提起情緒病，我諗好多人應該都有聽過「情緒病好比傷風感冒」呢句話，我唔知道出處係乜野，當中想表達既大概係情緒病同傷風感冒一樣咁普遍。
首先，論兩者既普遍性，其實已經無法相提並論：一個人一生可以患上感冒好多次，但就唔一定會患情緒病。
其次，傷風感冒可以用藥物令病徵稍為緩和，並靠自身既抵抗力達致康復，時間上以數日，甚或2-3星期不等。情緒病唔一定有藥物治療，藥物既幫助亦唔一定即時得到顯著既效果，心理治療更為重要；患病時間長短則視乎病者既個人心理質素以及佢得到既資源而定。
我係一個情緒病患者，「可憐之人必有可恨之處」呢一句反而係我既寫照……患病多年既我，中間歷經無數既心理關口，要不停响理性同感性間掙扎，我比一般人需要花費更大量既心力，當中既壓力不足為外人道……
對於患傷風感冒既人，你好容易就可以送上關心問候，叫對方多休息多飲水、保重身體等等。對於一個患情緒病既人，好多時大家會有遲疑，怕自己講多錯多，怕觸及患者既情緒，而且亦冇咁多時間可以慢慢咁聆聽患者既故事……患者身邊既人甚至會因為靠近而被情緒所傷，大家既關係往往變得疏離……
情緒病的確愈黎愈普遍，正正係因為咁，我希望透過以上小小既文字，令大家可以多啲理解情緒病係點樣一回事，情緒病同傷風感冒好唔同，情緒病患需要既係理解而非同情。
1個讚
依家D年輕人比中年人反而對情緒病了解更多，網上好多資源去了解，佢地會較主動去吸收。
好認同樓主講佢地要既係理解而非同情。
另外就係適當既陪伴，係對方較冷靜既時候可以嘗試鼓勵表達心底話或者提出疑問，知道彼此底線建立信任，日後溝通就會少D出現想講又唔敢講既情況。
已出社會人士，講真當佢地身邊冇患有情緒病既朋友/親人就唔會特別主動去了解，即使好似樓主有出PO，部份人睇完就唔會記得，差D既仲會落井下石，講D難聽既說話。
但overall 我覺得社會係有慢慢進步緊，雖慢但仍有人願意去了解就好好~
3個讚
我都有講「情緒病好比傷風感冒」呢句話, 我嘅用意係希望患者唔好覺得有呢一個病好似係一件羞愧嘅事, 甚至覺得絕望… 我當然明白兩病根本唔可以相提並論, 坦白講, 雖然大家對情緒病嘅了解已經比以前多好多, 但有部份人仍然對呢個病係誤解, 好多患者唔敢開口或者唔知點開口同至親去講, 更甚者就係壓抑住唔去求醫… 希望籍住用"傷風感冒"去比諭. 令佢哋明白惰緒病係香港真係好普遍, 唔好諱疾忌醫… 我都有屋企人差D因為惰緒病而無命,我好明白呢個病當中所受嘅苦… 希望樓主早日脫離呢個病.
7個讚
明白, 多謝你既分享。的確大眾對呢樣野未必太了解。
1個讚
無論係患者定照顧者,定睇完個POST都了解一下既你地
誠意分享一個網站,做得幾好,內容都幾實用!
1個讚