童年俾人話我細膽，例子有:
- 唔夠膽落樓梯俾人話
- 幼稚園入學喊，俾人話
- 小學面試喊，俾人話
- 有人黎屋企，我匿埋，俾人話
仲有好多好多其他例子……
成長期間形成自卑、無自信既性格，更甚者係自我形象低落
成年後自覺對親密關係會抱有懷疑，覺得冇人錫自己，渴望被愛……
影響埋我既愛情觀，婚姻關係……
直至生兒育女後，我先重新確立到底愛係點樣一回事……
個警剔位係，我响缺乏父母關愛下成長，我唔識自愛，又點去愛人？
13個讚
認同父母對shape 仔女嘅成長係有好大關係的，你指嘅疏離感覺亦同attachment theory 所描述嘅類似。我自己家人都唔多表達愛意，到今日我都喺呢方面有handicap 
只可以話當年知識水平唔高，有關嘅心理學研究亦未係好成熟。嗰個年代養育小朋友冇咁多知識，亦冇咁多正向教育嘅風氣，仲係行緊慈母多敗兒嘅理論。我唔認同「天下無不是之父母」，但我亦都傾向相信我哋父母當年已經盡量比佢哋覺得最好嘅嘢比我哋，佢哋對我哋嘅養育缺乏關愛，好大機會都係因為佢哋自己都唔識愛。
你察覺到呢樣嘢，可以選擇改變同選擇你覺得好嘅方法對自己仔女。講真冇一個理論係絕對好，時代亦會轉變，呢一刻你覺得呢個係最好嘅approach 就已經足夠
14個讚
我細過全部都經歷過晒，但唔覺係咩慘痛經歷。
不過睇完你提出，我都要好好反思一下，因為我對自己小朋友都會講兩句，尤其我小朋友面試考PAPER遇到唔識就會緊張到喊。（其實個種話只係講唔識就作亂填或跳過唔好做，你唔識人地都係一樣唔識，唔需要喊）
2個讚
本人童年都麻麻地，但又唔覺得好慘痛
當然有d位係 如果做父母要避免
回以上咁多位
我用慘痛去形容，或者俾人感覺誇張;然而我所寫既內容只係其中一個例子，有其他慘痛經歷，我唔想一下子講咁多，亦有部份唔方便咁公開咁講
對於父母，我從來冇太大既恨意，明白佢地已經儘佢地所能去愛，今日我係咪能夠完全放低過去，我唔夠膽講，最少我冇响父母面前再度提起呢啲傷痛既經歷，反而係佢地時不時仲會提住我呢啲細膽既童年往事……
2個讚
有咩問題？細膽幾可愛丫。
你肯定係父母造成你細膽冇自信，唔係天生性格？
2個讚
我是敏感、和情感豐富的人，但偏偏我父親非常冷漠，簡直去到冷暴力的程度，對我不聞不問。而母親就非常富有批判性，和非常細膽，對我有很多的不信任，佢哋從來不明白我（但自以為明白），與我沒有共鳴，令我長大同佢哋有好大的疏離感，令我有好大陰影，不懂得愛人，幸好遇到懂得愛我的另一半，才知道什麼叫愛。
4個讚
1.由細到大都笑我蠢，無家姐咁有小聰明，搞到我覺得自己真係好蠢，自信心低落
2. 青春期時唔識護理皮膚，生咗好多暗瘡，父母家姐就話我唔靚⋯無家姐咁瘦就笑我肥（160cm,110lbs)，但從來無幫助我諗方法解決⋯⋯
所以一直覺得自己又肥，又唔靚又蠢，自我形象低落
係直到讀大學有個好朋友同我傾偈，話覺得我好無自信，明明就唔係咁差。之後我叮一聲諗通咗，係成長以嚟屋企人都係行批評路線令到我以為自己真係咁地底泥。
不過我無怨佢地，因為一直以嚟都係咁就好難改變呢個習慣，所以讀大學幾時都住宿舍，畢業後搬出去住真係幫到我好多！都警惕咗有細路時唔好用同一種方法對佢地
7個讚
父母好就我，咩都俾曬我，咩都幫我做曬，大過咗我發現自己好多生活技能都唔識。
發現咗後，我儘量遠離父母，亦都怕咗佢地嘅愛。
4個讚
