我今年3字頭，最近同阿媽講想搬出去，佢話唔得，問我係咪咁捨得dump低老豆老母
問我同老豆老母住有咩唔好，問我係咪咁憎佢地，問我係咪唔養父母
又話搬出去晒錢，俾佢洗好過。。。（我搵唔算多，2萬頭倒啦）
其實我又唔係憎佢地，但我由細到大都冇自己一間房，一家六口迫埋一齊
我到大學都係同細佬訓廳，大家姐離開屋企後，20頭先有得搬入房同二家姐share
但間房又唔係大，得一張書檯，我係在家工作人士，但冇得station起間房做野
因為我二家姐好醒訓, 佢夜晚11點要訓覺, 但我成日做野做到凌晨1點半
我d打字聲會令佢訓唔著, 佢就會黑面, 所以我station起廳既飯檯做野
但忙緊果陣父母得閒又會走黎同我講兩句…
人愈大真係好需要空間，我無論想起屋企做咩，父母都唔鍾意
擺個攪拌機起廚房佢地又嫌牙訂，噴下香水又嫌臭，想起屋企畫下畫又冇位，仲要俾佢地白眼嫌晒時間
我真係好想搬出去 
典型情緒勒索
人係有自由意志, 如果真係好想搬, 就搬走啦。
同上，典型情緒勒索
人生係你自己嘅，信我，搬走!
早搬早享受啊樓主
我自己都覺得應該搬走，但我阿媽其實唔係特別衰
佢打理好屋企，煮好一日三餐，買好晒日用品的
只係我覺得佢成日都好依賴仔女，好似成世想我地起佢身邊咁…
計一計數先, 即使搵劏房, 租同水電煤都要幾千, 唔想比父母話「講中你唔想養佢地」, 原本既家用又唔可以減少, 如果計得掂就搬啦, 人大左都要有自己既空間.
我都想趁搬出去，可以做多D自己想做既野
例如畫下畫咁，因為我唔敢起屋企畫 
使乜理佢哋，你係搬出去佢哋會斬你？
講到尾佢哋為自己為錢唔係為你，你工作搵錢比自己過好啲生活，佢就要連你辛勤工作嘅成果都奪去
早走早著
我阿媽對住我哦足二十幾年都冇我符，因為我唔會比佢要脅，佢愈哦我愈走，佢最後放棄
我最勁試過講一句：我係唔跟你意思做，你可以殺咗我囉
搬 但都要坐低 話佢知你仍然好關心佢同會不時返吓去
我都明呀，但我計過家用可能真係要減一D…
我睇過劏房，環境好少少都要6000幾蚊
4000幾5000蚊果Ｄ唔太理想
因為我自己一個女人，雖然唔係咩天姿國色，但都有D驚
而家我諗緊同人合租，好似平好多呀
我又唔想激親佢，因為佢照顧頭家都好努力既
只不過佢真係依賴心好重
我最卑微既要求，就係好想要自己一間房…
除非你有相熟朋友，否則多dd錢買空間同方便絕對值得
好聲好氣同佢講完，佢唔明／繼續嬲就算
人生係自己既
覺得你搬既理由好合理，咁壓迫既環境，唔搬有機會搞到情緒病
同人合租會唔會好煩？ 我覺得租套房好d
我有講會返去，但佢話想起屋企見倒我
我都好想可以獨佔一間房
但因為仲要俾家用
仲要儲錢幾年後結婚
所以想慳得幾多得幾多
好似你咁嘅年紀果時我係出面租咗個劏房，之後續少續少咁搬咗D私人物品過去，每日放工都好夜先返阿媽度，過咗一輪我就同阿媽講我出面租咗地方住，開頭佢都好唔鐘意又喊又嘈，後尾妥協咗咁就正式搬出去住，佢覺得既然我都攪得掂又明白屋企地方太細
我都知有可能會遇到ｄ唔太好既室友
所以都係嘗試下搵，搵唔岩都唯有揀返套房～～
其實我覺得自己已經有少少情緒問題
未到好大件事，但每個月都有一次anger issue
睇下邊個起我身邊，邊個就要受我氣
我發完脾氣又內疚，又辛苦左身邊既人
同男朋友一齊計劃下？同男友夾好過同外人，而且可以試到一齊生活有無磨擦（其實必定有）