係，香港搵幾多，就使幾多。
雖則話有人住公屋生幾個都得，但你搵得十萬就唔會想只有佢哋嘅生活質素。
1個讚
當年我屋企老人家有事，事無大小都港安甚至養和，我自己病一個月都係街口藥房搞掂，係藥房哥哥睇唔過眼叫我睇醫生
搵10萬想有錢淨就冇可能過10萬嘅生活，想淨5萬就過5萬生活，想淨9萬就要過公屋生活，冇咩好怨點解開支咁大，一切係睇你嘅取捨
如果樓主想儲3幾萬一個月，加埋開支6萬，即是要搵10萬以上先做到，否則冇咩好怨
5個讚
樓主有怨過咩？佢只係請教下大家可點做啫
冇咩可以做，就係cut開支，但從樓主嘅計算中似乎覺得冇得再cut，咁就係個人取捨
我都係一家三口加工人，未計個人開支係7-8萬一個月。
佔最大開支都係樓（包括出租樓，租金收入我冇減返出嚟），其次係小朋友，第三係車，第四係工人，呢四份加埋超過開支大半。依家消費模式下，每月都仲可以穩定儲到五位數，因為我哋有一套大家有共識嘅金錢觀。
我屋企有三個開支鐵則：第一堅守降grade洗錢（即月入五萬當四萬洗；十萬當七萬洗），就算加左人工，開支比例都唔會同人工加幅一樣。household 、外出食飯、家庭活動等，我哋開支唔算高，基本上成家物慾好低。不過我要強調冇因為「慳」而不滿生活質素。如果心態上覺得因為「慳錢」而令自己生活質素變低，個心會唔舒服，咁就好難長遠執行。所以最重要就係調整自己心態，要自己心甘情願咁接受降grade洗錢，要覺得理所當然，咁就可以無痛減少開支。
第二，重視性價比。價錢低但質素差嘅產品分分鐘買兩三件先頂得返價錢高嘅質素，所以我從來唔淘寶，但日常生活中會花時間揀同試不同產品，以搵出性價比高，又可長遠穩定供應嘅產品。
第三，做好收納。因為物品放得好、你自己知手頭上有乜物資，就可以減少重覆買相同產品嘅機會。如果唔係日常消耗品，千祈唔好有咁平買咗先/買多個咁嘅諗法，因為十之八九果件嘢都係多餘，買咗都只會比人放埋一邊。
我經驗係，日常生活開支穩定已好難得（建立嘅習慣亦唔易改），好難大幅下調去儲多啲錢，所以如果要增加儲蓄，應該由最大開支嘅部分入手。
頭先講嘅四大開支入面，最易減係車，假設有朝一日我失業，如果唔用嚟做Uber, 我應該會第一時間cut車。
第二樣易cut係小朋友開支。睇餸食飯從來冇錯，我屋企好嚴格控制響個女身上嘅開支，每月開支約萬二，有考試、比賽呢類特殊情況都盡量控制萬四以內，或下月扣返今個月多支出部分。屋企收入唔夠高而又想儲錢，小朋友都係一份子當然要一齊分擔。我想強調性價比一樣要apply落興趣班度。唔好因為平而報，或聽講好好但好遠都照報。因為時間、精神、體力全部都係資源，花得資源響興趣班度，就要盡量攞最大回報。呢度回報絕對唔係指小朋友要比返100%成果，因為你付出唔代表佢會比返一樣成效你，最大回報係指付出嘅資源搵最大成效嘅興趣班。以我為例，試左兩間鋼琴班，最後係揀咗每月多二百學費果間，因為佢哋教得更有系統，老師同我個女更夾。
至於工人好難cut, 因為工人係用嚟free父母時間出嚟搵收入，所以除非有穩定人選幫湊仔、或父母自己安排到自己湊返仔，如果唔係都應保留。但我比工人嘅錢只用嚟買餸，其他日常用品自己訂返（HKTVMALL), 所以工人打斧頭嘅機會唔多，而我自己亦可以更好控制開支。
以上方法係咁多年嚟行咗好多冤枉路之後整理出嚟嘅心得，so far我覺得行之有效，希望都幫到你。
14個讚
多謝你好有心, 咁詳細咁打曬出黎. 你講嘅基本全部有共鳴, 同意, 同已經執行緊.
