1：高級私人會所，一向係唔少人傾生意、食飯、social聚腳地。有唔少會所，最出名就香港會、美國會、馬會呢啲，由於會費不菲、加上一定要識人，所以一個會籍，你可以話係身份象徵，亦可以話佢係充闊佬架生。
2：去到疫情時，更加開多咗唔少純粹食飯嘅club house。呢類會所冇咩康樂設施可言，只有餐廳；有啲甚至會未開業，先recruit會員。說穿了，就係搞手搵人一齊夾錢俾錢裝修，養住間餐廳。
3：以往歌舞昇平之時，大部分會所唔少人爭崩頭，會籍二手債券價錢有價有市。不過今時不同往日，依家經濟前景差咁多，上年已經有報道講，唔少會籍債價大劈價；只係無諗過，竟然會有會所開張7個月，就全面執笠走人。
4：來自新加坡嘅私人會所「1880」，上年11月太古坊會所開業，今年5月底就宣佈太古坊會所執笠，跟手去到6月中，就宣佈經營咗7年嘅新加坡總公司，都一齊執埋。
5：呢批香港會員，入會費已經講緊要24000元；另外仲有subscription fee呢，呢度每月課金1300蚊；如果你一個唔好彩，一炮過俾一年subscription fee，呢度就一炮過輸多14000蚊。
由於佢去到臨執都仲recruit緊會員，所以最慘烈嘅人，會係輸足38000元，然後一次service都冇用過。會員人數有幾多？據SCMP早前引述會員消息報導，去到執笠一刻，有150名會員，即係單係入會費，呢度cap咗360萬。
6：會員之外，苦主仲有100個被欠薪幾個月嘅員工，同埋大業主太古。據業界消息，話「1880」佔太古坊二座一共4層，有餐廳、有酒吧，有gym又有spa，裝修靚靚，大部份都係太古出錢搞。
據SCMP早前引述「1880」前員工報道，話「1880」只係負責做operation，業主太古就負責個club嘅fixed assets。
咁輸幾多錢？報道指，太古為呢間club投資咗1.7億；輸錢事大，輸面子、輸朵事更大！
據太古早前回應傳媒查詢時，就話「1880」的確仲欠佢哋租金同埋其他款項，但冇disclose更多details。
7：「1880」經營不善就一定架啦，但問題係，佢資金周轉根本就由一開始就出問題。
公司呢兩年開始搞expand，仲喺峇厘島起咗個間對海6層高酒店，基本上已經接近完工，但上年底成個project shut down。
然後香港員工接受SCMP訪問時都講到，根本除咗開業第一個月，即係上年11月出糧係準時，之後都冇準時過，上年12月份糧，係直到業主退返按金俾公司，公司先有錢出。
8：公司創辦人之前發執笠聲明時講過，話曾經傾過3個投資者，「是但一個都可以令我哋重回正軌，為我哋成為全球品牌舖平跑道。我係真心相信，我哋嘅未來係穩健、有前景。」But，最後就係冇人科水，所以清盤收場。
咁故事脈落就明顯啦，「1880」一開始就明知唔夠cash flow，但仍然expand、招會員，拖延時間，再綑綁埋佢哋一齊，博有冇投資者入局，有就過骨；冇就拎會員俾嘅錢陪葬！喂喂，咁樣唔係叫經營不善，而係叫scam。
9：今次「1880」半年閃電執笠，唔止係個別會所經營不善咁簡單，而係為成個私人會所行業敲響警號。特別係啲歷史唔耐、實力相對低嘅中小型 club house，潛在會員好自然會問：「你下年仲喺唔喺度？」
依家經濟差，招會員本身已經難，再加埋呢單「先入會、後執笠」嘅先例，日後無論係搞手搵投資、定係搵人入會，都只會更加舉步維艱。入到穩健嘅會所可以係身份象徵；但入錯經營不善嘅會所，都係一種身份象徵，身份係苦主。
10：最後補充多點，近日新加坡傳媒報道，「1880」新加坡員工獲當地會所原業主銀彈支持，擬收購「1880」資產。報道話公司喺新加玻生意係搵到錢，但香港同峇厘都輸錢。所以我估計，呢單刁應該唔關香港事。