分享愚見，歡迎反枱
前幾日有個同事喺度訴苦話仔女係頂心杉，佢日日放工做家務煮飯仲要畀佢哋唔好聲氣對待，覺得自己好似工人
我係同事當中最後生未有仔女 ，另一個同事就問我，點解我同我媽咁疏離
因為呢個同事個女開始步入反叛期，佢見我個人正正常常又家庭完整但同阿媽疏到陌生人咁，佢好有危機感
我當時都唔知點答
後尾喺度反省，我估我媽間中都覺得自己係工人，雖然我哋冇鬧交或者頂撞嗰啲，但之前一齊住嗰陣，除左今晚幾點返黎食飯，完全冇其他話題，家務又幾乎唔使我做。而家搬走左更加冇溝通，除左家姐會約食飯我就出現，不過都係各自打機 (我媽打得最勁講明先，我同家姐反而有傾計)
由細到大，我父母冇害過虐待過我，都唔係冇關心我或唔理我，雖然做嘢忙但家長日都去足，能力範圍內少少都畀我學嘢，已經好盡力做好父母角色
我諗咗好耐終於諗通
與其話我當阿媽係工人，不如話佢當自己係保姆
諗返轉頭我媽除咗衣食住行，完全冇理過我哋內心世界
細個病咗佢會鬧我，令我覺得我唔可以麻煩佢，所以中學開始病都唔出聲，第一次黎m都冇同阿媽講
以前參加咩比賽攞獎，佢都會讚，但就睇到獎狀嗰陣讚一句，唔會問我做咗啲咩先攞獎，呢樣野對我重唔重要，我有幾努力，一概唔問
考試無論好定唔好都係一句 繼續努力
問佢攞錢買嘢，睇幾多錢，少就畀，多就唔畀，問都唔問買乜，對我黎講有幾重要
我都講唔出佢教過我乜嘢做人道理
最誇張有一次，家姐喊住打電話返屋企搵佢，我咁啱返屋企開門入屋，佢驚到一見到我塞個電話畀我講
我知比起好多人我已經算好幸福，我明佢父母可能連飽飯都畀唔到佢食，我而家都有養家，但同佢真係friend唔到
我重點係想講，如果唔想畀仔女當工人，首先唔好當自己係保姆
做阿媽真係好難，要小朋友食得飽着得暖瞓得足，仲要畀安全感佢，又要教佢做人道理、理財、性教育、社交、道德等等等等，我諗我都唔敢生
冇人可以100分，但如果唔想養大一個陌生人，要多啲關心仔女內心世界，be more than a nanny
家有陌生媽路過,
無計, 爸早死, 3姐弟
都係㗎
所以見啲呀媽會同囡fd嘅
多數都係呀媽肯走入個囡嘅世界 例如一齊追下星
同埋上一代唔同
睇性格，有啲人天生冇乜情感，點對佢都係咁。
共實肯走入佢地內心世界, 唔係下下得起個長輩款,
佢自然有安全感, 有咩財務問題都唔介意搵你傾, 同佢講性教育唔尷尬,
自自然然唔會識錯人, 做錯事。
所以點解好多人講, 養育一個小朋友, 付出時間重要過金錢。
相信依一代好少人餐餐食公仔麵都仲要生仔, 但係反而好多人返工返到無時間。
好有同感
我阿媽同你媽幾乎一樣
供書教學樣樣足，但僅此而已
我中三已經渴望離家，中六嘅時候晚晚去夜街，完全當屋企係酒店，因為我揾唔到愛
當年最friend嘅係做義工嘅朋友，所有心事都同佢哋講
而我嘅人際關係亦好差，因為屋企無愛嘅榜樣
後來識左宜家嘅老公，佢係一個對人好好亦好受人歡迎嘅人
雖然青春期果時同父母反面，但成長後反而記掛父母；我就由始至終同父母一啲都唔熟，唔會掛住佢哋或者擔心佢哋
我後來同奶奶熟左，終於知道老公點解咁痴屋企人，原來佢父母好愛佢
佢哋一家係基層，佢父母返工時間長過我父母好多，但佢哋放咗工半夜三更都會整仔女鐘意食嘅嘢比佢哋，去旅行會帶佢哋去豪華團，買佢哋鐘意嘅遊戲機。
我阿媽要訓練我獨立（因為係女），由細到大自己訓，自己食飯，無得嗲（我係家姐，有個妹），讀書成績好有得獎，去旅行就返大陸（因為老人家想去，又平啲），唔會理會我哋兩姊妹嘅感受。
久而久之，我都唔會想了解佢哋嘅感受，變咗陌路人…
見到jm唔敢生BB，其實無需要咁灰，有心嘅話一定可以做個好媽媽
我自己有一個仔，但只係一個，唔想因為生兩個唔夠時間陪，而重蹈阿媽覆徹
我當阿仔朋友咁相處，大家平起平坐，我會尊重佢感受時，佢亦會尊重我感受
我特登唔俾我媽湊，而去搵奶奶，因為我想個仔喺有滿滿嘅愛嘅家庭中成長
我自己管教並不嚴厲，但會教阿仔每事有底線
佢好愛父母，同時在學校亦受老師同學歡迎
所以你不用因為自己的背景而放棄生小朋友
至於同自己阿媽嘅關係，我試過修補但失敗
始終都似陌路人
咁唯有順其自然啦
唔…我自己同阿媽關係都幾好。雖然有時會覺得佢好煩,會寸佢, 但係知佢唔開心我會氹返佢。自己估左D咩會知佢係好擔心自己。好記得細個果陣有好多家庭活動, 到而家大左都會想咁同自己小朋友出去玩。
但係到自己做左媽媽, 先發覺做人老母好難, 真係唔係天生就會識。我小朋友得1歲, 照顧佢起居飲食都唔係好有信心。見到佢發脾氣仲覺得自己根本HANDLE唔到, 唔係HANDLE佢, 係HANDLE自己 ge心情 
所以都好明白點解有D媽媽會後退到當自己係工人。同人用心交流好難, 要經過好多被拒絕ge經驗,如果心靈脆弱得好緊要, 可能真係會想放棄, 即使對方係親生骨肉都係咁話。不過我先生照顧小朋友好勁, 點都唔會抆, 兩公婆大家互補長短先KEEP到屋企開心。各位冇信心GE媽媽要加油呀!!
