺得我鍾意食嘅嘢然後迫我食，食唔晒就迫我打包。咁一籠點心/包都起碼有3份，佢唔食，我阿媽都係食1/3，剩晒喺度，有時我咪勉強食一舊咁囉，但只要你食咗一啖佢叫嘅嘢，咁佢就覺得：都話你鍾意食架喇，你把口話唔食其實你係想食嘅… 然後下次佢又繼續叫，話你明明鍾意食…
所以後來，我唯有係佢叫嘅點心，我一啖都唔食，點叫我都唔食，叫我打包，我話唔要，死都唔要，眼尾都唔望一眼，全程係專心食自己叫嗰d食物同睇電話，完全唔同佢有任何交流，真係好似唔識搭檯咁，最初佢都仲會喺度哦，係咁話點解唔食/唔拎走，但我應都唔應佢，咁佢先唔再迫…
我同老公講，其實真係唔想做到咁，但唔咁樣，佢就會覺得佢迫到你，只要你心軟將條界線退後1毫米，佢就即刻會將你條界線拋到100米以外，佢係每分每秒都踩緊你條底線，因為佢知你會心軟，退少少佢就乘勢上，將你條底線越推越後，所以你係絲毫都唔可以退。我老公話係呀，咁做就啱。但講真，我真係唔想食餐飯都食到咁辛苦。
我老公喺度係會好d, 氣氛冇咁僵，我唔講嘢，我老公都會講幾句。但好似最近一次係約weekend我同老公一齊出去，食食下我老竇想拎我媽身旁個袋入面嘅嘢，但攞唔到，我媽就想成袋嘢拎起遞畀佢，但佢話唔使，叫我媽放返低，但佢又繼續都係攞唔到袋入面d嘢，我媽想再成袋拎出嚟畀佢，佢就即刻破口大罵，死都唔畀我阿媽拎起個袋… 真係痴線個喎，咁都有得鬧… 仲要我老公喺度，我覺得你喺屋企人面前幾醜惡都算喇，我哋慣咗我哋忍，我老公喺度你扮下嘢都好呀，點解要喺我老公面前鬧我老母？你估我老公會好想睇到呢d場面？我奶奶身前都係成日畀阿uncle(我老公繼父)鬧，係又鬧唔係又鬧，鬧到我奶奶冇晒尊嚴又冇人生自由… 點解d伯父個個都係咁？已經唔算係一家之主(唔係breadwinner唔係一個人養全家)但可以咁大權威咁大脾氣，成日鬧個老婆搵個老婆嚟出氣… 我真係覺得好討厭好睇唔過眼
1個讚
Leila
16
如果直接同佢講唔想見佢，唔鍾意佢… 佢承受唔到呢d打擊，佢會以死脅迫，唔係未試過。以前細佬同佢頂到行，或者佢覺得我哋冇人關心佢，佢就發癲，話死咗佢算，話去跳樓，當然你知道佢其實唔會真係跳，但見到呢d場面有邊個個心會好過？當然佢都係想所有人唔好過… 佢未必夠薑跳樓，但玩失蹤都唔係未試過，總之要你擔心佢要你唔好受…
咁多年嚟，我已經知道反抗佢係等於玩自己… 可能我個人係highly sensitive嗰d， 同一件事可能人哋可以隻眼開隻眼閉，但我嘅感受會好深，我唔可能唔理當無事… 可能因為咁，我家姐細佬冇我咁容易畀老竇嘅情緒影響，佢哋真係可以唔理就唔理，但佢哋都係行消極政策，即係唔好反抗，唔好刺激我老竇，盡量順佢意就算，因為冇人想處理佢d痴線脾氣同情緒… 我細佬都係十幾歲時會同老竇嘈，大大下佢都唔嘈，對大家冇好處，反而佢d世界仔性格，而家係可以當老竇係細路咁氹，但我做唔到。
我係freelance嗰種home office, 冇公司冇老闆，自己接job, 都已經十幾年，佢地知我係自由身，尤其是而家我生B仲諗住自己湊，都好難突然呃佢哋話我要返工… 我只能夠希望以後有個孫仔喺度，佢可以煩少d, 我又可以寬容d, 可以放低之前嘅嘢…
Leila
17
我老竇係驚我細佬嬲佢，好明顯都係重男輕女，以前我細佬會頂撞佢，兩父子爆晒粗咁鬧交，但後來我細佬搬咗出去住，我老竇就對細佬千依百順，因為佢驚個仔唔返嚟，佢想個仔搬返屋企… 佢成日話自己唔偏心，一視同仁，所以但凡買d咩，都買3份，3姊弟一人一份，佢覺得咁樣就表現到自己係唔偏心，好公平，但呢d只係門面嘢，3歲細路都睇得出，一有咩事都係搵兩個女出嚟擋，出嚟解決問題同孭鑊。