(其中一個最中係淘寶… 平但無質量都係嘥氣)
多多少少都說明, 現實嘅香港中慘就係咁上下
正苦 support 無份, 找數就識預埋我地… 多L 謝
唯有平時自己用錢再謹慎啲
2個讚
都多謝其他有分享心得嘅朋友
睇完呢個po，覺得自己好窮
我地搵錢唔多，不過認同樓上所講搵10萬就會洗到10萬，搵8萬就會洗到8萬。我呢d基層反而唔明點解會咁大開支。（貧窮限制左我思想）
每月開支，扣除住屋，每月約1萬，
水電煤：$1500（唔係個個月要交嘛）
搭車：$1000（我在家工作，小朋友同區返學搭保母車好平）
買菜／水果／要現金比嘅野：$2000（閒日早午晚都係我自己煮，小朋友帶飯，放假先出去食）
卡數每月控制$3000內（會訂凍肉，日常用品，出去食飯，電話費，上網費等）
小朋友興趣班約：$2000
我係每月自己出糧加老公過數比我後，我就留返1萬做上面提及嘅開支，之後就拎哂去做定期。
9個讚
今日再睇多次盤數, 雖然支出暫時唔係好多地方可以cut, 不過我地都見到其實我地各自每個月都儲緊收入嘅 25-30%. 而家目標係睇下有無辦法再將儲蓄部分拉高
講多少少，我係每年都做個plan，每月都有個plan去預算同紀錄收入及開支，所以上面講嘅係平均數。
呢個方法我用左好多年，暫時嚟講都ok嘅。
不過我地冇乜購物慾，最鍾意就係食，不過我鍾意煮，所以煮到嘅都會煮
平過出去食，我煮又開心，食又開心，慳到仲開心
我明，我而家慳到錢獎自己買幾十磅衫及護膚品，已經開心到癲
大家加油
家庭月入8-9萬，因為近年好急於儲一筆錢，所以有計劃地每個月儲3-4萬。持之以恆左3年，目標已達成。
一家三口連工人（之後變一家四口），有車，自住樓。
第一，減低物慾，改變心態，簡樸地生活，重視心靈滿足，重視家庭樂（唔係用錢堆砌），重視quality time。
第二，認真思考係咪自己有呢個需要，千祈唔好見到人有我就想有，包括衫褲鞋襪、餐廳美食、小朋友興趣班（唔係人報你又報）等等。
第三，盡量自煮，諗d菜式又平又有豐富營養又好味，老公帶埋飯，平均計埋工人一日三餐150就搞掂（例如日式咖喱、番茄肉醬係最慳錢既菜式，唔駛連續幾日食，煮多d雪入冰箱一個月內隨時翻熱）。
第四，揀架慳油車，唔在乎外殼靚唔靚，將架車定性為代步車，唔美容唔花錢改裝，代步就好，每月慳唔少的士/uber錢。住村，每月800泊車費就搞掂。
第五，周圍格價。食材趁減價大手購入，例如牛肉散買貴，一次入手3kg牛肉，再分裝入冰箱，唔同切法唔同菜式，平好多！
每月比目標儲多左既錢會再儲起（例如目標儲3萬，儲突左6千），一年都去到2-3次旅行。每星期如果冇洗突左（正常都冇洗突），weekend會一齊出去平平地玩下食下開心下（唔北上的）。
儲到既錢會放定期，又可以賺多少少，補貼下其他開支，例如去私院生B。
11個讚
我以前喺香港兩公婆一日加埋$200左右：
我：
早餐$20
午餐$50
佢：
早餐$10
午餐$50
晚餐我煮：
菜$25（新界菜）
肉$40
湯料$20
都要特登慳，lunch$50唔係好多選擇
應該再計埋，否則咪錯囉
Lunch 我盡量 $80-100 以內, 如果唔係應該只有茶餐廳, 粥, 魚蛋粉
早餐屋企食同可以陪下小朋友
租金收入計入收入，會攞去做儲蓄
1個讚
比個五嚟
淩駕響性價比上嘅係價值觀，所以除工作外我都唔會北上
4個讚
係呀，好hea一餐㗎咋
但weekend鍾意飲咖啡食cafe，通常瞓到好晏搵黃店cafe，兩個人二百零蚊坐幾粒鐘，再求其食dinner所以好期待星期六日，當時乜cafe都比我哋食勻
2個讚
多謝~ 有好多有用 tips