尋日晏晝用放喺廳嘅微波爐叮麵包，應該叮30秒但校左3分鐘，我一㩒完制就去左廁所，唔知道出事，工人姐姐應該發現冒煙後即刻㩒停同打開左微波爐個門，之後佢就好冷靜咁返左廚房繼續整嘢亦冇通知我… 但我有個4個月大BB瞓喺廳，好近微波爐…
我去完廁所一出嚟見到成個廳已經好大煙，即時打開屋企大門通風，但d煙越嚟越勁，開始濃罩住BB床，我即刻抱BB入主人房(冇煙但都好大陣𤓓味)，之後打開晒全屋嘅窗，開晒廚房同廁所抽氣扇同全屋風扇，但當時煙係濃到吸入會嗆喉，之後我就抱左BB出走廊企到d煙散晒先入返屋，但仍然好大陣𤓓味…
微波爐我已抹乾淨，放檸檬水入去叮，再放梳打粉入去擺過夜吸味，但到今朝都仲係全屋有陣味，微波爐入面嘅𤓓味仲係好強烈，梳打粉唔似起到吸味作用… 陣間買白醋返嚟試…
我有以下幾個問題請教大家：
- 仲有冇咩方法辟味？微波爐係新買，尋日先第一次用就畀十年冇用過微波爐嘅我搞到咁…如果可以唔想報銷，希望可以還原繼續用
- 全屋嘅𤓓味有乜辦法清除？我本身有兩個bad air sponge同埋一d竹炭包，尋日已經放咗喺廳嘅重災區… 本身我同BB瞓廳但尋晚都推左BB床入主人房希望吸少d𤓓味，但無奈𤓓味係充斥全屋每個角落，好擔心BB吸得多有問題，好自責唔知點做好…
- 其實微波爐過熱冒煙係唔係應該熄左機但唔好打開門？(google過有d文章係咁講) 唔開門好似係防止咗濃煙擴散/如果有火種防止有空氣助燃，但由d煙焗住喺入面唔散又係咪正確做法？
- 工人姐姐好似冇乜危機意識，全屋白煙(能見度得返50%) 佢可以當冇事繼續喺廚房整嘢，又冇睇下BB… 最基本開門窗通風都冇做，所有嘢係我畀指令佢先做… 最近大埔場火大家猶有餘悸，尋日發生嘅事令我覺得萬一遇上火災而我唔喺屋企，姐姐識唔識得保護BB同自救… 雖然佢新嚟(入屋兩個月)但之前都喺香港打過4年工… 但微波爐過熱係我造成我又唔可以怪佢，都有同佢講返下次有呢d事就唔好掛住煮飯，必須要睇住BB make sure BB無事，有咩事就抱BB走… 不過大家都知大埔場火，留喺屋企等救援嘅生存率係高過逃生… 唔知點樣教育姐姐，佢係印僱，有時口頭英文溝通一講得複雜d佢就唔係好聽得明我講乜，廣東話佢只係識少少… 各位有請工人嘅網友，經過大埔場火之後有冇點樣同工人brief下d危難應變措施？