男仔2歲8個月, 有返N班但只係讀半日N, 學校講明唔會特別主動幫手戒片, 請家長係屋企同小朋友戒, 係屋企可以唔著片, 再同老師講, 老師會配合係學校都同小朋友密D去廁所之類, 所以靠學校呢招行唔通。
係屋企初試戒片第3日 (星期一開始), 而家情況係冇著尿片, 著戒片褲.
有嘗試定時帶佢去尿兜vv但次次都柯唔到…
之後又會瀨濕, 一整濕左戒片褲個仔就即刻話VV, 除褲行去尿兜, 但其實已經係柯左…
今日嘗試係企係尿兜度一段時間, e.g. 企4-5分鐘, 有試過一次柯左好少好少落尿兜, 有時刻讚佢大個仔, 有獎勵, 佢都好開心…但轉個頭又瀨濕左…應該係頭先柯唔晒…(但已企左好耐)…
但之後再試其實都好難, 因為要佢企4-5分鐘對佢黎講太長, 成日想走…要成日分散佢注意 e.g. 唱歌, 問佢問題等等…其實咁樣好唔好呢??
同埋時間好難掌握, 好似頭先4:20pm飲過水, 之後4:45叫佢去vv, 企左5分鐘都柯唔到…到5pm又帶佢去企, 企左一陣又係柯唔到…之後5:25就瀨左…
但有時…飲完水…未夠一個鐘就瀨 (可能30-45min就瀨)…根本都掌握唔到應該幾耐帶佢去一次企? 每次要企幾耐呢? 企太耐又冇耐性, 企十幾秒就話冇想走…叫佢想vv同我地講就瀨左先講…
究竟我而家經歷緊既係一個正常過程, 定係佢其實未ready呢?
有D人同我講佢未ready叫我唔好試住, 但我先試左3日, 咁快放棄係唔係好?
好迷惘, 亦覺得好累, 成日要睇住時間諗幾時要叫佢去vv, 唔肯企得耐又要不斷分散注意, 玩多15min又叫佢去…搞到好唔盡興…
唔知應該點做先好…
想聽下有經驗的男仔媽媽分享…
謝謝…
似未ready，過多幾個月足3歲再試，男仔尿感會慢少少，同埋佢地冇女仔咁sensitive覺得著片唔舒服而想戒片
我個仔係接近3歲時試過同佢戒，唔肯屙，試極都唔得就再等，我比較佛系，到3歲幾就快4歲再試，個時佢就完全ready知咩係急尿嘅感覺，就識得一急就同大人講或者係學校自己去廁所，幫佢戒1個星期左右就搞掂，出街都唔使片
似係佢未ready
唔識份咩叫「急vv」，同埋可能肌肉控制未控制得好
自己感覺到片片濕左同你講vv都幾叻仔，或者佢自己都唔鍾意濕既感覺
都係兩歲幾人仔啫，未誡都好正常
趁天氣熱下個月再試下
我記得我仔斷斷續續學左成個夏天
我都係兩歲半左右幫個仔戒片，失敗咗好多次，最後都係著返尿片。直至去到K1老師話不如試吓幫佢戒片，點知就喺學校瀨尿……校工姨姨建議不如著返片……
當時我都有懷疑個仔係咪有問題，戒咁多次都失敗，點知去到3歲4個月就戒到日片了。之前應該佢真係未ready，每個小朋友發展真係好唔同。
1個讚
我個仔係N班返到左幾個月嘅時候老師叫我地可以係屋企戒
原來佢係學校老師一路都冇同佢著, 佢地真係會定時會叫佢地去廁所
我地就冇諗住咁早戒, 因為問過佢話唔想, 點知佢放學去嫲嫲度果陣, 嫲嫲已經用零食利誘佢唔著片(我地知道係勁嬲嘅, 因為想我地主導同佢一齊戒)
咁之後佢係學校同埋嫲嫲屋企已經可以唔著片, 所以就好快係屋企都可以唔洗著
不過其實你唔洗咁急, 照樣定時叫佢去廁所, 佢就會照樣拖拖拉拉, 呢啲都係必經嘅
直到佢已經識知自控制要去都好, 仲會有好多好多次玩到唔記得要去廁所, 又或者最後一刻先衝去廁所, 然後係廁所門口瀨嘅情況 
我仔2歲半成功介咗日片。 經歷係 - 初初佢係賴咗尿先講要屙，發現時已賴尿。經常叫佢去，佢話冇得痾，唔夠幾分鐘賴咗。 試咗幾日終於成功喺未屙尿之前講要去廁所！
我估小朋友要用些時間領略屙尿係講咗先去廁所，而唔係瀨咗先講。
1個讚
多謝大家意見, 今日個仔一早起身都好抗拒換褲仔…
我就同佢著返片先, 睇下下個月再試…
其實都係想K1返學前戒到…同埋而家N班佢好多同學都戒到片已經…雖然知人人發展唔同, 但其實上次2歲半去健康院姑娘都有話其實2歲半…係應該同佢試下戒…
我個仔係英國，如果瀨左老師會幫佢換
而香港我記得我女讀N嘅時候好似都有人幫佢換，但佢個時已經介乎著片與唔著片之間，所以唔太清楚
但2地嘅學校都唔會幫手戒片，家長要自己搞掂
1個讚
真係瀨咗就梗係會幫佢換，但如果瀨得太密，姐姐都會出聲
我同你情況差唔多… 都想嘗試就返佢身體嘅節奏… 就黎3歲嘅時候試過下, 未得, 繼續著片, 到3歲半左右再試下, 飲完水提下佢去洗手間. 結果其實一個星期左右已經唔需要著片, 再過多個星期連夜晚訓覺都可以唔需要, 托賴夜晚瀨尿亦只係試過2-3次… 成個過程都算順利. 到咁上下佢地ready 就做到架啦~
1個讚
未ready真係無得急。距離K1仲有一個暑假咁耐，過多兩三個月天氣熱再試下戒。
我都經歷過同你類似的情況, 開始戒片係3Y 左右, 覺得佢係時候要戒片但又未做到 (仲要N 班老師都話覺得佢能力做到所以應該要push 一下佢). 我果時係俾佢坐廁所痾, 拎啲書陪佢喺廁所睇, 所以都坐到5 分鐘以上, 但好多時都痾唔到. 佢痾到時我都會讚佢, 佢痾唔到我就會話, 咁你急我地再黎痾啦.
