香港有好多地區報，又有好多地區fb group，又有好多屋苑whatsapp谷，住個區就會知。
不過唔會係地區谷講自己係SEN家長，都唔係好想人地知。試過自己唔介意講出黎，但街坊覺得好尷尬，又話小朋友可以大過會戒意。而且呢d谷主要做團購，講SEN一般唔會有好多人和應。
不過各大社區中心搞好多SEN家長聚會，仁愛堂YMCA明愛保良局救世軍之類，幾乎間間都有。所以有心參加就一定找到。
係、所以父母行出第一步真係係好重要。
最了解小朋友應該就係父母本身
1個讚
係、真係就算屋企經濟一般
要揾係一定會揾到支援
要書可以喺圖書館借
Fb又會有唔少人開live分享
係、我都比人話過我自己標簽左個仔、所以覺得佢啲行為中。
連我老公都講過類似嘅說話。
類似啊，不過無咁Pro，都係WHATSAPP GROUP同一兩頁嗰種社區報
係香港有SEN支援真係好幸福，所以家長有懷疑就應該要盡早去睇醫生做評估，唔好錯過黃金治療時間
次次我見到家長唔去睇醫生，我真係好心痛，害左個小朋友
1個讚
如果你係教育工作者，你試吓唔好叫啲家長帶小朋友「去睇醫生」，可能聽到「醫生」兩個字已經過敏咗，以為你講緊小朋友有精神病，所以要「睇醫生」
你可以話帶小朋友去見下教育心理學家，睇吓學習上會唔會有啲咩問題，做啲評估，如果真係有發展唔理想，會轉介去做一啲訓練去改善學習情況
實際上，去協康會/耀能呢啲ngo做評估，都唔會係由醫生去做，而係由心理學家做嘅，所以話去「睇醫生」都唔準確
1個讚
我又試下咁同屋企人講，睇下幫唔幫到啲小朋友
我同佢地講不如去做個評估，反正都係學校做，唔洗錢，有專家幫手睇下好過係屋企單打獨鬥
有d我直情講你小朋友有可能資優，去check下睇下點幫佢，咁樣佢地會容易接受
但有部分根本唔肯承認自己小朋友有SEN，但明明自己都唔認識SEN
到頭來小朋友最慘…
2個讚
我識得人唔比學校做評估
話咁樣會開左file有record害左個小朋友
叫佢轉校（只係勸佢轉隔離間學校、個家長自己都識講呢間學校輕鬆好多）
又話唔想小朋友再適應、最慘係仲要同細佬妹繼續報家姐讀得辛苦果間
最後全部小朋友交唔到功課、測考又個位分
完全唔明點解會咁諗
我小朋友6月左右K1時老師都建議做評估，有ADHD 徵狀，坐唔定又鍾意郁黎郁去，我填form交去健康院，等到11月頭見完姑娘話要排15個月。而家K2老師又話佢有坐定，係有時控制情緒差D，我都唔知仲出唔出去搵ngo私人評估？定等政府？你哋小朋友幾歲做評估？我睇過D文章話要6歲升小學先會比較明顯評估有冇sen需要。
情緒控制差都不能忽視呀
確實係去到5/6歲先確診會比較準確，甚至乎有啲精神科醫生係唔會幫6歲以下小朋友做評估
但其實做評估唔代表即刻確診，可能只會評估為有adhd傾向，但就已經可以開始做訓練，改善行為，因為越細個開始教佢，就會越容易有改善，所以成日講唔好錯過黃金期
至於你話做唔做評估好，咁要視乎你經濟方面係點，就算向ngo做都要幾千蚊，如果經濟許可咁就做啦，萬一check到有adhd傾向，都可以即刻做訓練，如果check到係正常，咁自己都安心啲啦
