半夜三更有無人講下？
我自己屬於低靈人，無乜貨賣
不過話說好多年前住過離島一間酒店，一入房就好臭，係一種霉味，其實間房又無乜特別，我都係照平時咁差唔多時間就瞓覺
本身成晚都好靜，但由瞓落床開始就不停有聲，好似有物件撞黎撞去嘅聲，當時我朋友話，可能係雪櫃機件聲姐，就去抆左雪櫃個插蘇，靜左一陣，又再有聲，睇過又無野，其實都驚驚地，不過唔理啦照瞓
過左一陣，走廊就開始有人著住高踭鞋行，行一陣又停，行一陣又停，左至右，右至左…
係好驚，不過都係一覺瞓天光
到第二日走，一開門行出走廊，先見到走廊係鋪好厚嘅地毯，基本上乜野鞋行都唔會有聲
留條毛嚇下自己 
我是嚟留名睇矮故的
我都係低靈，冇貨賣幫push
我自己個表妹嘅堂家姐就係高靈人士，成日話屯公有嘢同埋佢哋住舊式屋邨有氣窗嗰啲呢，咁佢瞓上格床嘅，個頭就對正個氣窗，嗰陣聽佢講話以前細個夜晚唔願訓，打開左個氣窗見到有個男人同佢對望，但如果大家知道就明屋邨個氣窗係有返咁上下高度，唔係姚明咁高都冇可能可以唔洗擔梯平視個氣窗。。。。
正，我冇經歷過，但鐘意聽鬼故，留毛等睇故事
好恐怖 
護士朋友講佢經歴
佢係做細醫院，有一晚返夜班，要將個case轉去其他大醫院。
佢送完個病人去大醫院之後，就搭的士返自己間醫院。
由於佢去咗人哋間大醫院，唔係好熟地頭，佢就周到望搵緊的士站。
嗰陣時間已過咗凌晨12點。
出咗醫院正門後，佢見到佢嘅3點鐘方向有的士站，
見到有個人企喺度等緊的士，嗰個moment就未有車嘅。
於是佢就行過去，但當佢行到過去嘅時候，原本等緊嗰個“人”唔見咗…
佢好肯定話當佢行緊過去嘅時候，佢係望住個的士站，
非常sure一直都冇的士，亦都冇人行過，但點知行到埋去，嗰個“人”就好似憑空消失一樣…
有，我唔係成日遇到，最真實嗰次係，我住新界區，返屋企條路幾靜、無乜人氣，突然見到馬路架車好奇怪，個窗圓型嘅⋯⋯嗰時後生，又唔識死，一路定眼望住架車經過，喺到諗有咩車個窗係嘅樣呢？
最後先望到車身皺掹掹⋯⋯紙扎嘅⋯⋯
其實你話撞口撞面睇到又未試過，我連feel都唔係好feel到（大吉利是）
不過住過一間屋，嗰陣係同男朋友住，本身無野，只係新搬去時有次坐得好衰打機，好似比人拍左一下隻腳，連拖鞋都拍跌埋，不過我當時剩係坐返好d又無諗太多。
直到我男朋友要去外國做野，一去去一年，間屋得返我一個，夜晚間唔中會比鬼責，有一天睇睇下戲瞓著左，醒一醒嗰陣見到有個著住格仔衫嘅人穿過幅牆出左去，（不過嗰次我當我發夢未瞓醒啦）又試過有一晚我睇劇睇到好夜，無啦啦廚房好似全部碗碟煲跌哂落黎，勁大聲，我驚到成個人硬左，過左一陣先扮無野入廚房睇，但係又一d野都無，跟住我話：唔好意思，以後我會早d入房，打搞哂。
之後我通常夜晚12點幾左右就入房活動，無乜野都唔會出廳，跟住嘅日子就無乜特別野發生
直到我男朋左返黎，第二晚就比鬼責，責左幾晚可能都熟左，就無再比鬼責
無貨賣都留名支持下 
你講開護士我又諗起之前同護士朋友傾開計，佢話都有聽過有病人話夜晚見到黑色影去病床接人走，佢話佢有時見有d病人未必捱到嗰晚，就會多事同個病人講：熄燈喇，乖乖地瞓覺唔好跟人走呀
佢話其實唔知有無用，只係當盡下人事
之前去東堤租左間渡假屋過夜…
(其實果排我都日夜癲倒, 訓得唔好, 所以精神好差, 唔知係咪因為精神差而撞野) 
咁果晚我訓訓下, 訓到半睡半醒果時, 突然耳嗚, 嘈到醒左
所以起身望一望, 見冇咩奇怪野+過左一陣耳嗚冇左, 就訓返
過左一陣 又係訓到半睡半醒果時, 俾鬼壓, 全身郁唔到
跟住張開眼見到一個長髮遮面, 全身著住白色衫既人企係床腳
佢仲用港產鬼片入面D鬼講野既聲(即係好陰沉+講得好慢) 咁樣同我講: “你去死啦”~ 