我自己3個仔，到而家我唔再當自己係佢哋媽咪，係朋友咁相處，由細到大我都話佢哋知我唔係工人姐姐，因為你哋請唔起我
，屋企所有家務都分工去做，呢大半年疫情佢哋做嘅家務加埋多過我，亦唔使低聲下氣，清楚講明規矩大家去deal…
我都有同感
我又唔係當阿媽係工人
我亦知道喺佢嘅角度嚟講佢係好錫我
但係真係friend唔起
記得細個都會同佢呻喺學校嘅開心/唔開心事
講開心嗰啲佢就「唔」就算，一啲「鄧」我開心都無
唔開心嗰啲點講到最尾都係我唔啱，我做得唔夠好，可以再點「正能量」之類，總之萬大事就算係我俾人蝦都係我唔啱（「你唔喺嗰度出現咪無事囉」啲friend）
之後就咩都無再同佢講，開心又好，唔開心都好都唔講，覺得講咗都徙氣
再大啲有時見到佢有啲問題想同佢傾，佢就一句二句「依家我係你阿媽，幾時輪到你教我點做」就更加算吧啦⋯⋯
我諗有時人與人之間都要講求緣份, 無論係親人定朋友… 有緣千里能相會, 無緣對面都不相逢…
YES,我都係咁同我女&老公講 
我當我女好似朋友咁,我亦都俾曬心理準備佢,我過幾年會返番工,到時家務全家一齊做~我之前有返PT既,我老公都有幫手做少少家務~
好內心既分享…有育兒既值得睇
我同我亞媽唔會關係唔好，但係我都會當左佢係工人咁洗 
因為由細到大我乜都唔洗做，三十幾年個模式已經set好左係度，唔係突然一日話變就變到。
另外我都明佢地果輩又唔係話好有學識，佢以前做人亞媽果時可能都唔識點教，只係覺得比到既野就盡比。見你遲瞓覺就係咁鬧，又無話有咩理據原因去同你傾。見你買野就係咁話大洗，要草錢，但係又無話你知點解要草錢同埋點樣草。
我都曾經比心理醫生淺度催眠過傾過計，佢話我係屋企入面搵唔到「愛」。
直到遇到我老公，屋企人超級有愛，我就決定我自己既家庭一定要好似佢屋企咁有愛。我唔會覺得話生左仔唔知點教。點教咪就係當原生家庭係反面教材，你想要一個點既家庭就點教。以前亞爸亞媽比唔到你既，當返自己係自己既仔女，換個方式去教。反而我媽而家見到我點教個仔，佢就會跟住點教個孫。等d仔女大d，我都會教佢地要為屋企付出，唔係un un腳坐係度等運到。
有時唔係淨係諗你想人地點對你，你依家係怪責緊你媽媽無俾你要既野你，所以導致你地之間既關係疏離。
任何關係都係2 way既，天下無不是之父母，思考下自己可以點樣係媽媽有生之年孝順佢，想像下自己可以為佢帶來幾多快樂，依種快樂都會令你快樂。
我同意呀，我係天生無乜情感，唔鍾意同人太close （就算同老公都係，越少見面越好，所以我好喜歡佢返shift ，我都好喜歡OT）。我阿媽都係咁嘅人，所以我同我阿媽相處好舒服，我係大時大節先返外家個種，當年仔細阿媽過來我屋企幫手看住賓賓湊仔，都係會係我放工返屋企之前鬆人
，我地見唔到面。我阿媽從來唔會主動打電話搵仔、搵女，我成日覺得阿媽呢種方法好正。我仔已經成年，我都會用呢套方法。
唔一定架, 有D父母真係鐘意得起個長輩款, 淨係聽外人講野, 猶其是重男輕女家庭。
我都係呢種冇咩情感既人，都係因為家庭成長環境搞到咁
唉冇父母緣冇得強求
可能同佢既原生家庭有關，我覺得無必要同父母計較，做人睇開d，先主動付出關心，佢領情就做多d，唔領情就算，咁樣自己會開心d
一句到尾⋯⋯ 緣份