至於政府果度，等得耐唔緊要，唔洗錢嘅咪等吓囉，如果你唔考慮自費做，咁政府果度就梗加要排去做
2個讚
另外講開情緒問題，有個case想分享
朋友個女情緒有問題，k班時可能仲細都仲控制到佢，但大大吓就好情緒化好暴力
而家讀緊初小，發脾氣時會掟爛電話ipad，試過家長抱起佢比佢連打咗廿巴，又會講埋啲難聽嘅說話話父母
我哋啲朋友已經講過好多次，小朋友有問題要去做評估，佢父母都知有問題，經濟環境亦都ok，但係就唔知點解要逃避唔去做
而家初小都咁激動，真係好難想像到青少年期會點
想知出面嘅評估係唔係都只係同父母做問卷？始終覺得見小朋友一陣，究竟評估有幾準確
我其實已經當佢有ADHD，所以會帶佢出去多D玩，消耗下體力，暫時都好似ok，起碼係學校可以坐定定。另外，自己又會睇D書，再諗方法自己同佢train下，做到幾多得幾多先。情緒真係最難攪，而家經常喊同扭，好似變返BB咁，已經有預早同佢講要離開或者玩完，到真係要停就會大喊話想玩多一陣，，每次都有解釋前因後果，但依然重複好多次都係咁，佢識表達自己點解喊或者唔開心，但點可以拎佢明白適當嘅時侯要停。我唔知可以點教佢，又唔可以叫佢唔好喊，只可以等佢喊完再同佢解䆁，呢D會唔會再大D會自然明白
想問吓情緒控制比較差可以做啲咩/睇啲咩去幫助佢？
我仔都係SEN, 而家4歲, 2歲同佢番Playgroup就發覺佢同其他小朋友唔同, 唔鐘意理人, 所以就開始搵資料睇, 2歲2個月就搵私人(臨床心理學家)做評估, 確定有自閉症普系障礙, 攞住份報告就去排社署, 入咗紙幾個月就有每個月6節的訓練, 之後再派到E位, 期間keep住做私人訓練, 再加埋家居訓練(疫情攪到啲訓練停曬). 而家就入咗特幼
其實小朋友有呢方面困難, 家長第一時間係好難接受, 但唔正視小朋友的問題會害咗佢. 我成日聽到人話’男仔講嘢係差啲’, ‘大大下就會冇事’, 我都想, 但我唔信囉. 見到阿仔有進步, 個人又開心咗, 開始多番啲嘢講(雖然都係1999 
), 到第時入讀普通小學(因為智力正常通常都唔會派去特校), 我都冇咁擔心
依家仲有呢個觀點?
我小朋友之前做私人評估, 會睇小朋友表現同反應, 都會問家長問題(問卷), 有時評估真係睇小朋友嗰一刻的表現, 所以話準唔準就好睇情況, 但做評都係為咗攞到份醫生報告, 去排社署服務. 上訓練除咗係小朋友上, 家長都學到點幫小朋友做家居訓練. 我有時都好迷惘唔知點教, 同訓練中心啲社工同導師傾下, 個心都會定啲.
1個讚
小朋友而家讀緊k? 咁喊同扭計都正常呀，好多小朋友都會，咁細個佢又唔會聽你講道理
除咗呢兩樣嘢，仲會唔會有啲好激動嘅行為？例如會踢嘢打人，如果無嘅可以觀察下先
睇吓個嚴重程度，有冇影響日常生活，返學會唔會好情緒化，甚至乎會傷害到人/物件
如果小朋友只係容易喊/扭計，咁可能未去到需要向外求助
BB出世開始就係靠喊話比父母知佢嘅需要，到兒童階段，佢哋仲未好識完全表達自己，亦都唔能夠完全理解大人嘅道理，所以仲係會用喊/扭計嚟表達需要，慢慢大大吓就唔會成日喊架啦
如果真係想知多啲小朋友情緒問題，可以搵啲相關書籍睇吓，睇書係好有用，有好多書都教點樣同小朋友相處，比向呢度三言兩語實用
1個讚