岩岩同老公分開左，原因係佢俾我知道左佢出面借錢，仲要還唔到，原因佢話有人話要篤佢灰，要俾暗口費，好多個月冇俾家用我，仲要一次又一次偷我同bb啲錢。
我e+一個人又要租屋又要請工人我真係頂唔順，母嬰院懷疑我抑鬱，因為我成日無啦啦喊，講緊係返返下工無啦啦就喊，同埋成日一處理唔到件事一有壓力就想自殺，bb岩岩先一歲，工人話佢做到3月就唔做返屋企結婚。工人卡喺呢啲時間我都唔知e+退唔退租好，但係唔退租我要周圍問人借我都好難頂，但係要佢同我搬返屋企2個月佢又執野走好似玩緊佢咁⋯
不過最煩係佢走左bb搵邊個湊，bb好痴我，如果我唔喺度佢唯一就係痴姐姐，請新姐姐佢未必肯跟，我想搵到份工可以湊到佢，但好似冇乜可能，手工藝我又唔叻，開網店又冇錢冇資金，唯一肯幫我湊bb既親戚同我講，如果佢幫我湊我親要放bb喺佢屋企放假先湊佢走，我真係唔想咁，我已經俾唔到個完整既屋企佢，我唔想仲要掉低佢⋯有冇人可以教下我點做
1個讚
Bb仲咁細，工人又就快走，唔好諗返咩工住，安頓左bb先，你父母會唔會幫手？最好搵返屋企人湊bb，唔得就試吓搵托兒中心，去下附近婦女會機構問下意見
試下排社區保姆，育嬰院服務
依家去問定保護兒童會長全日的n班，報定名希望兩歲有得入去讀。
明白單親媽媽好多問題迫到睇唔開，但帶bb來呢個世界，你都係想佢健康成長。
到最後如果工人要走，你要返工，可能短時間長放親戚到直至你找到新工人/排到其他託兒方法，小朋友適應能力好強，轉新環境前同佢哋講下傾下，有心理準備就無喊咁多。
首先找社署跟進，可能有公屋可以俾你。
如果可以，住係家人屋企，你暫時唔返工，直到bb返學。
2個讚
聽過單親有恩恤特快上樓
係，不過講明唔一定得。我個朋友因為有樓（家人層樓有佢個名），所以申請唔到
有老公未離婚應該都唔得
唔好理得唔得，開咗case 先，
想自己湊就申請綜援，唔好怕，呢d 錢係幫你哋有需要嘅人。
Bb 返學先試吓搵嘢做，再調整一個適合自己同bb 嘅方法。
BB 需要你，當諗埋一邊，記得搵人（可能係肯幫手嘅親戚）睇住自己同bb，千祈唔好做傻事。
母嬰院已經察覺到你嘅問題，有冇refer d 機構幫下你？
4個讚
問呢家間公司幫到幾多，例如轉pt
工人走就算，絕情d你都預你同呀b既planning, 多過個工人，衰d講句無得揀我都會搬細屋，多過問人借錢租屋。
你老公個度仲可以r到幾多錢幾多人幫手，包括佢本身收埋既錢，x養費，r佢屋企人掟煲費（無錢唔比見孫，or賣慘）。係呀好絕好樣衰，為左你同b都無辦法唔where爛面，幾多個錢就r幾多。
講到最後，你仲有幾多錢？係香港呢個物價高既地方唔返工可以捱得幾耐？
比著係我，我有機會破斧沉舟帶b去英國遠離傷心地，同埋比佢更好教育。反正呢家係香港都要重新適應過，咁點解唔去一個好d既地方？既然都要搵資料，索性直接搵移民資料lor.
