佢厭惡原本的工作，諗住轉行，當時我就生BB，所以佢辭職當照顧我哋。佢工作果邊亦有一大舊嘅bonus，所以生活係ok(唔理長遠的話）
但兩年落來，佢無搵過工食老本，BB一歲開始我就出來做返嘢，佢都無幫手照顧BB，由我我媽咪幫手湊
佢每日就係遊手好閒唔知做乜，埋怨呢樣果樣，一係就覺得啲工悶，一係就自覺唔夠能力做其他嘢，然後呢兩年就睇住佢日日打機，瞓到下午先起身。
我返工時，大部分家務都係我處理，咁我做嘢快手，佢覺得攰死我都無問題啦～
試過幫佢send CV搵工，有工又唔見，仲試過鬧我做乜私自幫佢搵埋啲咁嘅工，我唔想做呢啲嘢呀！返緊工的我真係想喊，好委屈！
我明白佢有佢嘅問題，但足足兩年嘞，我覺得佢係逃避現實咁，傾咗好多次，每次最後都不了了之，同樣的問題一直纏繞無解決過，我自覺幫唔到佢嘞，我其實唔知點面對佢～我同佢好多嘢都好夾，我都係鍾意先一齊咁耐，但現在我覺得佢好似個泥沼扯埋我落去，我本來係好positive 的人，但我好似同佢講咩都無用，只能日日睇山住佢虛度光陰
佢個人好似好幸運咁，自小咩都唔憂，現在有下一代，佢都日日係咁唔知想點咁，我咩辦法都無，離婚的念頭愈來愈烈，唉⋯⋯
你有冇試過開門見山同佢溝通下你嘅感受吖，同佢認真講下養小朋友係兩個人嘅事，維護一個家庭亦都唔係咁簡單，我覺得你哋需要溝通，一來可能問清楚佢點解逃避搵工？話想轉行，具體有咩諗法？二來傾清楚家庭分工嘅事項，諗辦法唔好做死自己，唔使一下就諗到離婚嘅。
佢諗住你養佢過世？
傾當然要傾，
唔想打工可以去揸的士gogovan Uber，
唔做嘢想點？set個期限俾佢，時間唔等人，
過多幾年佢更加唔想返工，男人太多例子會宅到永遠。
除非你願意照顧佢一世啦。
逃避係因為佢無自信，覺得自己咩都做唔來，同時又唔肯放低身段，有好多工又嫌棄。其實當初係我鼓勵佢跳出comfort zone, 辭去令自己唔開心又沉悶嘅工作，咁一直我都有同佢傾，點樣搵自己嘅路～但兩年嘞，一直原地踏步，連搵工的動力都無～
至於家庭分工，呢大半年係明顯改善，有1:9變3:7左右
其實大部分開支都係佢，不過食咗兩年老本，我勁無安全感
「唔做嘢想點」呢個係我同佢每日都面對嘅問題，揸uber果啲我成日都提，我話唔好當工作當part time試下都好吖，唔會大壓力，但佢都零行動力～
我大約一個月前無set期限地同佢提過唔可以再咁落去，我撐唔得咁耐，佢積極做過啲嘢一輪，然後又回復日日打機狀態～佢有時好嬲或好開心分享打機嘅嘢，我都唔答嗲，因為我覺得太無意義～搭車打下消閒ok, 但不斷花時間鑽研又買account抽彩蛋，我真係白眼反到後腦
我心底係有個期限，如果情況依舊就一切攤晒來講～睇佢點回應同行動如何，佢有行動我都會盡力support, 但一直輪迴係咁我就下定決心脫離了
d老本仲可以食幾耐? 冇晒到時就冇得再避，馬屎落地行
我成日都話佢，你好彩可以有得揀呢樣唔做果樣唔做
如果真係要到無晒老本馬死落地行的一日，規劃差到呢個地步，我應該早走了
其實都真係唔想佢去到果個地步，所以現在我先咁忟、灰同無奈
呢d要等佢自己開hill，我相信你要講既都講晒，佢係唔肯放低身段既好難有轉變。佢錫唔錫小朋友? 為小朋友將來著想佢要重新出發。要有誘因先可以推得郁佢。
我覺得佢錫自己多個小朋友，如果錫小朋友應該有動力為佢著想而去做啲嘢改變？
當然呢個係我嘅角度，我有時都退返一步諗要喺佢角度設想，佢的確有佢嘅問題未處理到，不過2年都係咁我真的累同心灰，係有種畀佢拖喺地底的感覺
