無所事事玩電騙

人無聊就咩都玩一餐,話前幾日接到個6字頭電話,手提號碼,聽下啦,普通話人,話自己係中移動打嚟,佢全程普通話,我全程廣東話,對話內容就話我註冊咗個內地電話號碼,send咗好多違規短訊出去,佢有我個人資料,我話無呀,無註冊過呀,我死都話唔關我事,佢就話會連絡通訊辦停哂我所有電話,我話唔緊要,我識人係通訊辦做,我朋友會幫我攪點,佢就轉話題啦,話我發咗好多違規短訊,我問咩違規短訊呀,佢話投資,我話我俾人盜用資料,你地去報警啦,佢話你俾人盜用資料?我幫你接去公司高層同你傾,我話好呀
記住頭先住程係佢普通話,我廣東話
接咗個自稱係中移動上海總公司,
佢問我識唔識普通話,我問返佢識唔識廣東話,
佢問你覺得中國人會識廣東話,我反問佢你覺得香港人識普通話,
佢話香港唔係中國咩,我話唔係呀
佢話我頭先同佢同事就識普通話,而家唔識,我話我同你同事一直都講廣東話
跟住佢一段長時間沈默,我玩完收線

15個讚

仲以為自己出左post
上星期都唔小心聽左一個9字頭電話,一聽到係講普通話就cut佢線,點知佢轉另一個6字電話,我又聽又cut,再有另一個5字電話…如是者第6次我就聽下佢講乜,內容同你一樣。

4個讚

第6次 :face_with_spiral_eyes: 好少見佢地咁persistent

佢地用random手提電話 真係會聽㗎
有時等緊收件呀各樣嘢 都會等電話

1個讚

最近有個星期日 收到個無來電示號嘅call
我第一次接係我無出聲 想聽下佢講咩語言先 不過佢cut咗我線

無耐又再無來電示號咁打嚟 我又接 又唔出聲
然後佢廣東話“喂” 問我係唔係乜乜乜 (中文名三個字 中咗兩個字)佢係乜乜銀行打來

我又真係有用呢間銀行 咁全名講唔中就問佢咩事先

佢又堅持要同我對全名 我又堅持問咩事先
如是者 佢撞咗幾次之後就中咗我全名喇。

就話我欠咭數已兩日 俾多兩日寬限我 :sweat_smile:

我呢呢拿拿同佢講唔好意思 太多詐騙電話我先咁有戒心 :melting_face::face_with_peeking_eye:

3個讚

通常我堅持廣東話 佢地就會自動收線
你呢個好盡責 :face_with_hand_over_mouth:

3個讚

每次個電話號碼都唔同 :cold_face:同埋一CUT即打黎一CUT即打黎。

銀行而又係自己有戶口既都會聽下佢講乜,
講中兩個字都當佢真,中文拼音好多唔同字都用一樣串法。
如果無果間就知收得線

1個讚

哎吔 我打錯字。
係中一個字 錯兩個字
所以我態度即刻起曬“鋼” :sweat_smile:

我上星期日又係收到呢個電話
我同佢講英文(老公成功用英文擊退一次)
點知佢唔收線
咁我咪冚線
我個仔喺隔離
佢知道咩事之後
即刻搶我電話redial
用美式口音講咗一句Fxxx You
嗰刻我覺得佢好man :melting_face:

7個讚

最近真係好多普通話詐騙電話

1個讚

係好多,好Q煩,阻住左真係要搵我嘅電話,有時真係會有啲陌生電話(真係有用嘅)都唔敢去聽
其實實名制仲衰過之前,多咗好多扼人電話

5個讚

原來咁多人都聽過呢隻新既詐騙電話,
我老公上星期都聽左個,講得出佢名話係深
圳電訊局話佢個大陸電話發左好多有問題訊
息,叫佢要返上去處理,對方又係全程刨冬
瓜老公講廣東話,到最後我老公話我都無大
陸電話跟住個人就 cut 線。

收到呢啲電話唔好出聲唔好講嘢,唔知佢哋會唔會AI錄聲,再用你把聲去呃朋友屋企人錢。

笑撚咗~
俾我串佢一句,要呃人先學好廣東話先。

1個讚

係囉。實名咗電騙無減反增,要拉嘅又拉唔到。

記得早一派都收到類似電話,佢話自己係騰訊定Alibaba, 一開頭同我講普通話。我話唔識,佢就轉咗佢聲稱嘅其他同事用帶有口音的廣東話同我講,冇耐就收咗線喇

我諗起 Facebook 睇過條片,隻羊駝 嗯 嗯 嗯 咁答詐騙電話

想玩電話可以 嗯 嗯 嗯
再唔係播國歌 :rofl::rofl::rofl:

2個讚

妖,今日又連續轟炸我,好Q煩

1個讚

前排收到唔知咩包裹之類電騙,我開speaker同小朋友一齊聽,我叫小朋友留意佢指示叫我地按1廣東話。按咗1係之後有個講普通話人接。我就同小朋友講呢啲就係電騙。對方可能知我講咩即收線。

好想知播國歌佢地咩反應? 係咪要聽晒成首國歌先可以收我地線,如果唔係就會犯國歌法。

我試過幾次 佢地好快收線 :upside_down_face: