咁食人奶嘅細b會唔會真係冇咁易病呀？
我喺BB 6個月前係半泵半埋身，之後就全泵。
BB 8個月大開始成日塞奶，發現乳頭有小白點，醫生教我挑一挑佢啲奶就會出返。之後一個月都成日塞，有時仲發冷發燒，次次一塞我就挑佢，跟住係泵到，只係泵得冇咁順但又冇痛我又退咗燒所以冇理。
又過咗兩個禮拜，有次隔咗太耐冇泵，一泵頭嗰浸竟然泵出西瓜汁，好恐怖 
但之後又冇事冇痛，所以繼續都係冇理。
又再過多兩個禮拜，BB 10個月嗰時終於瀨嘢。發燒唔退，個胸紅腫熱痛乜都齊，泵又泵唔到，因為用泵吸仲痛！推又推唔出。我即刻食我婦科醫生開定比我的抗生素同搵催乳師姨姨幫手，搞咗2日都唔得姨姨就叫我即刻再去睇醫生。醫生開過另一隻抗生素，同埋交代我如果食咗藥都冇好轉就要去睇急症。食咗一日係好咗啲，我以為會冇事，點知第二日又差返。結果都係要去醫院睇急症，仲要留院打抗生素。
住咗醫院兩日一夜，打咗4枝抗生素，終於消炎消腫，積咗5日嘅奶推哂出嚟！再照超聲波，好彩冇膿，如果唔係就要開刀 
。醫院個專科醫生問我係咪成日都塞，我先醒起其實嗰兩個月成日塞奶又發燒，可能係已經有菌入咗去。但因為身體抵抗力好所以會自己好，不過最後嗰次就冇咁好彩了。
出院後奶量暴跌，跌到得返平時1/4，之後追極都係得返1/3
依家BB歲半我都仲泵緊，雖然得返好少但我覺得既然有就順其自然繼續泵，唔想強行收奶。
人奶路有幾難行真係要人奶媽先知，各位媽媽加油
1個讚
我都係！一個月乳腺炎4次，又係食完藥、退咗燒就當無事，去到第四次母乳姑娘拎我啲奶去驗先知原來有菌！
不過不幸嘅係我以為食完抗生素殺咗啲菌，此後乳腺炎就會離開我，可惜佢又返黎，都唔知啲菌點黎嘅，唉
哇5日咁誇張… 我仲以為乳腺炎係一開頭谷奶先會有
原來到左幾個月都都會架？
我同意泵真係無呀b埋身清得咁厲害…
其實會唔會係你食完抗生素之後都未殺清哂啲菌？我打完4枝抗生素之後，出院時個專科開咗啲抗生素比我繼續食，成份雖然同第二個醫生開嘅一樣，但用量係佢嘅4倍-每日食double再連續食兩星期，真係好似藥丸當飯食！不過嗰次之後我就再冇試過發炎啦。
其實我覺得只要仲有奶都有機會發炎。不過我聽過有人唔係餵緊奶的，但因為本身已經好燥再食麻辣火鍋，搞到乳腺發炎仲有膿要開刀。
都有呢個可能，我有機會再問母乳姑娘
所以餵人奶真係唔可以亂食嘢
睇黎我有排都要戒口
真係人奶媽先知人奶路有幾難行辛酸 
我第一胎一開始係唔夠奶，因為我全埋身所以個仔一日到黑都掛喺身上，攰到抑鬱咁濟，到阿仔差唔多6個月大我要返返工，先知原來埋開身會唔受泵，明明 feel 到漲緊都泵唔出 
再加上返工冇時間準時泵，竟然乳頭真菌感染
初初淨係餵完會痛，以為啜損咗，出去睇普通科醫生但醫生唔知咩事以為我乳腺炎開抗生素我食，點知愈食愈衰啲真菌愈來愈勁。去健康院見醫生佢問我係咪餵完會痛大約兩個鐘、由乳頭痛到過背脊好似中槍咁、啲痛係閃電咁痛、食完抗生素仲差咗、bb 口有鵝口瘡
除咗鵝口瘡其他全部中晒，佢話係乳頭俾念珠菌感染，太攰抵抗力差或者食抗生素殺埋啲益菌會更加嚴重，而且好多醫生根本聽都冇聽過有呢樣嘢所以唔識醫 
最後佢開藥膏比我搽同藥水比 bb 滴口，搞咗成個月先好，次次餵完都係醫生話齋中槍咁痛 好返冇耐又返發，最後返發第三次，阿仔到二十個月話唔食奶奶，斷咗奶先正式好返，諗起都一殼眼淚
你真係好辛苦呀痛到咁犀利！我以為真菌感染都係等同乳腺炎食抗生素就得添
聽你講完我都驚食太多抗生素會引起其他問題
以前成日聽啲媽媽餵人奶好輕鬆，真係無諗過可以有咁多眼淚同辛酸
因為搽藥膏實在好得太慢，我係咁叫醫生開藥比我食，佢先話我知冇必要唔會開抗真菌藥，第一傷肝，第二唔餵得奶，聽到嗰吓好似跌落地獄咁 
真係未餵過都唔知原來咁辛苦，但一開咗個頭餵又唔捨得停，我都知叫人奶媽休息多啲係廢話，但真係要保重身體，抵抗力差又塞奶又真菌感染真係唔講得笑 
1個讚