我覺得係窮過既人會好憎人浪費。
5個讚
我阿媽話我出世時奶粉＄都無，果時住堂樓冇lift, 樓下就係藥房，每逢糧尾，我媽會抱住我係樓下藥房買罐奶粉，我媽會扮冇帶錢，冇帶銀包，就係咁些住數就拎罐奶粉返上樓，幾日幾夜都唔出街，直到我老豆放工有糧出先敢落街找埋條奶粉數，我諗應該最窮了
3個讚
我好記得十幾年前she.com個鋪叫‘’一些貧窮經歷‘’，極多感動嘅香港故事，唔係講笑，個個睇到眼濕濕，但我搵唔返，頹
我由細到大都窮，但你話窮到冇飯食好慳又唔係。總之父母勞工階層出身，屋企窮，著二三手衫，唔會出街食飯，冇錢過年，從來冇去過旅行等等都係經歷
我成績好，一中學畢業已經自己補習搵洗費，廿年前已經可以二百蚊一個鐘，大學每月幾千蚊使，U grad後事業順利，唔點慳。
呢六七年慳好多，因為中年醒覺
過到嚟英國仲慳，唔夠錢仲唔慳咩
但未至於窮困
3個讚
我細個住木屋,要行山先上到去,後來搬咗去臨屋區
出面有大空地,日日玩到唔捨得返屋企
踩roller,跳橡筋繩,玩集體遊戲,去空屋探險,去隔離屋燒嘢食,見到阿伯捉大老鼠…
我喺嗰度過咗一個好開心嘅童年
反而上咗公屋冇得出去玩
2個讚
我可能當年有喺嗰度分享過
1個讚
我好想搵返
仲有當年經典：我在苗僑偉配眼鏡暗不快經歷，呢個係笑到標眼水，你記唔記得？
我自己無試過，但前男友家道中落，本身無contact但上新聞見到。
當時我哋係談婚論嫁既地步，但佢成日話公司唔好生意唔好結住。我當時覺得佢拖我，因為講左幾年唔好生意借左好多錢，但佢屋企公司係家族生意，資產都幾億以上，我心諗點會無錢結婚，我好傷心，我哋學生時期拍拖，拍左十年，咁我就同佢分手。佢仲挽留我但我都好決絕覺得佢係唔夠愛我所以唔結婚。
但一年後我睇新聞見到真係公司唔掂，家族生意爭人好多錢，俾人告，回想返之前佢講既，發覺佢唔係呃我，心即刻戚戚然，覺得好遺憾，同有啲擔心佢，覺得佢當時係唔想連累我所以唔結婚。
好似有小小離題，但呢啲嘢一路放左係心，唔知可以係邊度講。
13個讚
有印象
1個讚
最窮既時候就係細個時，住劏房，上到公屋個陣覺得公屋好大好靚。以前俾心機讀書真係改善到生活，畢業後事業算順風順水，跟住嫁左家景唔錯既老公，而家生活算幾好。
但窮過，就算生活改善左都係不自覺地好慳，同鐘意儲錢。我覺得係窮到驚。
3個讚
我細個時候，一家 4 口，一張碌架床。
我老婆係在鑽石山木屋區加九龍城寨長大嘅。
現在叫做俾得起仔女去英國讀書。
1個讚
你少機會接觸啫。試過窮，到宜家都記得窮困時候生活嘅不安。
衣食住行，每樣事都充滿不安。
8個讚
細個住公屋，3兄妹一間房，無書枱，一係食飯枱做，想靜就放塊板係阿爸阿媽張床度，坐床邊做功課。
而家算係事業有成，但同我同range同事都講緊買個5位數手袋，一家大細買年咭去迪迪尼，我都唔捨得，呢排趁減價買咗對鞋、幾件衫大約洗咗$2000，都會提自己唔好再買。始終想儲多個錢，留俾小朋友去外國讀書。但當交稅、交保險，就提自己要慳啲。
5個讚
我都係細個至懂事已知道屋企家境唔好
小學家人係幫我揀樓下果間
(近年先知原來我細個讀果間已淪為區內"寶校")
原因係行路已經番到學
可以慳交通費
呢個我都試過
中學既學校飯盒要 $15
但食學校淨福字麵或包鋪買麵包只係幾蚊