結果拖拉咗一段時間佢都未會自己講要去廁所, 我就開始放鬆心態佛系啲…只係口頭上會同佢講多啲唔使著片著褲仔的好處 (咁夏天佢應該可以自己感覺到). 後來過多2個月佢喺學校開始無痾喺片度識得去廁所先痾, 就知道佢ready 了~
如果佢理解溝通能力ok, 建議可以同佢講多啲唔著片的好處 (我講到要換片好麻煩影響佢玩的時間, 去廁所痾就快好多可以去玩 ), 或者買啲佢鐘意的卡通褲仔. 真係每個小朋友的進度都唔同, 俾多啲時間佢同你啦~加油
我覺得你小朋友未ready，或者停一停再調整下策略同媽媽嘅期望先，有時你太緊張反而小朋友會驚咗都唔定，同埋每個小朋友都唔同，只係有啲人快啲有啲人慢啲，而唔係睇佢啱定錯。我覺得ready係就算著片，佢都可以成晚乾片／有能力忍到一段長時間（唔係嗰頭飲完水轉頭就去廁所），感到自己有便意（哪怕未忍到）依啲都係徵狀。
我自己小朋友就幾方面一齊進行，我小朋友會同爸爸一齊去下廁所（其他男性親人都得），佢自細就習慣會同爸爸／公公一齊入去廁所，由爸爸示範依樣最直接，佢好自然知道男仔大個仔就係咁樣去廁所，知道自己有日唔駛著片。
市面上都有好多繪本，可以俾佢睇下（有本叫‘’波比上廁所”小朋友很喜歡）。
硬件都要準備好，有時環境都緊要，睇下佢有冇咩擔憂就添置（例如佢地可能唔夠高等等），例如小廁板、墊腳椅等，幫到佢去得安心。
我嗰時仲特登買啲佢鍾意嘅底褲仔，好似獎勵咁俾佢。同埋timing好重要，嗰時夏天佢著片會熱唔舒服，就借啲咦話底褲舒服啲，咁去開始。
當我小朋友ready時，都唔係一嚟就喺馬桶度去廁所，佢初初vv只係會喺沖涼時喺企缸去
我覺得佢係除晒衫沖涼時舒服自在，又唔怕整污糟啲衫同地方，依個時間最安心，所以我都由佢（但會叫佢去完要沖返乾淨啲地方），然後慢慢先發展到其他時間夠膽用馬桶去，所以只能話每個小朋友步伐／方法都唔同，慢慢嚟啦。
我都煩惱緊！我仔剛滿三歲，佢係識講要poo poo，但堅持要喺片片poo，仲會趕我哋出門口比佢一個poo，所以唔係表達能力嘅問題，係佢未接受到喺廁所去。
wee wee方面，而家每日沖完涼都會坐potty痾一次，係痾到的。佢識痾係因為佢有跟我入廁所睇我wee wee。但痾完佢勁堅持要著返片片，唔比佢著佢會喊同發脾氣…
有同佢睇過去toilet嘅繪本，但佢都仍然唔肯唔用片同喺potty poo poo…
兩歲半幫個仔戒左，先逼佢用potty poo，再train wee wee. 一開始已經用學習褲，講明佢聽係學習褲會污糟。頭幾日好煩，成日洗，又唔肯坐potty，又話要著片。某日佢想開大我直接除佢條褲逼佢坐potty，係會喊到9彩，但都要逼。兩日後成功戒片。我意見佢要夠狠心，指示要明確，唔好拖拖拉拉。
p.s. 宜家3歲幾，佢幼稚園無人服侍佢大小異便，自己去廁所自己洗手自己出返黎。
我仔細時都係差唔多呢個歲數開始戒片，我買咗個企鵝仔尿兜比佢，有扇葉痾尿落去會轉嗰啲，起初佢都唔慣，但佢睇到個扇葉轉就好開心，至於時間通常我一個鐘會問一次，瀨咗就換，要鼓勵，如果出街會著學習褲，夜晚都著，臨瞓痾清尿，同仔講片片唔濕就有一張貼紙獎勵，佢會覺得自己好威
至於poo poo可以買膠馬桶仔，不過我仔唔鐘意，所以我買小廁板，但原來佢好驚跌落廁所，我又買啲高櫈比佢踏腳，拖住手仔陪佢一齊痾
，個幾月叫識自己話去廁所，夜晚著片都keep咗三個月，始終都驚半夜失手
我自己就偏向鼓勵，小朋友每個都有自己嘅時間表，加油媽媽
出聲