已涉及身體上的欺淩，拍打頭部及搶眼鏡，請問應該點處理？
加上杯葛講是非，點教自己小朋友去處理好，謝謝
你直接同學校講小朋友係學校被打
2個讚
如果係小學生，直接同學校講
中學，小學，我都會直接返學校搵老師講。
1個讚
去到郁手郁腳(唔理幾輕微), 就應該同學校講, 唔理中學定小學,
好記得有個個Member分享過, 仔女受到欺淩而家長唔挺身維護的話(即使最終可能要轉校), 對仔女係二次傷害, 因為覺得父母都唔保護自己
5個讚
如果係小學， 家長真係要出聲， 免得去到嚴重程度就難以控制
我會同學校備案，但老實講好多學校欺善怕惡，分分鐘想息事寧人，不過備案都係要嘅，起碼要追究都有記錄。有冇學校群組？知唔知對方家長係點？似正常人嘅話我會私下同對方家長講，再無改善而仲有身體傷害會報警。
小朋友會比人蝦通常因為冇朋友，仲有冇方法透過參加學校活動建立到朋友圈？
另外如果小朋友對學校有「貢獻」，老師或多或少都會企響佢果邊。有冇乜強項可以為校爭光？
如果被集體欺淩，小朋友一定好傷心好難過。未知學校果邊可唔可以改善時，不如幫佢響出面搵朋友圈建立自信心，例如參加團體活動、制服團隊、社區足球隊咁，幫佢拓展朋友圈。
仲有比佢學下跆拳、自衛術，有乜事防身都好。肢體欺淩嘅人比人反擊返轉頭，好多時就唔敢亂嚟。
1個讚
如果有動手動腳會同學校講，一定要保證唔可以再出現
但杯葛講是非家長介入後就應該會更嚴重，做定心理輔導。
既然會蝦人既同學，呢d人要遠離佢地，識唔識都罷，
既然被排擠咁咪做獨行俠，專心讀書，自己拎喜歡又比拎返學既書本小息睇或做家課，唔好理人地，時間一樣好快過
1個讚
小學: 同學校反映
中學: 處理小朋友感受同商討處理方法
如果欺淩屬嚴重，身體有傷，會報警處理
1個讚
小朋友幾多歲？
會同學校方面「了解」下
再睇下有冇機會搵到「人證」
再查下打人既同學名字
做好哂資料收集
小朋友返學係咪好唔開心？
要做好轉校心理準備
不過收集資料後再向校方反映，睇下有冇改善先
1個讚
學校老師唔知？？
咩時間發生？
小息都會有人睇住架㗎
我會打去學校問，如果再發生就會直接搵個家長
首先要了解清楚知唔知咩原因？ 維持幾耐？ 小朋友有係同老師反映？
我係直接會搵校長了解
你話唔攪掂佢，又有呢啲野再出現，下次驗傷加報警。
老師校長都係老屎忽，一聞到有更煩嘅嘢會當你係 VIP
第一次叫小朋友同對方講唔好咁做，第二次大聲咁講要俾其他人聽到及警告下次話俾老師知，第三次話比老師知（首先一開始要話比家長知幫佢分析）
我女幼稚園時有好多朋友都被個男仔蝦,成日走去我女度推佢想推跌佢同拍佢個頭(我在場都走過黎拍) 
我初初WTSAPP對方家長,佢仲話小朋友玩下,我話咁樣唔係玩!
之後我同學校講,學校覺得好少事,之後我再同學校社工講,之後再搵學校主任好認真咁傾,我話如果我女受傷我會報教育局 
再係咁可以搵埋社工同教育局
我啱啱都經歷緊。仔中一比兩個人圍， 仲有另一件恐嚇事件(不過嗰個小朋友比較特殊，所以純粹係了解同反映)，我係直接剷去學校,因為我冇針入唔到去，所以我先生入去傾。最後放學時老師有出嚟一齊傾，我同老師講係想反映返有呢件事，唔係想投訴（未有肢體上欺淩)，所以想備左案先。跟住問多一問阿仔，阿仔就話早一日比其中一個同學夾入廁所，要佢道歉。跟住老師問咗係邊個小朋友，記低左名。第二日上午已經回覆，經已罰咗嗰個小朋友同處理咗。
我會再留意事態發展，如果冇改善會喺家長群組嗰度爆名，搵果位家長，或者會親身去搵嗰位同學。
2個讚
小學的話 - 交返比學校搞
中學 - 傾咗問清楚，要有共識處理方法
感謝各位回覆，我未同學校講，因為我覺得學校都唔會點理，不過我有直接同個位小朋友好認真咁講過，叫佢唔好再郁手郁腳，因為本身我都識嗰個小朋友，亦識得佢個媽咪，佢而家冇再郁手郁腳，不過就變咗係玩杯葛，叫啲同學唔好同我個小朋友玩，呢啲情況我就控制唔到啦，我個小朋友係比較純，唔係咁識保護自己，希望佢經一事，長一智啦
我會再觀察吓情況先，如果再惡化，我會搵佢家長講同埋通知學校，謝謝各位
5個讚
該主題在最後一個回覆創建後90天后自動關閉。不再允許新的回覆。