我同先生想生小朋友，未懷孕，但我成日擔心自己照顧唔掂，因為雙職父母，四大長老唔太想幫我、預左請工人。我都就黎35歲，再唔生真係冇….老公同我驗過身，正常，我都睇緊中醫調理。
身邊最熟的朋友又唔多生左，我冇咩同小朋友相處的經驗；於是成日好驚自己生到都會搞唔掂。
可以點準備身心懷孕，同處理自己不安的情緒呢？
有冇同路人可互相分享，扶持下？
未生過bb又點會有經驗呢？
每個人都有第一次！
緊張同害怕就一定架啦！
So what?驚又如何？驚唔代表你做唔到！
比啲信心自己！比啲信心老公！
有情緒正常
接受自己既情緒，再安撫自己既情緒
上網睇下各方面資訊
最重要係思考！唔係人講就信
每人做事方式都唔同，每個小孩都唔同
最重要係父妻間係會互相扶持、大家目標一致
7個讚
兩個人都想要就諗下萬一遇到問題點解決
人生就永遠遇到unknown
果日同另外一個人傾旅行嘢，佢話去到意大利間酒店唔知點點點，雞同鴨講點算，佢話上網見到點點點，我話你訂左就唔好擔心咁多，同埋太擔心未發生嘅嘢係無乜意思
4個讚
生兒育女，係天賦才能，
各人都唔同，無得設定模式，
恐懼都係自己心理問題，
1個讚
可以搵下d懷孕書籍睇下
我個陣都冇四大長老幫忙，所以會預早搵下屋企附近有咩支援，例如：嬰院、私人保母、工人姐姐
另外，就算有同小朋友相處經驗，都唔等於照顧自己個小朋友會相對得心應手，因為每個小朋友嘅性格都唔同，有時預計唔到太多㗎
如果你先生都想有小朋友，可以叫佢去上爸爸陪月班，個陣我先生主動去報陪月班，佢學完返嚟好主動樂意幫忙
3個讚
如果喜歡小朋友就go ahead 吧
我覺得四大長老唔幫手先係好！我經歷係佢地幫手仲煩多幾成！
3個讚
絕對係！冇四大長老少咗好多好多問題！好多嘢請個工人姐姐就搞掂
每對父母都係從0開始，只要有心就無問題
無人一開始識做父母，父母都是同Bb一齊學習
我Bb 8個月喇，每日都是學習，同Bb一齊成長
當然有幾個媽媽frd 好緊要，有d咩即問自己識既朋友
或者入定d媽媽谷，到時生左又同日谷，都好多同路人既
自己又做下功課，會搞得dim 既
揾定陪月
姐姐
再上網睇下
參加教人湊BB course (我估有卦？)
入下唔同GROUP
最緊要都係兩公婆心態
生仔呢件事由bingo咗開始一刻開始已經會無限loop有緊張、擔心、害怕，仲有你無提到嘅興奮、喜悅、滿足感等。如果心態係想好要做媽媽，夫妻同心有心理準備未來至少頭2-3年綁手綁腳無自由同互相遷就，願意一齊分擔育兒嘅大小事，純粹係擔心自己性格同埋能力就係多餘嘅擔心，新手媽媽大家都係邊做邊學，初初一定會手忙腳亂，但喺照顧上一定會慢慢愈來愈輕鬆。不過係教育上喺香港好快就要諗入幼稚園等問題…. 點樣培育佢又係另一層次嘅煩惱…我相信「為母則強」無野係做唔到嘅
ps我有懷孕+照顧初生小朋友嘅參考書可以free，有興趣可以私訊我
兩公婆有心要小朋友，有晒共識點樣湊小朋友的話。
就專心定時定侯做功課等BINGO，一日未BINGO一日未陀隱諗得太遠都無用。同埋媽媽咁緊張生出嚟個BB都好易緊張又難湊。
同埋應該唔好同太多人比較
雖然難，但要保持咁做
1個讚
小朋友就仿如天氣，時晴時雨，而且父母要不斷慢慢調節自己，別人的一套未必啱你，別心急別比較(好難好難)，大部分人都是邊做邊學！
就算小朋友長大多了，我還是會緊張和害怕，幸好一直以來都遇到不少貴人幫助我解惑
2個讚
結婚之前冇諗過會生仔
生完咁多年都好享受一家三口嘅生活
我成日多謝小朋友比機會我同老公為人父母
我生之前都唔係特別鍾意小朋友
到有咗小朋友，先慢慢研究點做
我覺得有幾樣嘢好緊要
-
放鬆啲， don’t be too harsh to yourself ，學外國人話齋，你去諗點做一個好媽媽已經係一個好媽媽。
-
伴侶嘅關係永遠重要過bb，尤其BB啱啱出世，唔好因為啲小事去埋怨隊友。記住兩個人都係第一次做人父母，大家互相學習互相鼓勵。就算對方出錯，都唔需要起晒鋼咁鬧，因為係人都會攰都有出錯嘅時候。唔好同隊友比較邊個做得多啲邊個辛苦啲，其實媽媽辛苦嘅時候爸爸都可以好辛苦嘅，大家一齊互相扶持。爸爸媽媽有愛幸福， BB先至會幸福。
3.睇下 gentle parenting 嘅資訊，可以重新學習點樣做一個爸爸媽媽。生小朋友之前我成日覺得小朋友唔可以縱壞，要好似上一輩咁鬧。但生咗小朋友睇多咗資訊，真係發現好大衝擊。
原來可以心平氣和地教小朋友 boundaries 喺邊而又更加互信。
加油🫶🏻
5個讚
我都是三十五才生小孩,亦都唔係咩富裕之人,為了小朋友成長放棄工作,雖則係會過得冇咁好,且老公都會壓力加大,但始終賺回來既錢都未必對小朋友成長好(這個決定最後亦都做得冇錯).
最重要都係問自己,會否為孩子放棄好多野.同埋一定要同老公講好之後既事.
唔多朋友有小朋友呀，有嘅都唔熟，有冇比較活躍同少廣告嘅媽媽谷推介？真心需要呢！可中
未來你好難睇得清，個個小朋友都唔同，一百個家庭有一百個困難，你顧唔到咁多。你應該睇現在，如果兩個人一條心，小朋友幾難搞都一定搞得掂。了解多d你地育兒嘅睇法係咪一致。我都係雙職，都係見招拆招。
2個讚