有個識於微時既朋友，公屋仔出身，但今時今日已經年薪幾百萬。不過佢根本唔識點做有錢人，最多請下工人同買間屋，之後仲係有好多錢剩，佢攞曬去投資，唔買野。佢日日嘆氣，生活好唔開心，佢全家都唔好物質色慾，反消費主義者，堆錢根本換唔到快樂。
我睇唔過眼，問佢人生想要咩，幫佢諗下點用錢買到。佢話
- 唔想返工辛苦
- 想小朋友成績好D
- 想多D同老婆單獨旅行
======================================
1. 唔想返工辛苦
應該好易，佢計過數，即刻遲職，都養到全家40年。但佢雖然返工辛苦，但點勸佢都唔肯辭職。chok左佢好耐，原來工作用黎證明佢人生既價值。
咁我提議，換份he工羅。但幫佢選過好多工，好多工好賞識佢，但都俾佢推曬。原來佢覺得，換一份俾原來工作少錢既工，會好無面。除非份工可以令佢增值。
經過多年努力，終於找到一份咁既工，底薪係原來工作既1/3。臨轉工，佢又開始拗底，話怕咩家庭有經濟壓力
我真係罵左佢一餐！！！！你咪一早計左數夠退休羅！！！做啦你！！！
======================================
2.想小朋友成績好D
佢小朋友成績好差，試過找貴私補，無用，因為佢地剩係識得教叻學生。幫佢sourcing，終於找到d有愛心既補習老師，稍為幫到手，指到個方向。不過都係未夠。
嘗試過找傳說中既家庭教師，不過大概要有人介紹先得，佢呢d暴發戶無人脈，根本識唔到。
之後佢老婆辭職，親自教小朋友。成績立即有進步，至少唔係包尾，都合格啦。真係幾貴既補習老師都代替唔到媽媽。
然後選學校，名校就唔收架啦。見到d好貴俾錢就收既學校，但裏面全部大陸富二代，對小朋友係咪真係好呢？我有講笑話，不如你自己開間學校，咁間學校一定要收你小朋友啦。不過現實上佢真係唔識呢d異世界既操作，無人脈知識都係做唔到。最後佢地都係選左間細國際學校，唔貴，不過師生比例低，同埋肯收差學生。好似有d起色。
======================================
3. 想多D同老婆單獨旅行
唔計疫情，我本來以為這個有錢就得架啦？點知佢地無時間。佢老婆要睇著小朋友，唔行得開。有工人架嘛？大不了咪請兩個工人羅？但小朋友只有媽媽先看得著，而且丟低小朋友去旅行，小朋友會投訴兼變得唔聽話。
咁退而求其次，帶埋小朋友去旅行啦？但旅行湊小朋友好辛苦喎。咁帶埋工人羅？但小朋友唔係太肯跟工人。同埋！要俾錢工人去旅行，覺得唔抵。
咁俾錢嫲嫲去旅行湊孫啦？點知嫲嫲一話去，四大長老都話要去。錢唔係問題，問題係行程設計要大改，遷就老人家，結果達不到原來既目的…
咁帶小朋友去托兒酒店啦？於是佢地去左兩次clubmed，但唔去得太多次。因為間間clubmed大同小異，clubmed又係好偏遠地區，好難去到各大名勝。小朋友亦不是太喜歡clubmed既托兒活動，都係想同父母玩。
最後朋友都係俾多D甜品（免費，公司包既）老婆，佢老婆又subscribe d music app(40元一個月) relax下，等佢湊仔落力D算。
======================================
結論：窮人真係有左錢都唔識洗
5個讚
其實唔係窮人唔識駛，係你朋友心態問題，同埋駛咩搞咁多野，移民已經解決晒。
移左民，小朋友讀書成績唔再係問題，因為根本無人care,咁佢老婆又唔駛一定要𥄫實小朋友，你朋友又可以係新地方搵自己興趣
16個讚
佢一日仲做佢份辛苦工就減唔到。佢份人好儘責，叫佢he做好多次，佢話會架啦，點知公司爆鍋佢又忍唔著去幫隔離department 手。幫都唔緊要，幫完又要係度怨辛苦… 
睇完。樓主你人真好，你朋友應該知自己問題，但佢唔想改變，完。
樓上話移民，非常同意，唔知朋友點睇。
4個讚
佢未來係會移民，呢個又係一個大問題。英國社會比香港公平，大概有更多買唔到既野 。