不過你突破咗我個盲點：同理佢係冇用，佢感受唔到呢樣嘢… 係喎，其實佢感受唔到，我終於知道點解我咁辛苦去做咁多嘢，都係不得要領又搞到自己咁困擾… 例如之前佢身體有事唔肯睇醫生，我會日氹夜氹勸佢去睇私家，當我家姐同細佬都放棄咗嘅時候，我死都要諗辦法帶到佢去睇醫生我先安樂，使成萬蚊同佢睇私家，換來佢開心咗一個禮拜，但未搵到病因，再繼續諗d屎橋整埋封假信話有免費promo氹佢做body check，但佢已經唔領情，一句話"唔會考慮"落我閘，但又繼續成日唔舒服ee淆淆要人關心佢虛寒問暖，但你問多兩句佢又話你過份緊張，講到自己好豁達面對生死，叫你唔好咁睇唔開，但其實明明係佢自己怕死先唔肯去醫院… 嗰時佢去打第一支covid針叫我幫佢預約，我特登約一個我都得閒嘅時間話陪佢去打針，因為佢咁大年紀我驚佢打完會唔舒服會暈之類，但佢話唔使我陪，講多兩句仲鬧我｢多9餘｣，然後自己去改咗個預約時間…
其實佢個人好矛盾，佢係想人關心佢，但你關心佢佢就會扮到唔在乎，甚至反過來發你脾氣話你多餘，但你唔關心佢時，佢又唔開心，覺得d仔女唔理佢，要生要死咁… 我之前會因為咁而令自己好困擾，我唔知可以點做，因為點做都係錯，都係不得要領。其實佢咁樣，你畀幾多關心、同理心佢，個感覺都好似係撞埋牆咁，你唔覺得佢接受佢領情，又或者其實佢係受嘅但可能因為尊嚴問題佢唔可以表現出嚟，所以佢會反過來發你脾氣，表現到好似佢唔需要呢d關懷同softness咁，但其實佢心底又好需要… 除非你好睇得開，你當佢係精神病人，有認知障礙咁，當佢細路咁氹，接受你對佢好但佢會畀屎你食… 但我自己性格唔係咁，我同理你，我唔求你同理返我但起碼你唔好反過來畀屎我食，但佢下下就係畀屎你食，所以我又會好難受好唔開心…
不過自從交稅件事，同埋我有咗BB之後，我已經唔想亦冇能力再花呢d心力喺佢身上… 其實我而家同佢飲茶但黑口黑面唔出聲，某程度上都係特登用呢d咁差嘅態度去擋佢，去保護自己… 我唔係如你所講發脾氣去制衡佢，而係落晒閘唔交流，都費事嘥力去發佢脾氣去嘈，因為發佢脾氣都係一種交流，我直頭唔想有任何交流，反正佢都唔會聽人講，佢認為自己啱晒，你講乜都係錯。
我同家姐細佬其實唔係特別close，不過自從佢哋知我之前流產，我知佢哋都好就住我，可能屋企d嘢佢哋已經有幫我擋。我老竇偏心細佬就梗架喇，不嬲咩事都係搞我同家姐架啫，但過去十年佢轉移淨係搞我，應該係因為我家姐生咗小朋友，佢覺得家姐忙，又覺得我好得閒，咪搞我囉… 咁而家到我生B喇，咁我希望佢唔好再搞我喇… 同埋我都唔會畀機會佢架喇…
你老豆同我仔女老豆都幾相似, 佢送禮物俾人係以佢自己既喜好為準,收禮物既人鍾唔鍾意佢唔理會. 人既固執又自私.
我性格有點似你, 好討厭佢,但又做唔到完全漠視佢,所以受氣時會好唔開心. 阿仔就有本事當佢街外人處理,幫佢處理事情當做義工,對佢既無理要求或說話完全不上心. 阿囡就火爆性格, 佢無理取鬧或多多無理要求, 就算食緊飯/探佢病, 都即刻執手袋走人.
我就學緊阿仔,希望成功.
如果你無法漠視佢, 就要學我囡, 唔啱聽即執手袋走人. 我估佢應該慢慢知道你係唔管得/唔鬧得, 如果佢想繼續見到你, 就要識收聲.
1個讚
認真
湊孫仲多d 機會嗌交, 最好既方法係孫都唔俾佢湊
(岩岩先有個朋友, 兩老初時話會幫佢湊BB, 後來講到明以後唔再幫佢湊BB, 朋友老公即刻搬遠d, 朋友自己湊有時又搵社區姨姨湊下, 都叫自己搞得掂, 點知到小朋友讀幼稚園, 兩老突然又好殷勤走上黎睇孫了, 然後次次一家人飲茶又怪我朋友湊得佢地個孫唔好云云)
而你亦都唔會因為老豆湊孫而放下之前既野, 否則唔會上黎寫呢篇千字文呻啦
1個讚
A_lcy
20
哈～中哂計。
失蹤咪尤得佢囉，唔好打俾佢唔好send message，等佢知道自己可有可無，呢招唔work 嘅，佢下次就唔會再玩失蹤。
再講多次，佢八十幾歲很肯定唔會改佢呢d 性格，你唔改就係咁樣忍再打千字文，成個情況唔會改善。因為你連講點解憎佢都唔肯講，佢連知自己錯嘅機會都無。
1個讚