該名港男在連登討論區以「好心唔好再逼啲職員跟住個客睇衫啦」為題發文，提到自己是一名「毒男」，在走進一間服裝店後，「有個女仔職員跟住望住我睇衫，嚇到耳仔紅晒，扮拎起件衫睇嚇到隻手都震埋，差啲掛唔返上去」，並直言「今世都唔會再入u 記以外嘅地邊方買衫！」
他認為，對於一般平民服裝店而言，生意好的先決條件並非服裝有多漂亮 ，而是客人「睇衫睇得有幾自在」，店鋪則會多人光顧，並會出現羊群效應，有更多人進入店鋪，但指「一年幾千幾萬」的高級服裝店則可以例外。他舉例指，日本部分服裝品牌的分店樓高數層，仍未擔心顧客未能找到自己想要的服裝，「你香港畀你大極咪千幾呎，你學咩扮膽心人地搵唔到自己想要嘅嘢。」他續指，知道相關做法是源於公司規則，認為公司應思考相關做法，「你係想搵錢，定係想扮高檔，嚇走你嘅目標客戶群呢，你件衫賣得2~3舊水，你又想你啲客有幾高級呢？」
在樓主發文後約5小時，該則帖文已獲得逾2700個讚好。不少人認同樓主的看法，並指「係，通常遇到呢啲即走」、「真，唔識做生意嘅」、「行過嚟煩我我會即走，我睇啱會叫你㗎啦」、「成日畀人問，想搵啲咩款，我X知點分咩，路過行入嚟望兩眼咋」、「又講得啱，整到好似超級市場咁最好，唔買都會入去睇下，一定人流好高」、「真，一sell我即走」、「真，如果入去揀衫畀職員跟，我都會即走，就算件衫我幾有興趣都係咁話」等。
有人則指，「講聲自己睇啱再問佢，多數都唔會再煩你」，但亦有人回覆指，「講咗自己睇都仲係追住」、「一樣會照煩，佢只會望住你，等你一攞起件衫佢就會出聲，但我只會更快放低，因為唔想佢出聲」等。
另有人則認為，「唔跟住啲客咪好似u記咁比人亂摷，打仗咁，收工又要用幾多時間執返整齊」、「怕你偷嘢咋」、「啲有錢佬好享受呢種感覺，好似有個跟班做打雜咁樣，同埋我需要你單生意嘅感覺」等。
亦有任職店員的網民指，「作為一隻SALE狗，只能講所有嘢都係老闆同X客逼出嚟」、「事實係有冇chur客鋪頭條數最少差三成，真係摺到咁就唔好行街啦，普通social都咁驚」等。
3個讚
又真喎, 自己睇自由自在先有MOOD, 一嚟就問想搵D咩即刻無乜意欲, 有時我都唔知自己想搵咩, 行下唔比咩?
好似而家去萬寧屈記都即刻有人走埋嚟問想搵D咩, 我想答佢: 我等車期間嚟涼下冷氣咋…
11個讚
會開聲問我有咩需要再跟住都仲接受到，最怕離遠望(跟)住嗰D，好似驚我偷野咁，好唔舒服
我去買嘢最怕啲sales, 當你乜都唔識咁樣, 介紹呢樣介紹嗰樣, 仲教埋你啲食材點用, 我會覺得好煩.
如果我開聲問你, 你再介紹都唔遲.
2個讚
我都唔鐘意買衫有sales跟，尤其好多sales嘴臉麻麻，或者跟住你但來來去去都係「睇岩可以試吓」🫠
曾經都係sales
只能夠講，個個商場都有唔同客路
老細要求遠距離睇下個客再唔日間唔中講2句已經好夠
除非個客要幫手同有好多野問
然後我作為一個客人
我拎上手你煩我我就一定走
我唔介意sales跟架，有啲咩問題可以即刻問佢。不過有時未必一定買，客又多，我都唔好意思阻佢時間，就會請佢幫其他客人先。
同意sales都要有智慧，唔使話個客掂親啲咩都介紹一番嘅。
1個讚
唔中意被sales 跟，覺得唔自在，通常會禮貌地講句「自己睇得㗎喇，有需要再搵你」
試過真心想買衫，但被sales跟，每睇一件，佢立即整理返上一件，真係好嬲。睇中咗都去另一間分店買！
2個讚
我最憎咁樣
個手勢表情好似我特登整亂佢啲衫咁
當堂咩mood都無曬，即走
3個讚
唔明佢咁做有咩so
好趕客，可能同老闆有仇
而且我唔係周圍摷果種，只係喺衣架撥開掛起嘅衫睇，都未拎起⋯
原本係櫥窗睇中咗一件想買，再睇吓有冇其他啱嘅先一齊試，睇咗幾件發現個sales係咁就即走
隨口一句「可以望下/可以試吓/隨便睇下」咁樣冇問題，我覺得應該
但跟住哂真係唔多鍾意
又唔係咩名店，我睇岩就會問啦
煩住哂仲冇心機睇
同佢講［我自己睇得啦/我睇睇先］多數都唔會再跟，唔識趣嘅話,講多1至2次就會走
1個讚
入到去比sales跟住我即刻走，好似比人當小偷咁好唔舒服
1個讚
其實係咪特登。
有啲客鍾意俾sales服侍，佢哋多數大手筆。
唔鍾意嗰啲通常買好少或者無幫襯，於是專登用呢招趕人走
d上年紀嬸嬸好鍾意有sales跟
我係u記(冇錯係uniqlo!)見過兩個嬸嬸要求個u記妹妹跟住佢地，每拎起一件就問佢點襯，會指個妹妹去拎唔同size俾佢地睇
同感~
通常見到咁積極又自以為是既sales 會即走
試過我去屈臣氏無聊睇野
突然有條老女人走黎sell mask 呀cream 呀果d 保養品
又無啦啦問我係咪就黎四十歲
真心覺得無禮貌
嬲到即刻走人
1個讚
我都覺得係專登，舖頭計過晒數，跟住客會賺多啲，仲可以順便做人肉cctv 唔駛怕人偷野，兼可以趕走唔想幫襯嘅客，一舉多得
2個讚
咁真係好冇禮貌，我試過俾啲賣化妝品 sales話到塊面體無完膚， 其實咁樣咪盞個客唔買嘢。
2個讚
係呀係呀
我都覺得係專登想令你以為好有需要用佢d 產品先咁講
但愈講愈令人感到冒犯
1個讚