小朋友3歲幾
上年7月出現呢個問題
教左幾個月好轉左
乖左幾個月
點知呢2個星期無啦啦又黎過
成日工人姐姐唔比佢做d野
佢一嬲就打工人姐姐(拍落去,1/2下)
我所有方法都用過(除左打佢)
naughty corner/鎖玩具/獎罰計劃/講道理/大鬧/ignore佢
琴日仲嬲到困佢入廁所(我知唔好,但真係好嬲)
到底可以點
佢對其他人唔會郁手,只對工人姐姐
日日放工返到屋企知道佢當日有對工人姐姐曳
就罰佢
我心情因為呢件事好差
嬲到日日罰完佢都已經無心機同佢玩
親子關係惡化
好大壓力好唔開心
到底可以點…
P.S.我地對工人姐姐好nice,呼喝都唔會
通常小朋友都會對淋善既人出手，
你工人姐姐係咪好淋善？
唔知算唔算
我叫過好多次
要捉住佢隻手stop佢
好認真同佢講唔可以
但姐姐唔理我
由佢打…
但平時對小朋友都幾粗聲粗氣,呼呼喝喝咁
咁唔怪之得。
我覺得你仔係欺善怕惡。
佢覺得工人姐姐係點都唔會發脾氣。
我覺得你工人姐姐發一次脾氣你bb下次
唔敢打佢。
同你姐姐講唔可以由佢打。
錫佢就要教佢。
我講左起碼幾十次
佢ok完我,但最後都唔會做
情緒係要宣洩嘅,你只係阻佢打,佢心中有怨無路訴,下次一樣會再嚟
小朋友唔識講,唯有靠尖叫,打人嚟表達不滿
所以必須要了解問題嘅源頭,即係佢兩個嘅關係,到底出咗咩錯,先可以解決
你都話小朋友對住父母冇嘢,即係佢唔係天生暴力狂,亦唔係有咩障礙
所以更應該協助佢表達自己情緒同想法,長遠對佢嘅情智發展最有幫助
懲罰/獎勵只係外力,對表達情緒係0幫助
我覺得係姐姐好強硬,唔會同佢好好解釋
所以我小朋友會易激動,一激動就忍唔住出手
eg今日姐姐有桶水洗我小朋友衫
我仔想玩水,佢唔比,趕佢走
我仔就喊同打佢
如果係我,我會解釋玩水會濕哂到時就要沖涼/換衫,佢唔鍾意沖涼,所以聽到呢到通常已經會放棄
如果佢堅持要玩, ok咁我會教佢幫手洗衫, 濕左就叫佢自已換衫
咁所以好明顯姐姐處理唔到小朋友
長遠下去會令小朋友情緒長期波動,影響埋大腦發展
同埋佢打人,你又再鬧佢,佢情緒又更加差,咁落去係惡性循環
如果係我,一係就調教姐姐嘅做法
一係就減少啲佢地嘅接觸
如果都係唔得,我會考慮換姐姐
係好麻煩同徙錢,但為咗仔仔,我寧願辛苦啲
我同老公分別同姐姐傾左好多次
但都無用,佢都唔聽我地講…
而家已經減少左佢地接觸
起身/梳洗/食飯/換衫/出門口/沖涼/訓覺都係我自己跟
(我想減少佢地接觸,加上如果我係到,我仔都唔肯比姐姐幫佢)
所以佢而家如果郁手,只會係我同老公都唔係屋企時郁手
換工人…我都想,不過仲有一年完約+疫情好難搵工人姐姐
唉…
現實有好多限制,明嘅
如果你想教好小朋友,可以試吓接納佢嘅情緒
“媽媽知你嬲,因為姐姐唔俾你,如果有人咁對我,我都會嬲架”
等佢知道你係明白佢嘅情緒
然後先再慢慢教佢,雖然係嬲,但打人係唔啱架…你可以話俾父母知/打公仔/枕頭
不過你預咗要教好耐,好多次,可能先可以有一次得
可能另外9次佢都打姐姐,但有一次忍手,就要讚佢,鼓勵佢做得好
“你大個仔啦,識得控制自己啦,媽媽覺得你做得好好呀…”
相信香港地好多雙職家庭都係咁。工人只能負責基本生活需要，唔會用心教細路，因為要教好小朋友要用佢耐啲時間同心機。
樓主feel 到你著緊小朋友，要靠工人，換工人又有難度。我冇工人冇comment, 只係想留言支持你，同你講聲加油。
我想起當年阿女同工人姐姐好friend, 因為她們一起玩玩具, 建立了如"朋友"的關係, 我認為這點很重要.
