我同奶奶住附近
我大半年前生左bb
生之前同佢關係唔錯
而家都唔係差既，不過我有d不滿佢經常質疑我湊仔嘅方法，想呻下
自從我生完，基本上佢日日都會黎睇阿b
我初頭覺得無所謂
到生完成日見佢我就好大壓力，唔太想佢接觸我個仔
例如我埋身人奶，佢平時見阿b一喊，就問「係咪食唔飽」「係咪唔夠奶」。我同佢解釋好多次喊唔一定餓、餓我會再餵、人奶會易消化易肚餓，但係佢都係好似聽唔到！
重複2百萬次問「係咪食唔飽」「係咪唔夠奶」，我因為咁喊左好多次，覺得佢好「尋」，唔聽人講，又成日質疑我d奶。
初頭啱啱生完，係屋企個廳埋身餵緊人奶，但係佢會成日自己開門入嚟睇BB，跟住我即刻抱住阿B走入房。佢話「大家都係女人，怕乜嘢啫」，我尷尬解釋，其實咁樣我會好大壓力，俾人赤裸地睇住自己身體（同埋驚一陣佢又話唔夠奶），但係佢都仲有幾次係咁。再講多幾次之後呢，佢有打電話俾我哋，通知聲先過嚟我屋企。點知又有一次，佢又好心急想睇吓B，我又係餵餵吓人奶，聽到鐵閘聲，搞到我即刻仆返入房。佢竟然話頭先有打俾我，不過我冇聽電話，所以佢自己過嚟。咁我就嬲嬲地，但係都忍住道氣講俾佢知，我冇聽電話梗係忙緊啦。自此之後我就反鎖度鐵閘。之後佢可能get到，過嚟之前都會先打俾我哋，或者我返咗工日頭我唔喺度佢先會過嚟。
佢又成日用佢嗰套，覺得一定係咁，或成日講「我以前唔係咁嫁喎」「三家姐（我三姑奶）唔係咁湊」。自問我虛心學習，但佢經常不斷每一樣野都咁講，我覺得好煩。唔係大是大非既事，點解一定要跟？例如佢另一個孫10pm訓，5、6am飲奶，我個仔有時可以訓到7,8am先飲，佢就會好擔心，話餓親佢個孫（我好憎呢個term）。佢問我工人阿B晨早第一餐食幾多，工人答佢240左右，跟住佢就話「咁咪係囉，食咁多一定好肚餓」。我真係好無奈，正常一日第一餐都會肚餓啲啦，同埋其實我個仔餐餐都係240左右。加上嗰個係我個仔，難道我會特登餓死佢咩。但我又當傾計同佢解釋我既做法同原因，佢都係不斷重複。我覺得好大壓力，佢走左之後我忍唔住msg佢，當然有禮貌，但明確地表示我個仔身高體重合格，且中上，醫生亦話無需要特登早叫醒bb飲奶，叫佢唔好太緊張，亦請佢尊重我地既照顧同教小朋友既方法。咁佢之後好似好d。
到我個仔而家加固，佢有時會落手幫手餵，我驚佢遲啲會就晒個小朋友，搞到我個仔會唔肯自己食要人餵。點解我會咁諗呢，原因就係我三姑拉個細仔而家已經就嚟六歲，但係都仲要人餵，仲要食緊碎餐。我真係好驚
總括來說，我覺得佢成日太緊張，搞到我個人都好緊張，好大壓力，我婉轉表達我嘅諗法同埋原因，點解我咁做，但係佢唔會直接回應你嘅回答，只會不斷重複佢一樣嘅問題。
另外BB一喊，佢就心軟，乜都就晒阿B，喊一陣都唔得。即刻抱佢，又話「算啦，唔好搞到佢喊」。
我好唔鍾意咁樣，好驚佢寵壞我個仔。已經預視到將來趁我返工，幫我照顧bb嘅慘烈情況。其實佢咁樣做，受苦嘅都係自己，睇吓我三姑拉六歲個仔就知，淨係蝦佢一個。同埋佢咁樣做，擔心遲啲我個仔當晒係其他人係壞人，得佢係好人。我同意佢係善意嘅，所以我從來都係同佢好好相處，不過佢真係講極都唔聽，不斷重複又重複，令到我好大壓力。
但係我冇得避，基本上我個仔日日都會見到佢，而我個個禮拜都會過去佢度食一兩餐飯。
如果佢會改善，尊重同配合下我同我老公教仔嘅方法，我唔介意佢見。倘若佢再係咁，可能我都會強硬少少同佢講，甚至乎唔俾佢過嚟探埋個孫住一段時間，但係我個腦每一日，都喺度不停咁諗，究竟要點樣同佢講先會令我奶奶感受好啲，唔會傷到我奶奶嘅自尊心。
唉
