違背咗組織家庭嘅初心，好可惜
5個讚
你覺得婚姻係可以分隔2地十幾年都無問題？婚姻既初衷係咩呢？一個家分隔2地十幾年，就算個個月見都會好淡好淡。唔好諗住老公好愛你就一世都唔會變，人係好易變架，無人可以擔保一生一世愛同一個人，仲要果個人一個月先見一次，咁其餘時間就可以分俾其他人啦。唔好忘記寂寞係可以令一個人改變架。到時無咗個老公只能怪自己。
1個讚
呀媽教落，去邊都好都要一家人齊齊整整！因為我媽係過來人，初初好似ok架，每日電話架，每星期會返嚟架，然後電話都費事聽，覺得煩，反正唔係成日見咁返唔返都無咩所謂，又他鄉遇故知咁有個伴，最後咪就係越走越遠唔再返嚟囉！
6個讚
我覺得唔得…會好掛住
完全係咁樣啦，一家人特別係2公婆一定要一齊架
但冇第三者, 都一樣會感情變淡
根據卅年前，
大量香港家庭移民去加拿大和美國嘅經驗，
丈夫留返在香港工作，
寄錢養活外國嘅妻子和子女，
過一段時間之後，問題百生，夫妻關係淡薄，
例如：第三者、父子關係疏離⋯⋯
1個讚
唔可行…果邊讀書真係咁差嗎？香港都唔係好呀，可以請補習老師嗎？
本身唔想開account，但又想多事勸一勸你，所以都係開左個account.
我就係有兩年以上過你所講既生活。老公係第二度做野，我因為想個女安定讀書而留係加拿大生活，老公每幾個月返來一兩星期。我想講，真係好辛苦架…事事都要自己去頂。我老公都辛苦，佢超錫個女，成日只能skype見，佢都好傷心，有時情緒都好差。
兩年之後，我覺得其實家庭完整好重要，爸爸陪伴好重要，特別係女仔，所以我帶住兩個小朋友跟佢一齊飄泊。
呢幾年我地感情係超差，經常嘈交要離婚，因為分開得太多，唔知點相處，唔知點溝通，係最近先好啲。但好可惜，我又因為要處理自己加拿大既事而又就快要帶小朋友先返加拿大過幾個月過偽單親生活，我都好擔心岩岩修復好既夫妻關係，小朋友同爸爸建立左既感情會受創。
小朋友教育好緊要，但家庭教育更緊要。你老公做生意，應該可以應付到請私人老師，係咪必需返香港呢？犧牲夫妻關係去換兒女成才唔一定行得通，爸爸既教育同比佢地既人生觀有時都好重要。我個人情況就係，阿女係爸爸身上學既係多過係我身上學既多好多。
我有另一對台灣朋友都有差唔多既經歷。爸爸係大陸高薪厚職，媽媽留係台灣照顧女兒，夫妻感情好差，但女兒都唔見得學習特別好。到佢地一家因爲移民加拿大一齊生活時，花左好長時間都未磨合好，夫妻嘈交係必定之外，同時女兒唔聽爸爸話，爸爸要迫住用高壓方式去管，傷左父女感情…
睇完呢兩個經歷之後，希望你諗清楚。
12個讚
相信越南教育幾差都唔會差過香港教育
1個讚
我都建議你去返越南國內讀書比較好，似乎去越南市區讀比較可行。
英文可以靠網上課堂，雖然未必及得上實體堂，但係在冇辦法的情況下，這是一個不錯的選擇，而且價錢唔算貴。
朋友依啲嘢真係唔怕，去當地教會就會識到，你就算喺香港，朋友都唔可以成日理你，佢哋都有自己家庭。
我會堅持一家人齊齊整整。
老實講，小朋友讀書叻唔叻對我黎講真係唔太重要。反而係有冇家教，價值觀正唔正確，心理質素強唔強，待人接物能力好唔好，呢啲先係佢人生成長入面更重要既野。而個人認為family bonding做得好唔好對於以上既所有野都有好大影響。
我自己係一個family bonding好好既環境下長大，而屋企比到我既勇氣同愛係其中一個好大既原因令我面對困難既時候有足夠既自信同能力解決問題。
而對於你地既夫婦關係，你可以接受長期獨守空房，唔會掛住老公？咁會唔會其實你都唔係咁愛佢咋… 又調返轉，你有信心你老公都願意同你一樣守生寡咁樣生活？男人始終係男人，呢個問題係好實際既。
同埋如果keep住咁樣分隔兩地，最後可能會演變成佢只係支付你母女生活既角色，除此以外就沒有以外了。對於爸爸黎講，佢缺失左建立父女天倫既機會，同時亦會忘記左除左錢以外作為父親既責任。
3個讚
我做過日資, 日本人係長期同屋企人分開, 到世界各地做野, 好多人諗日本人都得點解香港人唔得。
但我可以話俾大家知, 佢地出差一定會去卡拉OK ,尤其大陸, 會叫雞, 會做好多多姿多采的野, 分隔多年, 差不多退休返到日本, 然後日本就有好多退休後離婚的CASE, 因為大家都分開太多年, 無法再一齊生活。
分開的問題好大, 不過呢個都好個人, 你覺得自己OK 就得。
2個讚
真係唔多建議。。。 想分享一下親身經歷, 之前因為疫情影響我同未到3歲既仔一齊 要同老公分隔兩地三個月。。。 我同仔係外地, 已經日日 video call, 個仔都好掛住個爸爸, 見到其他同學有爸爸接放學會唔開心, 會無啦啦走去拖住同學仔個爸爸。。。仔又會問點解爸爸唔係度, 又會擔心連個阿媽都走埋, 情緒會不安。。。
偽單親情況耐左, 咩都自己做, 內心中試過有疑問, 覺得點解結咗婚都係咁樣。。。 
我同仔都係搬去新環境唔耐, 一開始都係無親戚朋友, 但原來只要試下去搵，就會識到新朋友!
不如係BD 開個Post 問下有無香港人係越南呀? 可能就咁就會識到可以互相照應既朋友!
仲有一樣野。。。香港目前既教育可能比越南好, 但無人可以保證5年後, 10年後會點。。。 到時可能只學殘體字, 連英文都無得學。。。
4個讚
十幾日前啲學校要升旗，明明係假期，但有啲要學生返去升旗，有啲就要老師專程朝早七八點返去升，下午日落時收旗。為支旗要老師同學生奔波，時間都唔係用嚟備課、出題目等等，咁嘅教育已經無得返轉頭。
2個讚
香港之前都好多中港兩面走，都好多家庭破裂
2個讚
父母既陪伴相處同身教
可能比所謂好學校好老師更重要
一來香港學校唔一定好
二來小朋友一夜變單親
你又似單親媽媽咁一腳踢搞店晒所有生活學業事務
留係越南請私人補習老師可唔可行？
同埋其實真係要讀得好好？定係可以開心童年，繼承你先生既生意
1個讚
我返香港應該會比女女讀國際學校，希望好d
1個讚
我一定會同老公一齊生活，呢個係我嘅底線。
1個讚
我只係諗同老公分開十幾日都唔得，更加唔好講十幾年…
我相信樓上好多人都勸你三思，我都希望你可以諗清楚，小朋友要教好有好多方法，但爸爸同老公得一個