請愛惜香港樂壇
其實一年有幾多個音樂頒獎禮喺香港舉行？坦白講，真係唔知道，亦都無深究過，而且時代唔同咗，個人已經將各音樂頒獎禮當成Music Show咁睇，主要原因係每一個頒獎典禮嘅機制都唔同，目標觀眾亦都唔同，得獎者自然都唔同，所以邊個攞奬其實唔需要太care，最緊要係香港嘅樂壇可以百花齊放、發光發亮。
就以近日爭議聲最多嘅《Chill Club推介榜年度推介》為例，Makerville旗下嘅歌手攞最多奬唔應該意外，因為投票最多嘅一定係佢哋嘅目標觀眾，所以呢個賽果其實都唔應該太意外，同時亦都唔需要太介意。反而令到我感到最驚喜嘅係，成個頒獎禮撇除嚟自其他地方嘅歌手，粗略估計最少有100個香港歌手上台獻唱，同時唔少嘅名字係我第一次聽到，佢哋嘅表演令我對香港嘅樂壇加深咵認識。
不過問題係，香港嘅音樂市場其實唔算大，所以先會有歌手曾經講過「唔介意無咗香港呢個市場」，雖然呢番說話有欠尊重，但亦代表咗要係香港做音樂、做廣東歌，其實好難搵到錢，既然係咁，點解仲有數以百計甚至千計嘅歌手同埋音樂人仍然願意喺香港做音樂？而且隨著互聯網嘅發達，唱得唔夠好、跳得唔夠好、個樣唔夠靚、講嘢太過悶、個頭梳得唔夠型、著衫唔夠潮、另一半唔啱大家心水⋯⋯簡單嚟講係只要有任何觀眾睇唔過眼嘅地方，就會被大肆批評，當錢又未必搵得多，但又要承受咁多壓力，點解仲有咁多歌手同音樂人仍然對香港嘅樂壇不離不棄？
當年有一個地盤工人，被人問到點解落大雨仲要工作，係愛定係責任呀？最後佢回答：「係窮呀！」然後下刪四個字嘅粗口。但如果問香港嘅一眾歌手同音樂人，點解搵錢唔多又要俾人指指點點，仲會堅持喺香港做音樂？相信佢哋嘅答案唔會係因為窮，而絕大多數嘅香港歌手、音樂人嘅答案都應該係愛、理想，先會繼續做香港音樂，做廣東歌、唱廣東歌。
既然咁多歌手同音樂人仍然因為愛同夢想、理想堅持做香港嘅音樂，大家係唔係應該靜落嚟諗吓，五、六年前香港樂壇曾經俾人一種青黃不接、沒有生機嘅感覺，甚至大家擔心過廣東歌仲有無將來，會唔會有一日走到末路，結果香港嘅樂壇仍然可以捱過去，同時今日香港嘅樂壇可以再次有唔同嘅面孔出現，又或者一啲熟悉嘅聲音繼續努力支持本地樂壇，甚至乎見到唔少前輩般歌手同年輕一代嘅歌手合作，令香港樂壇可以再次發光發亮，如此得來不易嘅生機，大家係唔係應該盡情咁享受，同埋盡力支持？
係時候重拾愛香港樂壇同廣東歌嘅初心，好好記住音樂係應該係用嚟陶冶性情、令人歡樂，絕對唔應該再因為音樂而產生爭拗同對罵，否則香港音樂好容易會再次走入低谷之中。
雷霆881《晴朗早晨全餐主持》財經是敢的
安里控股主席兼行政總裁 黃偉康