我細個屋企窮，父母讀書唔多，阿媽好錫我哋，阿爸就好自私，唔會理我哋。不過阿媽唔識執屋+購物狂+儲物狂，不停買嘢唔肯掉。衣櫃爆到連門都開唔到，一屋一地雜物，屋企長期好似垃圾崗一樣
阿爸鍾意食煙飲酒，飲完酒就同阿媽鬧交，日日都聽到佢哋嘈。
當我搵男朋友時專登揀唔煙唔酒，到結婚時搬走覺得係解脫，終於唔駛再住係垃圾崗，唔駛日日家嘈屋閉。而家我好包容老公，好少同佢嘈，因為唔想小朋友係家嘈屋閉環境中成長。仲有我屋企執得好乾淨，好少買嘢，唔想再住垃圾崗。
8個讚
其實幸福過度，比起地獄生活好無限多了。
我終日被毒打，基本生活需求咩都無，想自殺又唔夠膽，唯一願望係盡快長大逃離地獄。
不過我知道有唔少係被打成殘障或根本連長大機會都無，所以未算最差。
離家出走後，先知道原來出了家門，任何地方都係天堂，即使有段時間只能每日兩餐麵包渡日，都過得好開心。
幸好在成長期，係朋友處學到信任同愛，否則隨時變反社會人格。雖然果段時間既朋友比較特別，都係裡社會既人。
至於無自愛能力，哩方面係真既。
如果有需要自插兩刀，基本上會毫不猶豫。
因日子係額外賺回來，小時候早應死掉才合理。
只不過積極同消極既性格同能否自愛無關，我係好積極既人，會善用可以無視自己感受既特點。
剔除娛樂及休息，騰出大量時間去學習和工作。
最終達成左一些夢想，成為職業運動員及建立屬於自己既幸福家庭。
可以為家人而活，唔會再有隨時橫死都無所謂既心態。
19個讚
痛苦既日子已經過去，祝福你
2個讚
最近聽過一個分享，教導父母應該要坦白承認自己既錯，咁樣仔女由細個開始效發父母，唔怕衰，肯去試，先會識得點樣面對挫敗
我覺得講得好好…
另外，仔女指出父母既錯，亦係孝道之一
3個讚
我哋上一代接受唔到指正、那怕只係不服從都可以黑面、我既經歷就係要讓仔女做自己選擇、接受後果、當然佢哋仲細、影響大既選擇我唔知仲做唔做得到
4個讚
佢會無端端覺得人哋嘅物件冇用然後「幫你」掉咗
作為家人，喺佢面前實在太赤裸，一啲尊嚴都冇
仲要唔係亂咁擺嘅「雜物」，係收得好哋哋嘅公家物，甚至用緊嘅嘢
可能呢度都會有人「幫」老公掉「雜物」然後覺得好爽。但係我想講，忍得一兩次，唔代表可以忍十次。掉嘢前，物品擁有人係應該知道並同意
2個讚
謝，沒事呀。
每兩三年，我會返去見一下以前既家人。
再後來提早有老人痴呆問題，好似無左以前虐待既記憶。
變成普通愛錫孫仔既老人家咁，我又唔想比細路知道社會殘酷既一面。咪當無事發生過，見多左面，每年都返去一次咁。
表面三代同堂，好幸福。
不過我完全唔覺。
3個讚
指出，係自身情緒可以宣洩嘅渠道之一
講咗出嚟永遠係舒服啲
（比較建議禮貌啲去指出）
至於佢改唔改到，唔係仔女可以控制
改到就改，改唔到亦要喺適當時候放棄
佢幾十年都係咁過，真係未必改到
明白咗呢點，個人會輕鬆啲
我比較鐘意用「家人」去形容，而唔係「孝道」
因為溝通尊重係兩向，你對人好人對你好
1個讚
我覺得可以等仔女大個啲、有足夠理解能力嘅時候講。可能仔女會覺得…哇～咁你都捱得過～老豆好勁呀～
2個讚
反而覺得屋企人可能年紀大左有改變，
以前既佢好大脾氣，
入門口我無叫佢，
無出聲打左我一巴。
去到我十幾歲記得係因為叮菜唔記得包保鮮紙，佢好大力用筷子打落我個頭。
筷子都打斷左。
連兄弟姊妹都話細個同佢講笑佢都會嬲。
依家既佢火氣收咗，
佢依然會話你，
但話你唔聽，佢會由得你。
1個讚
“ 你係家姐，點解唔可以讓下個細嘅”
“你大個呀嘛，有咩錯都係你錯”
大個咗之後諗返起真係想講粗口
5個讚