街市食幾條豬腸粉都係幾蚊
學校附近有麥記但都覺得係貴
無咩食過
最記得係學校附近屋村商場有阿波羅
竟然有同學為左減肥食廿幾蚊一杯鮮果甜乳酪做正餐
細個覺得係好奢侈既事
我中三就去快餐店一直做part time
當時時薪 $15
做到會考都仲做緊
3個讚
Year 1 時，得返$100，仲要買本$300 嘅 textbook 
1個讚
講開呢樣
我大學時係興去旺角星際買翻印版大陸textbook
的確係平好多
(後來先發現有d course 根本係可以唔買textbook)
當年只識去swindon 買，Year 1 乜都唔識，後來梗係唔買 textbook 啦
2個讚
我都好唔捨得裝身，見到呢度有post講 H 袋，雖然我都買得起，但我只有一兩個coach袋，仲係海外代購有折嗰啲。
1個讚
竟然無乜人講SARS嗰時嘅經歷…
我老公SARS嗰時爸爸同佢都失業，得媽媽開facial店（生意當然大不如前），仲有個細佬喺外國讀緊書，勁大鑊。佢當年同我拍拖連請食茶記都請唔起，要鼓起好大勇氣叫我AA制，我仲記得佢一臉尷尬個樣…
失業咗一段日子，就快無飯開，佢終於衝破心理關口去做sales，改變咗佢一生。
而我奶奶自從嗰一年之後成日都好驚自己無錢，日日都數住自己夠唔夠錢用，覺得可能唔夠時就會情願唔食飯唔出街慳錢…
1個讚
唔係富裕，由細到大都著家姐啲3🥹
冇咩零用錢， 極少同同學出街食lunch($$)
但有一次真係覺得自己「窮」係因為….
中學同朋友傾計，講下「哎，想學彈琴」
同學又話想學，不過我知自己講下姐，屋企冇錢比我學琴。但同學仔講完之後下個星期媽媽同佢報左學琴🥹
個下，覺得自己家境清貧
人地講下就做到，我就得個講字同想字🥹
1個讚
出細至大學畢業都係窮。
小學住舊式屋村，兩戶share 厠所，爐灶喺騎樓，沖涼騎樓沖，向街嗰邊冇玻璃窗咖，上鐵枝，下通窿磚，用啲膠坑板檔吓風，煲熱水沖涼，冬天涷到PK，成日咳，去睇街症。冇零用錢，校服著二手。
中學搬去新啲既公屋，讀一間地區名女校，校服得一套，指定及膝羊毛襪得兩對輪流著，屋企冇洗衣機，洗唔切、唔好天，污糟都夾硬著多個禮拜，用親戚二手書，舊版斷開三截都繼續用，阿媽想慳煤氣，我一洗頭佢就鬧，但又唔會俾剪髮錢。冇零用錢，要返學嗰陣，就有一周60蚊飯錢（學校飯盒９蚊個），放假就乜都冇，當然冇課外活動冇社交費，出街衫得一套, M 巾都有時唔夠錢買。試過同同學兩份食一個學校飯慳幾蚊，有同學教我去七仔食杯麵當午飯（當年好似５蚊個），食到第二個禮拜，聞到合味道陣味就想嘔。唔係靚女，冇打扮(用利是錢買件平衫都被鬧鬧鬧)，又冇閒錢出街，朋友約唔敢出，唔敢發展興趣，屋企啲慳嘢，喺個間學校講出嚟冇人會理解亦都冇人會有共鳴。學校規定要有課外活動，就去圖書館幫手，因為睇書唔駛錢。
其實當時我阿爸做地盤，嗰陣地產起飛，未至於窮成咁，但我阿媽細個嗰陣在大陸係赤貧，食唔飽著唔暖冇錢醫病，所以佢慳咗大半世，一駛錢就有罪惡感，養仔女有飽飯食唔會涷死病死就算。睇到而家話咩窮養仔富養女，睇到好感觸，我就係窮養出嚟既女，的確有esteem issue要等大個自救先走得出嚟, 另外是唔識對自己好。
幾十年過去，我都屬於一個慳既人，但點都唔會屈就自己或人地。
8個讚