邊夠膽喺又一城連鎖店做經理咁樣叫下屬？大波蓮？我睇緊王晶呀？
https://www.hk01.com/熱爆話題/1091387/叫女員工做-大波蓮-韓式餐廳分區經理涉性騷擾停職-道歉咁講
1個讚
帶頭咁叫嘅經理仲係女人, 不嬲女人對女人最harsh,
而家係香港或歐美嘅男人, 就算心入面咁諗, 最多都係私下成班麻甩佬吹水時先會咁叫, 邊會當面咁講人地
6個讚
咪係囉，呢件事十年前都冇乜可能發生
好老土
極度侮辱，點會咁樣稱呼個女仔？
堅係性騷擾
大波蓮呢個名又真係幾核突嘅。
諗起以前細個讀書，有個男仔被同學仔改咗個朵叫＂愛蓮說＂。
1個讚
下次01 可唔可以唔好貼link?
我貼番部份內文
職場性騷擾必須杜絕！連鎖韓式餐廳Terrace in seaside又一城分店有女員工於網上發文控訴，指上班時被1名女性分區經理改花名「大波妹」、「大波蓮」，導致其他同事都開始這樣稱呼她，直斥「完全冇尊重我」。
帖文引來網民關注，質疑是否涉及性騷擾，「其實可以去平機會投訴佢哋」、「成班人勁唔尊重，無名你叫咩？呢啲工真係唔做好過做」。事件持續發酵後，Terrace in seaside隨即發聲明表示非常關注，絕不容忍任何形式性騷擾，經內部調查，涉事同事已被停職及處分。不過，網民對店方的回應似乎未收貨，認為應向平機會或勞工處投訴，「今鋪真係關公災難」。
至星期二（1月7日），事主上載截圖，指涉事分區經理透過社交媒體向她道歉，稱對自己不恰當行為深感後悔，承諾日後注意言行，又希望她理解其錯失及接受道歉。不過事主明言「我唔接受亦都唔理解」，認為看不出對方有「有誠意」。
該Terrace in seaside又一城分店女員工於1月5日（星期日）淩晨在社交平台Threads發文，點名批評分區經理對她零尊重。樓主表示，第1天上班數小時內，已被分區經理改花名「大波妹」，「冇問過我亦冇尊重我」；本來她打算放下，詎料上班第2天，分區經理還把花名升級做「大波蓮」，導致其他周事開始這樣稱呼她，更以此「取笑作樂」，「完全冇尊重我，佢哋咁樣稱呼我，導致其他唔知我叫咩名嘅同事都對我用同樣嘅稱呼，我好似冇咗自己個名咁」。
然而事件仍未結束，到上班第4天，樓主被分區經理拉入群組，「直接將我花名打落報更上面」。從樓主上載的群組截圖，的確寫有「大波蓮」，而其他同樣擁有花名的人卻使用自己真名，令她不禁質疑「你哋係咪冇員工培訓過？唔識尊重人？」。
帖文引起網民公憤，不足2天已有約7,000人轉載、超過83萬人瀏覽。網民質疑分區經班做法是否涉及性騷擾，「成班人勁唔尊重，無名你叫咩？呢啲工真係唔做好過做」、「女性對女性講呢啲嘢一樣可以告性騷擾，真心唔明大家都係女性，點解可以咁唔識尊重下」、「身材好就要俾人笑？成班人喺度圍威喂，bully新同事喎……完全唔識咩叫尊重人」。
事件持續發酵，Terrace in seaside同日下午極速發聲明表示非常關注事件，絕不容忍任何形式性騷擾，經內部調查，涉事同事已被停職及處分。
Terrace in seaside聲明全文如下：
我們留意到最近社交媒體上有關有同事在工作期間，以及內部群組受到性騷擾言論。我們對此事非常關注，並對任何形式的性騷擾絕不容忍。經過內部調查後，涉事同事已停職及處分。
我們希望每位同事都能夠在安全和互相尊重的環境下工作，並已經就《性別歧視條例》，訂立防止性騷擾政策及指引。如果同事遇到任何不妥的情況，我們亦鼓勵同事即時向人事部或者管理層反映，所有舉報消息都會保密，管理層亦保證事件會公平處理。此外，我們會加強相關培訓，確保公司上下齊心，共同努力讓工作環境變得更好。
針對今次事件，我們會盡力為同事提供全方位支援，希望大家能夠在健康的工作環境下享受工作，積極發揮所長。
雖然Terrace in seaside發聲明回應事件，惟網民似乎未收貨，認為樓主應向平機會或勞工處投訴，「今鋪真係關公災難」、「支持你，千祈唔好俾HR哄到」。
真係幾低能, 個經理咁咀賤抵被人炒, 希望唔係間餐廳對外講一句停職, 然後過兩日照番工就算。
4個讚
仲要喺又一城，大集團餐廳喎，大佬，我街口茶記都冇伙記而家夠膽咁叫啦
補返Yahoo link先，我改唔到條 01 link
1個讚
咁鬼衰
對同事都咁，啲客去食嘢都一定被評頭品足。