魚黎講，我覺得超市真係唔太新鮮（有游水魚檔嘅超市除外），急凍真空果啲黃花、鎗魚反而ok, 不過要自己劏。
如果你想買細份量嘅話，可以考慮一份份鐵碟仔果啲？問下哥仔點煮好食。平平地唔呃得你幾多錢，同埋都多人買不停換新魚上黎。
鯇魚要好食要盡量捕住佢新鮮劏，我會買腩位但一般要你要埋個頭，秤落就唔抵，但新鮮嘅腩真心好食！唔新鮮就會有陣泥味。
以前我最鍾意買馬頭魚（喺冰面），用鹽醃一晚洗乾淨、抹乾，再蒸或者煎，好好味。同樣做法整馬友仲正，好有油香，但馬友價錢有平有貴要小心揀。
記得魚要盡量煮之前先好洗，如果買完唔係即煮，連膠袋雪住就得。
魚肚位洗完要用廚房紙捽甩啲污糟野可以減少腥/怪味，通常我會灑少少鹽同胡椒粉入去。