我唔係控訴我99，但有時真係頂唔順。想搵個樹窿呻下，因為我知我老公幫唔到我D咩。
我覺得我99講嘢係好難聽，定還是我小氣，我唔識得理解她D幽默？
例子1,電視個藝人好肥下，我女話個女人好肥啊。我奶奶就會問我女，你媽咪肥D定佢肥D？我女答電視個女人肥D。我99就話我女，你咁識擦鞋㗎。再有一次，肥媽教煮餸，我女兒聽到6號叫肥媽，佢就好好奇咁話肥媽？然後又有位俾我99上啦，我99就同我女話，係啊，佢叫肥媽啊，你都可以叫你媽咪做肥媽，去啦，行去叫你媽做肥媽啦。然後我女就真係行入房叫我肥媽。
例子2，我煮飯切到手，佢冇關心我都算啦，其實煮飯切到手都好閒，但佢又冇啦啦同我女話，你媽驚你唔夠餸，切隻手指幫你加餸啊。
尊重，我係覺得佢一D尊重都冇。係唔係我唔應該小器介意？因為佢對佢親生女我姑仔都係咁上下，我姑仔有次話頭暈，係屋企暈低咗，得我同佢仲有我女係屋企，我叫咗十字車，救護員嚟到我就準備跟車陪我姑仔入醫院，打電話就叫我99啦啦聲返屋企，幫我睇我女(佢係屋苑商場大家樂食早餐)。點知佢返到屋企第一句唔係關心我姑仔，而是話搞咩啊，麻鬼煩。
仲有我坐月時買漢堡飽俾我當午餐，或者日日用隔夜飯加兩個蛋炒俾我，仲同我老公講加咗兩個蛋。笑我冇奶，話人地食白飯都有奶。我女唔肯埋身飲奶，佢當住我老公面話，可能係我乳頭太恐怖嚇親我女，周圍話自己做得幾辛苦，幾識得湊小朋友。我女細個跟佢出去食嘢，鹹魚又俾，奶茶又俾。
哩D老人家，我唔識講，我唔指望佢對我幾好。我當佢係同屋主，係住客，但有時都忍唔住我老公唔識得體諒我，唔幫下我。我明白佢難做，但我都好難忍。我係覺得我99係蝦緊我。唉，就嚟人都癲。
1個讚
您99把口咁衰！我諗佢唔係特登針對您，而係佢性格嚟！十分八婆
10個讚
係，有時好心up姐。當佢屋企人，佢對街外人都好過對我。
1個讚
你可以笑笑口咁反駁
例子1: 係吖，我都覺得自己肥咗，拉住阿女，我哋一齊做運動keep fit囉(乘機帶開阿女，唔好同阿嫲一齊，等佢自己一條友，無㽼)
例子2: 同阿女講，媽咪隻手指好痛，要女女呵番，估計阿女即刻會去你嗰度，乘機晒母女温馨。
總之，你要同阿女有咁親密得咁親密，估計你奶奶係口賤及有妒忌心嘅人，唔抵得人幸福。
11個讚
日日對住都幾難頂
身同感受
我阿媽把口都好衰，對街外人定對自己人都好衰！我餵人奶唔順佢都會比好多說話我聽，冇奶就話我比奶粉佢個孫食到熱氣（其實完全冇熱氣問題），又話自己當年好容易，一定係我做錯乜先搞到咁，Bb厭奶又話我啲人奶有問題，Bb難湊又話因為似我dna⋯⋯總之由細到大一有少少唔順利都係其他人嘅問題，佢所有嘢都岩哂，又覺得自己好慘乜乜乜⋯⋯
我坐月期間唔敢叫佢幫手，因為一個產後抑鬱嘅人聽到佢嘅說話真係會打開個窗跳落去！而佢只會輕輕一句「講下啫～咁都嬲」
不過So far因為佢係我啊媽，我隨時可以少爆佢啤佢比番面色佢睇，同埋佢衰把口但心地唔差，都好肯幫手，所以我咁多年黎都頂得順佢（但都好早就結婚為左搬離佢）。
但樓主嘅係99，仲要日日撞口撞面⋯⋯唔好話99呢個外人，我每日對住自己咁嘅啊媽都唔得啦！
同埋你99應該係心地差，唔係把口⋯⋯
2個讚
你99應該係口賤，乜都講一餐，睇乜都唔順眼，佢對自己囡都係咁的話，真係性格問題。同住的話，除咗忍，唯有間中暗寸返佢，半開玩笑咁。無能力搬走都冇辦法
我就係EQ冇咁高，每次俾佢講完我都要自我修復好幾日。
最衰係次次都唔知點駁。口啞啞。
個格問題，
佢對姑仔不是好， 點會特別對你好
係啊，我老公都知道佢媽性格係咁，但佢都幫我唔到。我係全職媽媽，同我99日對夜對，我唯有望我之後可以出嚟做嘢，對少D佢。我次次都駁唔到佢，搞到自己內傷，真係驚自己有日爆煲痴線。而且佢成日咁，我覺得有時我女都會跟住唔識得到尊重我。
一百個奶奶有九十九個都係咁
同感
借頭借路又呻下先～
我阿媽都係咁
結咗婚話想生BB，佢會話「你咁大個人自己都未搞掂，生個細路出嚟害死佢」（但我畢業之後已經自己一個人住開咗十年有多）
又話我身體唔好會害到個BB呢樣不足嗰樣唔夠，點知我去睇中醫問，調理身體，醫師話「無野呀，你好健康呀」
到陀B，三個月未見肚就話我好仲著褲唔著大肚裙，會夾死個B
生咗頭段時間埋身餵得密，阿B喊得多，就話「你啲咩阿媽嚟架，忍心個女喊成咁都仲要堅持餵人奶！」（佢仲要讀過陪月課程）
嚟探我同阿B，我哋有自己Routine，我有湊佢嘅方法，佢下下用佢陪月course教嘅嘢嚟「得」我⋯⋯
另外話肥話殘話我無人要諸如此類就由細到大都係咁⋯⋯
我唔明點解你覺得你老公幫唔到你係正常予以體諒
你老公唔使爆你阿媽？咁你嫁比佢做乜？負責受氣？
2個讚
比我，我一定同佢炒鑊金，或者佢講一句我窒一句
指住電視個阿婆同個女講：呢個阿巫老過你阿嫲、但把口冇你阿嫲把口咁賤
下次煮大碟菜，同你個女講：今晚唔使切手指加送，你阿嫲把賤咀搭夠，夠飽
你老公夠膽話你，你即發惡：你老母對我差又唔你出聲？你恰我呀？
我住劏房都唔會同佢住
10個讚
駁嘴係有好多方法及熟能生巧，你唔需要硬碰，只係晒幸福、晒命咁同你99講話，你晒得多，佢會無癮。
駁咀有好多方法，日嘈夜嘈唔係辦法。
3個讚
同意，都唔會想女女學埋呢啲說話方式
1個讚
口好賤…
佢唔識人情世故，唔係針對你，我奶奶都係咁嘅人，唔識人情世故，有時諗嘅嘢好難理解，我即時都有唔開心，不過睇在佢係出於唔識做人，而唔係難為我，亦唔想老公唔開心，就放開唔怪佢。