跟住我就係心入面用粗口鬧返佢(聽人講咁樣會嚇走返佢)
佢企左一陣就走左喇…
真係好恐怖…
會唔會係有變態佬擔左張椅企上去, 想偷睇女仔訓覺咋
強貼必追！
我唔係高靈人士，但都有過幾次靈異經歷～
未結婚時我全家租住西貢某屋苑，
有日全家出晒街得返我同隻狗係屋企，
果時我聽緊電台雲海講鬼故。
聽聽下無啦啦我媽間房房門「呯」一聲關左
我就走去開返啦，心諗可能比風吹到關左呱
但企左一陣，又feel唔到有氣流
不過都無理，返返自己房繼續聽鬼故。
然後，果度房門又「呯」一聲關左…
我心諗、應該係路過呱…就唔理佢啦…
自此，我就開始發惡夢，睡眠質素又好差…
又成日耳鳴…
維持左一年左右，我地終於要搬啦。
係搬屋果日，我就係廁所洗d魚缸野啦
廁所塊鏡就對住通去我媽間房既走廊既
我對住塊鏡洗野時，無啦啦見到有個白袍長髮（好典型既鬼）閃左入我媽間房。
我懷疑我眼花，又諗係咪我男朋友入左去呢，就放低手上既野衝入去間房，點知咩都見唔到。
我男朋友仲係廳度幫我執緊其他野。
呢個時候我勁驚啦，拿拿林洗完d野就走
呢次係我唯一一次見到既經歷～
嘩，好恐怖…
東堤真係鬼故界集體回憶
Omg你都係見到長髮白衫
咁呢個我就唔清楚喇，佢話嗰陣佢仲細驚到即刻恤返埋個窗用張被蓋住個頭唔敢望。但我係覺得個窗係半透明磨砂㗎嘛，如果一開始就企左個咁高嘅人喺度應該一早望到有人影唔會打開先
嘩… 頂, 咁恐怖…
有個鬼故想轉貼俾大家睇, 呢度應該可以轉貼?
呢段野我好多年前係高登睇到既, 睇完咁多年我到而家都唔敢係夜晚搭lift…
"轉自舊登jackyj990巴打
是咁的 呢件事太深刻 (識我既唔好起底)
都幾年前啦 , 個時我仲讀緊中三,個一晚係年三十晚同朋友去左行年宵 第一次咁撚夜先返屋企
咁我個一晚送完女朋友返屋企就返自己屋企 去到樓下個陣仲同看更已經訓著左
大堂個個鐘係三點正
我一個人入左部LIFT之後都冇乜感覺一直上去我住個層
而我呢就住係六樓既 平時去到五樓既時候都會差唔多減速停LIFT
個晚竟然冇咁既感覺係直上去:~(
好清楚咁望到自己係按左個六字冇錯到
部LIFT就係十樓停左 開埋門:~(
呢個時候已經驚撚到仆街 去按返個關門制… 道門關到四分三到 突然之間又開撚返…
我屌你老母咪好撚驚咁大叫 咪撚玩啦夜啦 我想返屋企訓教唔該~
再去按返關門 一樣…去到四分三既時候又開鳩返
我咪好撚驚咁用部電話影相功能照出去出面 即係伸左隻手出去
照左兩邊乜撚野都冇@_@ 我個到走朗行一條直線兩邊咁冇轉灣位
我就知我賴撚左野 講左句對唔住呀 細路仔唔識世界有怪莫怪就狂按關門
前後係十樓關左三次門 第三次終於關撚左
咁我一直都好撚驚咁貼住最入面望住道門
去到六樓終於停左係度開門啦 咁我咁撚驚既時候緊係用狗衝速度行出去啦
一行左出道門我突然感覺到我後面有個人 正常都唔撚會另鳩轉個頭望後面啦
我係全身一野寒撚哂有頭到腳指 全身打左個震 我已經提起隻腳準備跑既時候
部LIFT個個…突然好撚大聲咁尖叫…呀~~~~係好撚恐怖既女人聲…
由於我比呢一聲嚇撚到自己回左頭望…
個時道門已經關緊…我見到有個女人既頭 冇錯 係就咁得個頭
係掉轉左個頭吸實左係上面通風口到…啲頭髮趺撚哂落黎完全望哂佢個樣
佢望撚住我 好撚惡咁嗌一直叫叫到道門關左…
我即刻跑返屋企開門開哂燈坐左係個聽到喊喊到我呀媽都醒左問我咩事…
佢叫我今晚唔好訓 依加去裝返支香先 話陪我到天光先好訓驚我夜晚訓會發惡夢
結果我足足發撚左成個星期惡夢 我成個星期都唔敢自己一個搭LIFT!!!
真人真事 唔撚係講笑
我只係呢一世人最撚勁係呢次:( 以前細個都仲有呢啲經歷不過冇呢次咁撚恐怖:(:(:("
嘩呢個好堅
我驚到出左少少手汗呀頂~