佢小朋友成績太差，入唔到私立學校，都係要選擇普通state school 。佢小朋友成績差到香港國際學校都唔係好應付到，所以去到英國state school 都未必得。
英國仲要無咩補習社，無工人，佢地去到真係更加無時間。
佢無時間，叫佢捐錢就得，但無時間做義工。時間又係一樣好難用錢買既野，佢剩係識的士出入，去到英國買車，同埋買野送貨上門。我都諗唔到咩計省佢時間。
我真係想將佢d錢捐曬佢，等佢財散人安樂算。
我係唔抵得世上咁多人唔夠錢洗，點解我面前有個有錢係度怨既人姐。
移民佢會，但上面po提到有新既問題，不過到時佢再算啦。
我提議過，叫佢開間公司，整個經理位俾佢小朋友將來大個做，學下人生經驗。不過佢讀書人，好睇唔起呢d手法。
1）辛唔辛苦自己覺得既啫，日日坐係公司冇嘢做都係辛苦。
2）點解要成績好啲？面子問題？讀到書唔等於係good guy, 呢啲真係逼唔到，生過個囉。
3）小朋友上到中學就得，幾年都唔等得？
唔係唔識洗錢既問題，係佢庸人自擾。
3個讚
其實你朋友唔係唔識使錢，我覺得佢係睇錢太重。
例如去旅行，委託旅行社帮手設計自己喜歡嘅行程。安排埋導遊，司機。要咩行程都有得傾，最緊要係有錢俾
1個讚
呢邊大把印籍、華人請私補。
住名校區，就會有呢啲需求同供應
2個讚
哈哈真心，呢個係我其中一個最大想移民嘅原因。
我覺得係你朋友嘅心態問題，就算佢窮定有錢都唔會開心。
momok
16
咁首先佢要搵到佢自己嘅興趣先，唔通為洗錢而使錢咩， 洗錢首要就係要洗得開心同值
2個讚
點會冇工人冇私補、只係貴啫 
想知你朋友點由公屋仔發圍多啲、、夠勵志
其實佢去到咁上下階層、就會有啲奢侈既娛樂/門面野架喎、都要應酬下架嘛
佢搵到咁賢淑既老婆真係難得
一句講哂其實佢份工返得唔開心, 但係又唔識生活。我出來做野先知原來我家兩老人工好高, 但係完全唔會買名牌或者大洗, 放假最多去做下義工同行山。
直到我差唔多大學畢業, 佢地就退休先開始周圍去旅行, 玩單車。但係咁樣都只係洗緊面果浸。 
你朋友可以SUPPORT到老婆做FTM 已經好好啦, 又有工人, 即係家務負擔都冇咁大。投資部處完咪可以去揾下second life, 揾D興趣囉。唔識洗唔係問題, 最緊要識令自己開心。可以試下做下運動先, 個人開心D, 自然會想追求其他野。小朋友讀書就算啦, 有錢洗咪諗咁多, 讀得唔好咪去玩課外活動囉 
3個讚
佢真係唔係好知自己想要咩，由細到大剩係俾佢父母教佢搵錢，佢自己既願望就只係識女仔。結果而家有錢有女，佢就唔知自己仲有咩目標。
我用問題引導左佢好多次，佢口話想提早退休，但其實工作對佢心理又好重要（佢媽教落，人應該一世搵錢）。佢話想he返工，但公司一有事就忍唔著出手，明明其他同事都唔做（佢媽教落，做人要有責任感）。我諗男人大概係需要成就感，加埋佢有責任感，兩樣野令佢返工辛苦，但又唔想辭職。
佢老婆賢淑嘛… 應該話係佢都係公屋女出身，根本唔識享受錢。佢老婆最鍾意既用錢方法，係捐錢俾慈善機構/黃店，咁當然係好事黎既… 不過老公成日係度怨，都影響到佢。
奢侈既娛樂/門面野… 就係佢地無受過呢d訓練，完全唔識應付。先生做金融IT，呢行唔洗著名牌，佢講下投資和IT就和同行相處到。不過一講生活品味既野就會錯誤百出有笑料
老婆唔著牌子衫，小朋友又唔係讀名校，同上流社會缺乏話題，所以無咩上流社會朋友。佢都係隱瞞身家，過返佢原來既生活，不過有時俾人問「讀國際學校好貴喎」時，就要扮曬窮話「係呀，好貴呀，不過為左小朋友無法啦」
呢個朋友發圍，明顯和佢既「人生來就係要搵錢」「要負責任」性格有關，溝通叻IT又勁既人真係少見，仲識曬兩文三語。為左工作佢願意丟低女友去某國大公司做，人工跳級，佢女友又肯同佢long D同嫁埋俾佢。該大公司排頭勁，返到香港轉工，人工又再跳級幾次，最後跳左去行內出手最勁個間公司。
by the way，呢間公司長期請唔夠人，好多人搵夠，未夠40就退休。如果大家自認IT勁，和老外英文對答如流，有金融知識，大家可以留意下。不過有咁勁既人都應該移曬民，呢間公司睇怕只請到中國人。
3個讚