怕愛兒輸在起跑線禁學結他 港媽:係基層先會學

該名港爸日前在香港討論區以「老婆話學結他好基層,唔比阿仔學」為題發文,提到小朋友現時需要參加很多興趣班,而太太早前已安排兒子學畫畫及劍道。他認為,小朋友可以快樂成長更重要,但太太卻堅持不可以輸在起跑線上。

他又提到,一家三口日前在街上看到有人busking彈結他唱歌,兒子認為對方很有型。他隨即回答指,「咁等爸爸遲啲帶你去學結他」,並指太太當時未有回應。直到回家後準備睡覺前,太太突然認真地表明不願意讓兒子學結他,並指「結他依家係基層先會學,唔想俾錢人就自己去上youtube學個啲樂器,幫唔到阿仔入學。」

港爸續指,太太希望安排兒子學習單簧管,因為「睇落去比較上得大場面」。港爸又指,自己當年彈結他時,太太「明明話好charm好正」,不理解現時為何會變成基層才會學習結他,「聽落去其實好un(哽)耳」,並詢問「女人變咗中女之後係咪都會咁樣跳晒制(掣),唔講理性。」

相關帖文隨即引起網民熱議,不少人批評其太太的說法,並指「你老婆對樂器認知太膚淺,跟佢肯定輸在起跑線,為入學加分除樂器外還有很多方式可取,為孩子快樂成長投其所好學結他也是一種好方法」、「結他好基層???傳統結他玩熟後可以玩電子結他,夾band」等,亦有人認為「坦白講,除非係想入啲超級名校,學什麼樂器對入學唔會有影響的」、「開心就好,做自己興趣先可以100%投入」、「最緊要佢有興趣學,學啲唔中意的,小朋友唔會有心機練」等。

有人則指樓主應跟從太太的想法,並指「唔想家變,聽老婆講,係唯一生路」。另外,有自稱為父親的網民分享指,兩名兒子就讀直資小學,並指「咩樂器學得叻都好有型,但係如果你老婆唔係咁嘅唸法,咁你都係由得佢喇,否則就此家無寧日,以後有咩唔如意嘅事發生喺個仔身上,佢都會賴落你度。以後你就經常會聽到:『都話咗嗰時唔好捭個仔學結他㗎喇!XXXXXX,下刪一千字』」。

而家d家長好現實,幫唔到小朋友入名校既就唔學。
興趣班已經唔係為興趣。

5個讚

擴張句子:幫唔到小朋友入名校既樂團就唔學。

興趣班=無cert=浪費時間

3個讚

呢位港媽似乎唔係好貼市, 單簧管一個團有10支以上都唔奇, 有幾上得大場面呀? 唔係貶低CLARINET 但應該唔係佢心目中可以獨步武林果隻囉
我都覺得玩樂噐只要玩得好, 咩樂器都可以好有型, 早排聽CONCERT 聽到個吹口琴都出奇入化型到癲
但如果FOR升中名校, 玩BASSOON DOUBLE BASS 可能有用D

1個讚

我諗住比個仔學結他/Bass第時媾女用:see_no_evil::see_no_evil::see_no_evil::see_no_evil:

但我仔話想打鼓多啲:joy::joy::joy:

7個讚

係幾CHARM嘅, 我細佬呢2樣都8級, 最難得係自學, 無乜比過學費, 識音樂做人都有D調劑

好叻喎,證明佢真心鐘意呢2樣樂器。

係,我覺得學咩樂器無問題,音樂無分國界,更無分高低。

呢個都係我領悟, 學樂器真係要真心鍾意, 因為你迫到佢學, 但迫唔到佢練
我細佬果時中學真係日日彈, 搞到成屋好嘈, 反而我地係叫佢唔好彈咁耐

1個讚

彈得好有咩問題? interview 對住 Miss 情深款款咁彈首好歌,以後就不用太努力了。

就係係咁先好,唔需要一定係最叻先至有機會入團,

同小提琴一樣,可以有好多個位。

1個讚

我當然知, 我小朋友都學緊單簧管, 我嘅意思就係話呢樣唔係好STAND OUT嘅選擇, 果位港媽話要幫到入學就諗多左

係咁架啦!
當小朋友仲細嘅時候,
學每一件事都「幻想」可以幫到佢升學,
攞埋咁多證書,
但到最後都係自己嘅一廂情願諗法。
:thinking:
近乎『大抽獎』嘅派位機制,也不能改變家長嘅心態。

2個讚

其實學音樂除咗為考cert仲有咩用?
我細個學琴,其實老套D講句,除咗陶冶性情之外,我唔覺有咩用,除非本身真係好有興趣同天份就話啫

普通打工仔就冇乜用,但有時創業/副業會有用。我識朋友自己好鐘意畫畫,開左畫室,先唔講有冇賺大錢,就咁自給自足做緊鐘意既事已經好正。

2個讚

要扭盡六壬做咁多野幫個仔脫離基層
好欣賞佢嘅努力

香港家長不嬲都現實。

我有朋友直頭係個女小學時,在打探目標中學嘅樂團差咩嘢樂手, 先至叫個女去學。

呢位港媽正宗係失敗既教育思想

1個讚

有無打聽埋邊個樂器老師主理,然後報單對單學?
我女以前學校係咁,不只音樂,運動田徑都係。
睇定中小學校隊外援教練係邊度教,幼稚園已經跟定先

2個讚

其實不如佢地了解下「高層」學緊d咩先好話基層既人啦!:joy::joy:本身係草根就扮上流

近年超多人學劍擊就真

我哋乜樂器都無學都有齊咁多間神校offers​:joy:

1個讚