隔離post 講窮困，令我諗起咁多年嚟雖然有好多風雨，但好慶幸人生旅途上有好多人對我好好，令我覺得自己一直都好幸運。
無意間諗返起一個小片段。中五時班有個男仔，個性好低調好hea, 平時唔多理人。畢業寫紀念冊，佢個個都唔肯寫，但因為佢坐我隔離，所以我抱住一試嘅心態試問下，佢諗左一陣，hold咗我本簿兩日，結果寫咗比我。佢畫得一手好畫（係好靚好靚可以出漫畫果隻），所以畫咗一個我最鐘意嘅動漫角色，然後響後頁寫咗少少嘢，提醒我一啲本來我自己都唔覺嘅壞習慣。我睇完當頭棒喝，之後就改咗。依家諗返轉頭，多謝佢注意到仲肯提醒我。
好似好鎖碎，但往往就係好多人響好多濕碎嘢上都對自己好，先令人覺得幸福感無處不在。希望我自己都有做過一啲令人諗返起會會心微笑嘅事，回饋返對我好嘅人。
好窩心咁，咁之後冇下文？
冇下文，畢業之後冇聯絡，亦唔知佢去向。其實讀書時都唔係好熟（雖然有段時間佢坐我隔離），我甚至唔係好記得佢個樣。不過即使係咁，原來呢一個人都曾經幫過我改壞習慣，所以感恩身邊其實有好多人幫過我
佢好留意你喎
一個人夠細心正面，會發現身邊好多好人好事㗎
我個壞習慣其實都明顯，可能其他人都發現只係冇講，又或者可能好多女仔都係，所以大家唔覺有問題。
可能窮開，好多事都要學識感恩
係咩懷習慣
既然咁common 不如講出嚟
我覺得就冇特別意思都好, 佢係一個會想你變好嘅人, 如果你地可以做到朋友就好啦
我同意, 人試過係困境中生活會學懂感恩… 因為係黑暗中生活過, 你先明白窗邊嘅一線光係幾咁耀眼, 我細個係好窮好窮(係老鼠旁邊食飯), 屋企係無厠所, 30+歲時試過跌落谷低(失去至親, 同年惹官非), 一切一切都令我全心傷痕累累… 幸好我身邊有好多愛錫我嘅人,我更感恩上天同父母賜我打不死精神, 走到今日… 
對你好嘅人先會指正你嘅錯… 
同枱傾project時響其他人面前同另一個人咬耳仔，細聲講大聲笑，好似搞小圈子咁。
係呀，多謝佢講出嚟。之後佢畢業我升學，因為本來就唔係好熟，所以有紀念冊都冇聯絡。
喺office 女人都係咁 ….
其他好肉酸，我慶幸有人留意到仲提我改。
樓主既分享令我諗番中學差唔多既經歷，細個屋企算窮，所以我永遠著哥哥家姐舊衫，我媽永遠幫我剪男仔頭，又戴眼鏡同少少肥，加上我媽永遠成日話我牙又唔靚，頭髮又薄。。。總之我覺得我好樣衰，自信心極低，成個中學生涯都唔敢出聲講野。係s5個年，坐我隔離個男仔多手拎左本手冊睇，見到我張無眼鏡既學生相，之後好認真同我講：你其實都幾好樣，仲乜唔執下？
因為咁，我會考完自己開始留長髮，開始自己儲錢跟同學去旺中買衫，令我變番一個正常女仔
我同個男同學會考完已經冇聯絡，但我仍好感激佢個番話，某程度都改變左自己。
其實同你窮富冇咩關係嘅。
係你性格識感恩，呢樣好嘢嚟。
多謝樓主分享
諗深層，其實樓主青少年時期可以接受人哋提點都係一個好有器量嘅行為。其實你都要多謝你自己。
我要多謝父母生得我咁樂觀
不過童年物質生活唔豐富係令我珍惜同感恩嘅主要原因。因為會感恩所以我個人都好易滿足。依家小朋友物質好豐富，教佢學識感恩反而唔容易
有利必有弊
學阿媽話齋，想你好先話你，如果唔係都費事理，只會睇你衰。所以有人善意提醒真係多謝都嚟唔切
完全同意。
見依家D teens 完全唔當食幾百蚊 buffet/afternoon tea 係一件事。