我近少少…小朋友幼稚園要整環保花燈，我想攞奬，好俾心機，兩個細路加埋，有五個中秋節都要整，一共整咗好似八個，有兩三年都有冠、亞軍。
到佢哋升晒小學，中秋就係華服日，又要花心機搵華服。學校搞猜燈迷我就去做家長義工幫手搞攤位。嗰陣我對呢個節日都有少少不安，因為仲諗返起細個整花燈搵廢料整嘢用咗幾多時間。
不過今年無再不安了
仲有諗返起啱啱出嚟工作，有少少錢，學咗潛水，中秋就係潛水嘅好時候，因為啲水清，上潛水會架船有月餅食，仲有有一年好似連續去咗兩日本地潛水，都幾開心，不過都係好耐之前嘅事
預祝你生日快樂！
小學時係屋企煲蠟，以為無事，點知啲火升到好似天花板咁高，我大叫，嚇到成個人震晒。
亞媽即刻係厠所攞地拖，一下就整熄個火，以為會比佢鬧爆，點知無鬧過我。
呢世人惟一一次覺得亞媽好型。
以前細個阿婆每逢中秋就會比十蚊我地每個孫去“買燈玩”，到宜家我女都生埋，佢都仲有繼續比十蚊我地
兩年前八月十四啱啱足月，健康院話我肚細要入院，諗住住一晚就出黎過節，點知醫生話要催生，我仲特登留返個心愛嘅芝麻流心月餅諗住中秋正日先食，結果無得食，當年成日同我女講追埋月先好出世，如果唔係我就蝕左產假，佢最後真係追完月八月十七先出世
都係見人燒下火球呀，人人走哂出嚟發哂光咁，同埋超多人
細個住井型公屋，中秋d細路會係d欄杆痴晒一支支蠟燭，好靚
多謝晒…我願望所有真香港人平平安安
2個讚
中學時中秋可以出夜街 但其實冇咩野開 都係hea行已經開心
我屋企人細個嘅時候都試過
第一年同老公、bb 過中秋，喺娘家食完飯，返屋企同老公鬧咗場大交
中秋「大藍水」
1個讚
童年時阿媽一早幫我哋沖晒涼，然後去屋企附近紙扎店買燈籠，以前樓下公園仔好多人喺度賞月，掛起晒燈籠好有氣氛，但阿媽從來唔比落街，只係喺屋企個鐵籠（當時未拆）玩燈籠，望住下面啲人賞月！
以前讀書時，中秋係唯一可以攞正牌出夜街嘅節日，不過嗰時細個，就唔鍾意同屋企人報行蹤。
中學有一年玩到半夜兩三點先返屋企，我哥哥嬲我咁夜返都唔講聲，不過佢都有落樓接我，我地嗰時住井字型公屋，喺電梯大堂等𨋢時，哥哥仲嬲緊我就企都好遠，又唔同我講嘢，我地好似唔識咁。
當我地等緊𨋢時時，就有個男人喺度行嚟行去(去完大井又返𨋢口去細井，然後又過返大井，來來回回於兩個井同𨋢口)。
到架𨋢嚟，哥哥同我繼續分開企好似唔識咁，臨關門時嗰個男人就衝入𨋢企我後面，但佢無按樓層制，而且好生面口，都好肯定唔係住我嗰層，我同哥哥都互打眼色覺得條友有古怪。
到我地嗰層出𨋢，條友無出嚟，我地個單位最近𨋢口，可以聽到架𨋢嘅聲，我同哥哥都唔敢開門入屋住，聽到𨋢門聲係等到自然關門嗰刻被㩒返開，但無聽到有人出嚟，過咗陣先再關返，然後哥哥出返𨋢口睇真係無人，佢先叫我開門入屋，然後佢就衝返入屋。
自始之後，夜返都一定會話俾屋企人知，屋企人都一定會接我。
該主題在最後一個回覆創建後90天后自動關閉。不再允許新的回覆。