不過都好多謝你好好的意見，我都可以以小朋友再同佢傾，希望真係成為佢的誘因振作啦
心理問題的話係可以成世都處理唔到架…只不過係願唔願意去忍受繼續向前行。我本人同身邊親人都有類似你既經驗，真係好靠自己諗通走出黎。不過聽你老公响屋企d行為，恕我講句佢唔多成熟兼自私，就算唔想面對出面世界，都應該負起屋企責任，起碼做個好老豆去湊仔先。我都明白屋企有個負能量响度係好難頂，你為左小朋友要頂住，小朋友好叻架，會察覺到大人d情緒起伏。
如果佢唔做野而會負起FTD既責任, 教和照顧小朋友我覺得OK既…be fair女人可以做家庭主婦why not男士? 但佢真係要好似主職媽媽咁做好哂家頭細務教養小朋友囉
兩年咩都抖夠。
如果佢主力湊小朋友，做住家男人，搵份part time 就比較好。
但佢又唔係湊小朋友，咁就捉佢去進修／見工
你老公底都幾厚、唔返工都可以照負擔頭家咁耐、不過家人就真係好無安全感既…
佢會唔會係有投資做下？
我以前有個經理就係咁、年紀唔大做得唔開心全識投資
我心入面都知佢係咁，最心灰係大部分嘢我做晒，但都莫明奇妙地被發脾氣～
所以咁多年我簡直被「訓練」到勁tough，因為都係覺得靠自己最穩陣～
其實好多位，兩夫妻相處都唔係話要好計較，唔係要求D乜，大家都好就好～心灰係好似好多時都無appreciate過我的付出咁，而所有野又不斷輪廻咁，所以心很累。。。
所以呢個階段就係你所講：願唔願意去忍受繼續向前行
這陣子就係問緊自己呢個問題
當然下一代也是考慮啦～
我發現越嚟越多男人有呢種心態, 我身邊都有一兩個…
我第一個念頭都係諗呢幾樣 
其實你老公身邊有冇一D佢好尊重既人, 例如佢哥哥姐姐之類, 又或者佢既好朋友, 叫佢地同你老公傾下, 了解下佢, 睇下可唔可以解開到佢既心結…
樓主, 其實我覺得你已經處理得好好, 唔好灰心, 加油呀!
呢個我都認同呀，不過實際要佢教養、照顧小朋友真係唔大信心，平時同小朋友都係玩下頂多一兩個鐘
其實成長背景都有關，佢順風順水屋企小康，佢父母照顧得佢好好，唔使憂
我呢屋村妹，中學就已經幫人補習賺零用；大學的學費都靠自己（同政府啦），所以習慣咩都做，覺得做咩都係經歷～佢就一世好彩可以hea住揀嫌三嫌四～唉，都唔知講咩好⋯⋯
佢唔做嘢係因為有你頂住，佢知道你乜都幫佢搞晒，仔又有外母湊，家務都有人做埋，根本冇逼切性要搵工，然後就會有一堆藉口支持佢呢個諗法︰社運丫嘛、疫情嚴重丫嘛、我冇左兩年經驗丫嘛邊有人請，根住就會一路縱容自己落去。一句講晒，佢冇責任感。
傾係冇用架，佢一定好多原因難處講到自己唔係唔想搵工未係時候/懷才不遇/市況唔好之嘛。今日開始唔好做家務，叫佢承擔返D責任。洗衫、煮飯全部要佢做。有部份湊仔工作都應該比返佢自己搞。你預左要suffer一段時間，但點都好過你睇住佢沉淪自己冇晒希望。
我同你分享個case睇下會唔會對你有啟發。
我朋友佢老公話唔知邊度痛總之就返唔到工，結果我朋友5年來都係一個女人支撐成頭家。佢老公仲要全職響屋企都唔湊細路，要請個工人湊。日日淨係玩音樂同朋友吹水，間中帶下細路返學已經叫做左嘢。到最後我朋友頂唔順捱病左要停工，屋企收入大跌，連層樓都可能要斷供，佢老公殺到埋黎先知死，即係搵返份工頂住。當有份工有返收入，佢個人就冇咁頹，開始多返參與頭家既事務，我朋友壓力先舒緩到。
有時比返責任佢唔係殘忍，你愛佢但睇住佢沉淪先係最殘忍。