【好多字見諒】 
大家好，我有一個認識約十八年舊同事，佢細我約十年，當年佢係我下屬，但我先離職後一直都保持聯絡。佢性格比較火爆、固執及自我，工作當年都成日唔聽話，我都一一包容佢。有時同佢出街食飯等位，等一陣就發脾氣。試過有次一齊出去影相，影完我特登就佢，一齊搭車去佢住果區晚飯，我就自己搭車返自己果區，佢都可以無端端發脾氣，話點解唔影相果區食? 但我解釋話當時時間仲早，點食得落晚餐呀? 
直至現在大家都經常聯絡，約十年前佢失初戀，之後可能大受打擊，有些少抑鬱問題，同埋好少事都易抆。佢做每份工都同同事唔夾，基本上好多份工都做唔長，又係成日同我呻 !
不過可能以前我仲叫後生，叫做仲有精力陪佢 MSN 吹水，直至發展到 Whatsapp，大家都時常吹水 ! 佢打字係用九方非常快，而我自己用速成，友儕之間都算最快，但我始終年紀比佢大，工作及家庭責任比佢多及重，雖然我都未結婚，但都要照顧年邁父母，唔係好似後生單身咁，無拘無束陪佢吹水。而佢只同母親住，而佢母親年紀不比我母親大，自己暫時亦能照顧自己，所以佢喺工餘非常空閒，成日 whatsapp 搵我吹水，約我食飯或踩單車。
不過佢一朝早返工七點幾、食晏時間、或收工後一得閒，就不停 whatsapp 我，不停分享無聊事，send 好多 forward 嘢俾我，最慘就係要【已讀即回】，否則就會唔開心，或問長問短 ! 已經俾佢煩咗近十年，鬧又鬧過、話又話過，鬧完冇聯絡大半年都試過，諗住一場朋友唔好因為咁而斷聯，有時佢搵返我先，有時我主動搵番佢，但一聯絡返佢就故態復萌。
事實上我唔介意同佢外出，因為用口講唔夠打字集中精神咁辛苦，始終年紀漸長加上心態唔同，已經唔想成日對住部電腦打字。佢打字好快，但有一樣我最頂唔順，就係一句分五六句連發，有時我做緊嘢或等緊重要電話，一聽到手聽連續 whatsapp 鈴聲通知，我就會好抆好煩 ! 佢永遠唔會一句打十零廿個字，中意諗起乜就幾個字逐次戥，變成簡單一句佢分成五六次發!
佢今朝返工重覆 send 左個截圖俾我，係尋晚已經 send 過，佢可能唔記得又 send。另佢又成日心軟好多人問佢借錢，當然有部份就唔還影都冇、或連交代聲都冇，佢就截圖俾我及不斷打字呻 ! 因我今早要處理屋企事，睇完個口訊冇覆佢，佢十二點就質問我，問我係咪瞓到十二點? 果下我就俾佢撐著回覆話：『吹水唔一定要即覆，唔通我一定冇嘢忙咩? 
』
話哂十幾年老友，但大家唔好誤會我地係 gay，真係舊同事兼朋友而已。可能我年紀漸長，真係唔太中意長對電腦打字，已經唔係年少時網上同女性，由朝打字吹水吹到晚都得 … 果種衝勁，加上人大咗好多事都要處理，要照顧年邁父母其實都好勞累，又要兼顧返工、買餸、及煮飯，餵食老人家等等，繁忙程度真係唔係一個、單身人士可比較，但無奈對方好似點極都唔明，真係有時都會令我歇斯底里，好難頂發脾氣 !
今次都係公開呻下，亦都冇諗過同佢絕交，因為佢始終都係一個善良既人，希望大家明白! 但如果有高招可以指導下我，希望各位俾下意見。始終旁觀者清、當局者迷，謝謝大家費時間睇咁多字! 