為母則強！
3個讚
面對現實啦，揾到人湊仔可以去返工已經萬幸，我以前都係放假先湊仔女返屋企，香港好多人要揾食都係咁，否則你冇工返冇收入攬住個b仲大鑊
5個讚
找網上在家工作， 唔使用咁多錢請人湊b
叫健康院轉介見政府社工,問社工可以俾到咩SUPPORT你
最好就睇吓可否叫佢REFER快期入育嬰院,入到你就可以搵PART TIME~冇咩技能反而冇包袱,做吓侍應/SALES…如果可以再申請埋綜援
社會福利本來就係幫我地渡過呢啲情況,希望你盡快搵到出路
2個讚
既然都將會無工人（宜家疫情下再請太多變數，唔好彩可能一攪要攪好耐，無謂受依啲折磨喇）。多口問樓主有冇娘家？如果無，真係疊埋心水quit咗份工拎綜援排公屋，因樓主宜家做重要，係照顧自己情緒同個bb先，如果你本身已經有健康院精神科姑娘跟緊，可以叫佢轉介社工俾你，到時睇下有咩資源再一步一步諗方法，到佢返學，先再諗出嚟工作、請工人啦。
搵社區保母幫手
我聽過有退休姨姨做，好俾心機湊㗎
你要加油！關關難過關關過
多謝你地⋯母嬰院refer左俾社工囉⋯社工淨係話同你先生再傾下啦⋯又係同我講睇開啲啦⋯俾個熱線我叫我有咩搵人傾下⋯但佢俾錯電話我俾左1823囉⋯
我生之前同婆婆住，我諗住問佢可唔可以俾我返去住囉⋯媽咪話我老公靠唔住，佢想做野，喺我有咩事頂唔順可以幫我⋯但佢越幫我我越心痛⋯咁大個女仲要靠佢咁⋯
我冇哂積蓄喇，仲幫件垃圾借左10萬找loans，每個月還緊$5000，我綜援搞唔掂⋯
佢屋企人唔幫手呀，bb一歲佢見過3次咋。我都因為錢同佢地嘈到反曬面⋯佢同我講老公自己揀冇得怨⋯就咁將件垃圾掉俾我要我養埋佢⋯
不過其實我應該更正返，我唔係單親媽媽，我係未婚媽媽，佢地一家人$1禮金都冇俾過我屋企，我地搬出黎都係嗰件垃圾得罪我婆婆，所以焗住要出去住⋯全部人好似都要逼死我咁，我家姐又成日賴關心咁問我狀況，逼我面對所有野咁，又無啦啦借錢俾件垃圾之後好似貪好玩咁3日唔埋2日追佢還錢，佢一追件垃圾數，件垃圾就黎問我借錢
2個讚
唔好意思想問多少少 知唔知除左保護兒童會有冇其他？因為佢啲地址我出去都好遠，公司都唔近呢頭，我想可以快啲接到佢
你住同做野係邊一區？
我以前搵過育嬰園資料 都大概知道每一區邊度有
唔方便講可以pm我
另外 BB係20年出世？不如報埋N班先
如果你未婚，只要你租約上無條佬個名，就當單親。你社工 hea 你，你不如咁，直接拎銀行戶口簿（無積蓄）+身份証，直接去社署登記
覆診要求睇心理＆精神科轉介，你定期覆診
唔好諗返工，你有 bb 要湊，都有問題。你去左社署先，同社署同社工講無聯絡
如果唔信，你去民政署宣誓，阿 b 撫養權你攬上身，帶埋上去。佢哋會幫你搞
當然，你想返工，最好搵社區保姆，社署網頁有
7個讚
未結婚就斬纜啦, 連離婚手續同時間都慳返。
睇得出你好錫BB為佢諗好多野。如果屋企人肯幫手嘅, 去依靠下佢地啦。你同BB安頓好之後, 好快就可以重新出發。
社署呢度有育嬰院資料, 但係基本上排好耐, 入N都未必有位。所以你要社工幫手轉介先會易啲入到。好似其他SIS咁講, 直接去社署睇下可以點啦。
https://www.swd.gov.hk/tc/index/site_pubsvc/page_family/sub_listofserv/id_childcares/
5個讚
人與人之間嘅其中一個可貴之處就係人可以互相依靠、扶持。
如果真係有需要而又有人/屋企人可以幫手的話，千祈唔好怕煩到人而唔出聲。
喺最困難嘅時候有人扶你一把，到你有能量嘅時候，你就做扶人嗰個
11個讚