姑仔成日覺得全世界欠咗佢咁，兩公婆自己入不敷支，冇腦賣樓買恆大，冇曬錢，話自己唔大洗十幾年冇去過旅行，只係兩個小朋友開支大，但姑仔又唔肯做嘢，話自己社恐冇自信唔敢見工，但又成日同啲上網識嘅朋友上山姆買嘢，佢舊公司請佢返去做兼職，又話唔慣以前啲𡃁做咗佢上司。
姑仔返大陸行街叫我奶奶湊兩個細路放學，姑仔老公打嚟叫奶奶唔好幫，話呢個係姑仔責任，佢已經冇返工，點解小朋友唔自己湊返
姑仔同奶奶講佢老公大男人又窮，成日迫佢出嚟返工，佢同老公已經冇交流，唔想嚇親小朋友先唔離婚（其實佢地離婚都唔知住邊），又喺食飯果陣話自己命苦冇呀嫂咁叻咁幸福（即係我），食得住個老公，娘家又幫到手…….
我未嫁之前姑仔成日都對我講嘢有骨，所以關係只係hi bye
連老爺都忍唔住話姑仔你阿哥阿嫂日日做到隻積咁，唔通好似你咁日日無所事事諗埋啲無謂嘢，遲早有日諗到個腦出問題
我地去旅行，奶奶居然叫我地帶埋姑仔兩個細路一齊玩，話小朋友冇錯，錢佢出。大佬我都有兩個，點同四個小朋友去旅行？真係咁鐘意小朋友我自己生唔好？
我同小朋友報興趣班，奶奶又自作主張幫姑仔兩個小朋友報同一班，奶奶唔行得腳痛，湊咗兩堂搞唔掂，叫我幫手湊，我叫奶奶比返姑仔自己帶啲細路過嚟
最後我幫咗一次手之後冇再幫，兩個小朋友就冇再嚟上堂，奶奶交咗兩個月學費，兩個小朋友淨係上咗3堂。
奶奶又話我唔好成日擺相上上網，食飯又影買野又影，姑仔呢傢夫妻關係唔好、生活唔好、睇到唔開心諗埋一邊。
奶奶成日擔心姑仔有抑鬱，覺得佢精神開始有問題。我叫奶奶帶佢去政府睇醫生排精神科，奶奶話佢邊肯，其實佢哋夫妻關係同經濟好番啲，又或者買番層樓，姑仔就會好啲
奶奶成日驚姑仔諗唔開自殺
大佬我已經知佢玻璃心就住佢，上奶奶度唔化妝拎環保袋著舊T。呢傢出去食餐飯同朋友打咭都影響到佢嘅其實佢可以block 咗我。
唔通我見到朋友買錶買車搭飛機坐頭等打咭我又要唔開心？
我同奶奶講：奶奶你都係做到六十歲先退休，佢冇錢就要返工，一係自己申請援助，冇錢日日呻窮但又灘喺屋企喊冇人幫到佢（其實係有幫，但佢唔知足），如果佢有病就要帶佢睇醫生。
連我老公咁好脾氣都忍唔到，老公話咁多年嚟大家都有出錢出力，姑仔一家係冇底洞無得再幫，今時今日奶奶仲會買餸上姑仔到執屋煮飯，我地比果份家用都係去咗姑仔手，我係睇唔過眼，自問唔出聲阻止已經算係咁
老公叫我唔駛理奶奶講乜，唔駛理姑仔講乜，講明姑仔喺度食飯我唔想見就唔好上奶奶度