6個讚
首先WHATSAPP呢D TEXT MSG就係等人得閒先睇先覆, URGENT嘢應該打電話講
你朋友可能有強迫症, 你要就佢都要合理, 有乜可能要求人已讀即回
講到打字唔夠快, 你可以用語音識別打字, 咪唔駛自己打
6個讚
whatsapp關閉已讀標記
令佢唔知你read左message
再mute埋佢, 唔駛下下嘈住曬
等你得閒先覆
12個讚
慢慢打字，唔好急。
你養大了隻怪獸。
對住佢嘅msg至少等半個鐘再覆。
11個讚
佢幾十歲人好難改變到佢架啦 你改變你自己既心態先啦 想覆就覆 唔得閒咪由佢 唔洗咁在意佢會唔會發脾氣 等佢慢慢接受你係咁樣回覆msg既習慣
4個讚
佢唔止呢樣嘢， 脾氣、同同事唔夾⋯⋯都睇得出佢成個人有問題。
有冇試過心平氣和攤開哂嚟講？
如果佢世界得返你一個，好難搞。
3個讚
其實佢都真係冇得改，以前跟我做嘢老闆話要炒佢，我極力同老細請求留佢，之後仲加佢人工，因為我遲下預咗辭職，唔想個部門少一個有經驗既人，亦知佢當年廿零歲年少氣盛，搵工做唔係咁易。亦試過佢射波後我冇報上去，照當佢有返工。十幾年後同佢講番，佢話絕對唔相信 ! 
之前屋企老人家病危，要密切悉心照顧，當時仲可以醫院探病，每日要煮定嘢食，下午及晚上去探已經夠忙，佢明知但好似唔知咁，仲係不停 whatsapp，send 好多無聊嘢例如 Youube、新聞及留言吹水，當時心情已經唔好又忙，就真係自己都爆煲話咗佢，但唔算嚴厲只係話冇心情吹水，之後都冇聯絡半年。半年後佢又主動搵番我，傾傾下又係剎唔到迫力咁，早中夜都不停 whatsapp，呢種事十幾年間循環輪迴 … 唉! 
2個讚
如果覺得攰不如MUTE佢半日先啦…
同埋樓上咁講, 用語音輸入你會輕鬆少少…
佢SEND得咁快都未必係自己手打架啦…
2個讚
其實我打速成快過好多人打倉頡，及準過語音，只係真係唔係成日有心情、及空閒覆佢，但佢又好飄忽成日 whatsapp 我，之前已經 mute 左佢一段長時間，又特登唔即時回覆佢，但之後又有一輪得閒，有兩日覆左佢吹左一輪水，呢幾日佢又不停呻借錢俾人，佢係果種唔想借但又唔識拒絕，借完又不停呻果種人，最難頂一句分五六段連環send出，部手機一聽到不斷響，就知一定係佢，有時真係好煩厭!
咁不如長MUTE, 你有心情覆佢先問個wtsapp來睇啦 
3個讚
我自己又係衰既，好多時又係於心不忍，因為佢除左煩之外，份人其實都係幾好，試過我大病入醫院時，不時探我及買嘢俾我，所以我都唔想 Hurt 到呢個朋友 !
其實我都同佢一擔擔，佢心軟借錢俾人呻 ! 我就心軟唔想長 mute、或長期唔回覆佢咁衰…唉!
我自己都有好幾個朋友係咁，有時已讀不回（其實係我用緊手機工作緊，唔小心click到佢段msg，但未得閒睇內容），最慘係鍾意一件事分幾十句句子咁send，一啲會質問點解唔回覆，一啲就賣悲情喺度自怨自艾無人理佢。
我會話佢知我其實都有自己工作要忙，通常佢地講嘅嘢都係千篇一律，我係佢每發幾十句我先會回佢一句“哦，明白”就算，唔值得花時間去覆。
2個讚
我同你情況一樣，我自己份工作都要收客人 whatsapp，有時忙緊公事，真係邊可能得閒覆無聊朋友丫 ! 但有時生意唔好，又想等客人 whatsapp 落 order，點知又係呢位朋友連珠炮發，果下抆到自己都好嬲 !
A_lcy
19
你又唔改，佢又唔改，佢繼續呻，你又繼續呻。
呢種負能量唔係人人接受到，而我覺得你吸收佢太多，影響埋自己，遲早變埋同一類人。
10個讚
其實我自己都好怕咁，
我有一個舊同學，
已經絕左交，
無聊既時候太中意打俾人唔講嘢。
或者駁線去其他人屋企。
你一收線就會不停打俾你打到你接。
有時候會三更半夜打俾你唔講嘢。
身邊識佢既人都怕左佢，
半夜要掛起電話之類。
1個讚
封喇