該名港男日前在香港討論區以「女朋友嫌棄我買兩餸飯畀佢食」為題發文，指女朋友日前放假又不願外出，因此要求他購買外賣到她的住所，「佢又唔講佢想食咩，咁我咪求其買」。樓主續指，當自己到達其住所後，「佢打開個外賣見到係兩餸飯，就黑晒面，話做咩要買埋呢啲畀佢食，又嫌食cheap晒」。樓主直言，「其實我都唔明點解女朋友咁嫌棄兩餸飯！兩餸飯有咩唔好呀？又好食又抵食，又平又大份！有啲仲有嘢飲送」，又指思考了很久亦不理解兩餸飯有何問題，並指「買個兩餸飯畀女朋友食，佢都要畀說話我聽」，又指「兩款餸都冇一樣啱佢食咩？定下次我叫三餸飯唔知佢會唔會開心啲呢？起碼貴多幾蚊」。
相關帖文隨即引起熱議，不少人批評樓主的女朋友，指「好港女」、「唔同世界嘅人 」、「恭喜你有個高貴女友，你應該去五星級酒店買外賣先至合佢身份」、「食龍蝦鮑魚雙餸飯好無？」等。有人指出，「其實兩餸飯幾好食呀，係唔係你買果間太難食」、「買兩餸飯都有技巧，買牛腩蘿蔔、炸雞翼一定難食，穩陣一定係鯇魚、菜心牛肉」、「可能嫌食兩餸飯 cheap、啲餸冇益又太多味精？港女中意去高級餐廳食飯」、「咁都嬲，其實你地拍咗幾耐？」等。另有不少人則建議「揾過個唔會嫌棄你買兩餸飯嘅女朋友啦」、「分手算啦」、「分手啦，大家都唔夾」等。
下次開餐前，加番三支蠟燭，飯唔啱食食個氣氛都夠飽。
哈~使唔使買埋元寶同香?
下次買三送飯唔岩食
即刻拎出黎問佢要唔要食其他 
又係睇落好少事, 但見微知著嘅兩性問題, 大家期望值差太遠
女方可能就係想睇下我唔講你會買D咩嚟比我食, 期望高左, 心諗拍拖都買兩餸飯 = 是但求其唔上心, 結左婚都唔慌有好日子過, 一盒飯已經可以睇到將來…
男方就可能覺得兩餸飯平靚正, 是但求其又一餐, 自己平時都食開, 你唔講食咩咪我揸主意
兩個世界嘅人唔願意磨合真係分手好過, 但唔好期望是但求其果方會趕上變成精緻, SOPHISTICATE果方, 只能係女方接受男方就係是但無要求。
其實我明女方諗法, 我自己都係想食得精緻唔介意駛錢嘅人, 我唔知其他女人係咪咁, 我會買D靚餐具, 講究氣氛, 擺盤, 唔會餐餐係咁但自己放假煮下飯仔真係會開心減壓, 如果另一方係牛𡁻牡丹, 無情趣無儀式感係會失望, 我覺得我都太遲明白, 有時唔一定會搵到同頻道嘅另一半, 一個人過仲愜意
6個讚
我都鍾意儀式感，但如果只係偶爾一餐外賣，又冇乜所謂啦，自己有時都頹到食杯麵。真係要睇下個男人係咪成日都係咁～
Btw,報道入面有人話唔好揀牛腩同雞翼，但我好鍾意食
我屋企嗰個又係咁，我買外賣會大手入 
仲有飲品甜品，又唔係成日食，開心啲嘛，要求其不如淥麵啦。
一定會啦, 我諗人人都會有想快手搞掂一餐嘅時候
兩個人生活最慘就係一方要有儀式感, 要精緻生活, 但另一方完全唔GET, 仲覺得你嘥錢 (用自己錢都有說話聽 
)
好似我自己為例, 我都唔係話好講究, 會買下 LC, VERMICULAR, ARABIA, IITTALA, 但另一方覺得用佢老母剩落果D"景德鎮青花瓷" 已經得, 咁其實個距離唔止係一個世界
3個讚
其實對食物有要求唔可恥，我都係鐘意食好西既港女黎
不過最驚係有要求又唔直接講又要人估，人地又唔係肚入面條蟲點可能下下估中
呢個都係磨合過程, 你唔試下又點知對方咩"底線"
問題係同期望有出入時會點處理
係，所以睇夾唔夾。可能有種人係鐘意個種心靈感應心意相通，覺得好浪漫個種
我覺得十個男人八個都唔會講究用咩碗，另外兩個可能基基地或者屋企背景好，跟慣阿媽家姐咁講究
1個讚
睇到你d碗相笑左，係咪所有奶奶同呀媽屋企都有呢款碗，想當初我新屋入伙時佢地又係好熱情咁幫我買左一堆呢d
1個讚
內文寫左女方唔想出街，叫男方買外賣。可能佢expect 起碼譚仔掛
講到尾女方話要叫外賣，就唔好expect 有幾好餸，男方外賣半島你仲嬲啦。
一就講到明想食乜野外賣，成件事唔關儀式感事，一定係女方問題
1個讚
我都覺
自己又要懶出街
又想男友做埋foodpanda 果份速遞半島set dinner?
人地買上黎又嫌cheap
我都覺條女唔抵幫
2個讚
真呀，男方大可以幫女友叫food panda 解決，但都專登親自買到上樓，真係算好好啦
2個讚