我平時要上班, 除了跟功課, 大部份照顧女兒的工作都是由姐姐負責. 姐姐亦會和女兒一起玩, 如Uno、大富翁、爆旋陀螺、捉棋等等, 所以對阿女來說, 姐姐不但是照顧者亦是玩伴. 姐姐在家的"地位"不低, 所以阿女不會欺負她.
當年姐姐還會用印尼拼音幫阿女默書呢.
樓主, 試試幫小朋友和姐姐建立一個相對平等的關係, 讓小朋友發自內心的明白不應打姐姐, 這可能比用說話阻止有效.
我女現在18歲了, 姐姐一早已回老家, 但阿女至今都會說起以前姐姐是如何和她一起玩耍的.
我都有試過咁講…
乖左一個上午就大讚佢
佢見到我讚佢好開心架
但下午又黎料…
今個星期一至五,5日入面有4日郁過手
星期六日唔會打,因為我同daddy係到
今日出門口前同佢傾過,話你琴日曳, 媽咪好唔開心
佢一聽到內疚到係到啜泣,攬實我
我以為佢今日會乖
點知今日下午又郁左手…
仲要今日成間玩具房已經比我鎖左(家規係要乖24小時先可以開返)
真係教到我好灰心
唔知幾時先可以斷尾 
多謝你
好想教好小朋友
但有d位如果當時人唔合作真係好難好難
我姐姐好少同小朋友玩
屋企得佢同我仔時
佢只會坐係佢自己房(因為無cam)
唔會出黎…更加唔會理我仔
係呀,因為源頭未解決,所有嘢只會係門面…
你想像吓一個人老咗出唔到街,要俾人照顧,
但照顧你嗰個人咩都唔俾你做,對你唔好,但你被逼日日對住佢
你就算唔打佢你都會日日發脾氣
所以反而我係同情你仔仔
好有隔山打牛既感覺…
姐姐唔聽我個套…個仔唔聽姐姐個套…
我要返工…短期內換唔到工人…
好似一個死局咁…
而家我放假我先鬆一口氣,心情好d
因為佢會乖乖唔洗罰…
平時一罰佢我自己情緒都好差
小朋友好奇想玩唔應該被罰
小朋友發洩情緒都唔應該被罰
由小朋友嘅角度出發：明明係姐姐無解釋點解唔比做某件事，但媽媽就偏幫姐姐，仲要被自己最愛嘅媽媽罰，小朋友一定覺得唔公平，傷心同委屈
為左個仔心靈健康，快d換姐姐啦
短期嚟講，你就晚晚問下佢姐姐有冇激親佢，如果有，你就陪佢打下公仔同佢一齊發洩。
多d同理你個仔，其實你自己都知你個仔點解打姐姐，你應該幫佢講出嚟，等佢知道媽媽係明白佢既。唔好問佢點解打人，得三歲你expect佢講到幾多？
另外唔好講道理同罰喇，一d用都冇。
「你打人媽媽會唔開心」會令小朋友好辛苦。因為你未教佢發洩情緒，除咗打人佢諗唔到可以點做，但小朋友又唔想媽媽唔開心，壓力會好大。所以，我估佢喊唔係內疚，係太愛你唔想你唔開心，但又無能為力。
唔好覺得自己個仔打人就係自己教得唔好，得三歲係有好多野要學，要教。但你要教嘅唔係唔好打人，而係如何發洩情緒
「尋日曳….」
小朋友3歲，其實智商同貓狗一樣架咋，尋日曳，佢都唔知咩概念，遇到行為唔正確，一定要即時糾正架，秋後算賬叫佢點適應？
佢郁手係唔啱，但係無其他更好方法丫嘛…！又無人當場提點佢「覺得嬲、唔開心可以點做」
倒不如比其他方法佢代替打人，例如貼張「姐姐乖乖表」「仔仔乖乖表」，（佢覺得）姐姐曳就貼一張豬豬貼紙，姐姐煮飯比佢食，係做得好就貼張兔仔貼紙。相反一樣，仔仔聽姐姐話，姐姐又貼張兔仔比仔仔。你地夜晚返到屋企咪可以順便聽佢share下囉。
其實呢啲唔使有獎罰，志在讚揚幾句同互相分享。