BB嚟緊一歲，開始要諗學校
搬嚟港島西區幾年
請問堅尼地城至中上環一帶，有冇邊間學校有長全日又有n班，而又適合一d比較活潑好奇嘅小朋友入讀
謝謝
可以一間一間篩選。
1個讚
謝謝
睇下先
不過都想睇下有冇d用家分享
1個讚
偉思幼稚園
可以分享多啲你欣賞學校嘅咩嘢？
不過我可能揀全日制優先
我啲資料係十幾年前嘅事，如果你搵唔到心水，名校又唔收，可以去學校親自睇吓。
又冇諗過一定要讀名校
只係小朋友比較好奇愛探索，想揀d唔好太死板嘅幼兒學校或者幼稚園
明愛淩月仙 - 老師有愛心， 有戶外活動空間
我都有諗過li間
等我上網再睇先
謝謝
而家先見到你個Post，希望唔會太遲，資料會幫到你
我仔仔讀緊高街個間基恩的N班，長全日，老師主任校長姨姨都好有愛心，每個老師同姨姨都真係叫得出我仔的名。
學校有戶外平台花園，每日嘢食新鮮買（會見到姨姨們拎買菜車仔出學校採購食物的），每日都有湯水。
學校係project based咁學，每兩個月一個主題，主題點延展及發展落去，就睇下小朋友討論了咩。例如，今期係學交通工具，小朋友討論完後決定租巴士去沙灘玩（而學校又真係願意出錢比佢哋同家長一齊去玩）。
我因為雙職無工人，所以當年都真係就呢區長全日幼稚園做過深入研究，我係鐘意細校，最好有戶外空間，最緊要有自己廚房，有宗教背景係bonus 。基恩係100% match 。唯一就係太happy，同埋唔係日日有NET。
1個讚
我都係傾向li d，戶外空間好重要
好多謝你詳細分享
唔知有冇得參觀學校呢，我見佢網頁冇講
當時係因為疫情，所以一直都冇咩校園開放日。但係到面試嗰日，佢就叫小朋友早啲去玩，同埋面試完之後留低玩，嗰時家長就可以好詳細咁樣睇到間學校。
我仔仔都係喺呢間嘅表現最好。當時我覺得最後其實都係小朋友揀學校，佢嗰刻個面試表現就好，即係代表佢鍾意嗰間學校。
其實中西區長全日嘅學校有好多間吓，而且大部份都應該收唔夠學生。你自己有冇睇過大概邊一間係啱心水嘅？
我自己因為當時好怕冇學校收，所以同區嘅長全日幼稚園我基本上都報曬，（遠到去灣仔都有兩間，以防中西區冇學校收）。
但係最後有啲面試時間撞咗，就冇去啦。你可以講下你有興趣邊間，如果咁啱我去過可以分享下觀察
嘩~ 我小朋友而家10個月… 都睇緊N 班, 我一路都係睇緊D學校,心大心細… 多謝你地…等我都睇下 基恩先…
1個讚
中西區我唔熟，心儀明愛淩月仙，不過佢長全日
請問你仔仔個間長全日係至到幾點？
我有上網睇過明愛堅尼地城，但聽聞好似有一個位係公眾人士都會使用，覺得有d危險
淩月仙冇N呀，得K1-K3，K1得半日，冇全日，所以都要考慮呢點。但淩月仙係幾好，學校比我感覺好有愛，學習的方法好「活」，教具老師自製，十分有heart！係返學個地點有點偏僻，學校條斜路有點長
明愛堅城佢係成棟明愛中間有一層係幼稚園，呢間都有開放日，我有去過（但只限去play area 聽簡介及分享，冇真係行一轉學校。我感覺上採光一般。你都可留意下開放日，聽下校長講下理念。
學校範圍係有門關上的，平時放學前你可以見到有小朋友係入面玩活動咁。
我仔個間4:30放學，6:00前接都唔叫用延展，最遲可以7:00走。我比較少用延展，但用落都好方便，只需打個電話比學校講聲，小朋友會有多餐茶點食。
有咩想知可隨便問！！當時我都有想搵過來人問但真係唔多。
我想問多唔多小朋友會由N 一路讀到K3? 我見好多間N 都話會讀完N之後K1轉第間… 同埋每個月埋單係咪大約5000到?
我而家呢一間，N班每個月學費$3909，膳食費$589，減去政府資助全日制幼兒學生個$600，每個月$38XX左右。
校服大約$100鬆點一套，夏天運動衫，夏天校服，冬天校服，共3款，每款買幾多套就自行決定。再加風褸（校褸可唔買），床鋪（午睡用），其他雜費我估大約$1500-$2000左右（因為學期頭比，我已唔太記得實際幾多，但收費好合理的，一年收一次咁）。
至於課本，只有每學期4本英文故仔書，中文冇課本。都係$200內應該買到晒。
至於係咪N直升，定係K1轉，我估好睇你係咪會參加大抽獎。中西區的小學普遍唔錯，如果係想大抽獎，其實間間劵幼到最後派去的小學來來去去都差不多。女仔就更大目標會轉龍幼，否則其實差不多。咁你如果想出公海，報私小直資，呢類劵幼又的確唔夠學術。
不過我自己呢一年的感受，都覺得考小好睇家長放幾多心機，半日學校其實教得幾多呀。今年呢間學校畢業生都有入到港大同學會小學。
不過利申我K1 係會轉去另一間多少少英文的劵幼。本身如果嚟緊個間唔收，都打算繼續讀呢間的。