本身唔係bk fans，但做新手媽媽點都會search下點湊BB，bk就一定佔大部份話題，所以點都會接觸到。
嗰到長期有一班扮X晒專家嘅人話咁湊咁湊就無可能點點點，初生一個月到嘅B一定係瞓夠食夠無濕片就無可能喊未試扭人抱，你餵唔到人奶就係你懶無可能餵唔到等等…
但我可以講畀你聽對住我個B真係通通都無銀用！逐點講下一個大佬B可以幾難湊
嘔奶：
我個B係超級嘔奶B，可以隨時隨地都嘔奶，網上話唔好overfeed，掃15分鐘風，食完抱一陣先放落床仔，用埋放嘔奶樽等等都無用！未掃風佢已經360度環徊嘔，你可能問我個B個胃有無事，好明顯都無事呢家4個月條生長線去咗人哋8，9個月咁大隻。
每餐用10條8條手巾，換兩三次衫閒閒地…仲要之間要手洗手巾因為如果唔係根本唔夠用，又無可能為嗰幾十幾條手巾開一次洗衣機。
谷屁谷屎：
原來有啲B太細嗰時係唔識運用盆腔力去痾屎，我個B開頭未轉奶粉又成日谷屁（佢呢家就算食for乳糖不耐症嘅奶粉都係會少少谷），一醖釀痾屎痾屁就喊到癲，但你要知新生B一日要痾唔少屎…佢一谷又嘔奶！
奶癬：
因為佢嘔得多成日都有機會Up住啲頸位，所以開頭都出咗一排奶癬面仔紅晒好慘。
成日喊及無限扭食：
未生過我都以為啲B瞓飽食飽乾淨就乖乖會瞓，但生咗就知有啲B真係會炒百蘿！喊足你一百日！總之佢醒嘅大部分時候都係喊，一係就食極都唔夠，有啲話無可能初生一兩個月根本唔識扭人抱，有啲又會話佢扭你抱唔好整慣佢放佢係到喊飽佢下次唔會扭…
第一，我嗰個真係初生都識扭抱，你試下放低佢呀，瞓咗都起返身呀；第二，唔知點解佢一醒就係攞食，唔畀就喊根本無得唔畀，食得多嘔得多；第三，試過放佢係到由佢喊，喊到失聲自己瞓咗，瞓咗1分鐘醒返再喊過…之後仲因為喊得太狂隨後都瞓到發惡夢衰咗…
係到3個月打後開始識應人，再知人同佢玩叫做好返少少咋…
餵人奶：
本身都好想堅持餵人奶，因為你見自己啲餵人奶嘅朋友好proud of 做咗幾耐人奶媽，自己自自然然會諗唔餵人奶好似一種罪。
但Sorry，我個B超奄尖，有一邊奶頭佢係點Tum都唔肯飲，一邊埋身一邊又要泵奶時間超長，而且兩邊奶量完全唔平均非常辛苦。
當你食全餐兩個傷口都未好坐緊月仲要湊一個麻煩集於一身嘅B，你每日嘅輪迴就係「餵奶->嘔奶->換衫手洗手巾->補返奶->谷屁->嘔奶->換衫手洗手巾->谷屎->再嘔奶->換衫手洗手巾->泵奶->下一正餐」…人都完全唔夠瞓抵抗力差仲點堅持人奶？
所以人話乜佢瞓你就好瞓啦根本唔存在，頭嗰兩個月簡直係煉獄！
個個都話我第一胎就打大佬，連我媽奶奶都話未見過咁難湊嘅B…
好在我媽係身邊長幫手及自己心理質素還好，只能夠講差啲都真係會做傻事！
打咁長篇都係想畀一啲將為人父母，湊仔湊到懷疑人生嘅媽咪或者掙扎緊唔餵人奶係罪嘅媽咪，你睇完bk更加諗自己係咪失職人做到你做唔到？
經驗可以分享，但請唔好扮專家去怪責人，你未見過就唔一定無可能！
希望迷惘嘅新手媽咪睇到呢篇文章可以釋懷唔好畀bk班pk嚇到，有時上forum問人唔一定係最想聽加油等等鼓勵，只係想睇到有個答案話畀你聽「會過去的」，捱到3個月，由食開屎變食泥，係輕鬆咗嘅～
咪又係甘。啲方法套用到一個bb唔代表其他都得。所以我覺育兒真係冇專家 ，自己同自己個b磨合最緊要，健康就得。時間真係過佐就冇話甘快大個。