愛靚唔愛命 打豐胸針墮陷阱

擁有豐滿的胸部,是不少女士的願望,為追求玲瓏曲線,一名年輕少婦「愛靚唔愛命」去年接受美容院注射式豐胸療程後,胸部「由A CUP增至C CUP」,但胸部出現劇痛不適,求醫後發現所注射的並非美容院聲稱的透明質酸,實為與「聚丙烯酰胺水凝膠」(PAAG)類同的物質,醫生更建議盡快開刀抽取體內物質,否則恐致發炎等併發症。少婦坦言沒料到療程會有併發症風險,「覺得好似畀人放咗有毒嘅嘢入身體咁」,墮入陷阱令她飽受困擾。

24歲的X有一名年約1歲的兒子,她自感胸部細小而自卑,期盼可透過豐胸改變胸形。去年在社交平台留意到有豐胸廣告,網店「Revival medi pro」指可利用「透明質酸豐胸療程術」達致豐胸效果,維持3至5年。X選定「Los Deline」豐胸針,並經WhatsApp聯絡相若療程,職員指費用為3.8萬元,需先付2,000元作訂金,職員才會公開地址,X遂以「轉數快」落訂。

轉數交易 無提供收據

其後於去年12月21日,X到達美容院接受療程,惟當到達店舖後,發現公司名為「EA Beauty歐亞美創集團」,而店內的價目表並無相關豐胸療程的資料及價錢。職員著X以「轉數快」直接向醫生付款,由於「轉數快」上限為一萬元,醫生著職員跟X「落樓下撳櫃員機」,惟X過數後職員並無提供收據。

胸部劇痛 職員唔認帳

X續稱,療程後數日身體不適,胸部持續痛楚,「好有壓迫感」。她向職員反映,職員說:「一星期內少少唔舒服係正常」,她不以為意,惟持續痛感令X不安。她再向職員反映,職員告之X自己都有打該款針:「我都無事,你唔使驚!」她形容該種痛感由最初的壓迫感,演變至「抽住抽住、閃下閃下嘅痛,就算唔郁都好痛」,甚至連左手亦時常感到劇痛,無法提取重物。

X最初食止痛藥,惟劇痛難耐,她向多名醫生求醫,又到私家醫院做磁力共振。醫生告知,涉事醫生疑為她接種左胸時,誤將液體打入左胸肌肉,而右胸則未有此情況,兩邊不對稱;且該支針的成分懷疑是與PAAG類同的物質,而非透明質酸,建議X盡快開刀抽取體內物質,否則恐致發炎等併發症。X向網店職員反映,惟職員反問:「是否有報告證明身體出現後遺症?」又指X已簽同意書,清楚了解風險,「若客人身體無咩事,唔建議抽番個物質出嚟,無謂整多個傷口。」X要求取回付款證明,亦遭拒絕。而X一直未能找到涉事的何醫生。

「報警搵消委會都無用」

X曾到「EA Beauty歐亞美創集團」與職員交涉,職員指美容院並無收她錢,「有事你應該自己搵番個醫生!」她又向消費者委員會求助,但無單據,消委會未能受理;X亦已向醫務委員會投訴。X形容事後「好傷心,本身想同美容院溝通睇吓點解決」,惟對方迴避,「無論報警、搵消委會都無用,香港無法例監管美容業,好無助!」

1個讚

平胸就平胸啦,做乜打假波啫!

1個讚

個仔咁細,個呀媽咁急去豐胸?!

歐x好似好出名咩喎…事主太年青,可能冇聽過。

生完縮水掛

咁有過數記錄㗎喎…
冇單又蝕將啲…
其實我已經將fb廣告等於騙子:see_no_evil:除非我本身已知嗰間公司啦…

2個讚

見到好似係某台選小姐指定美容院

有自信的美更吸引,外面比你靚到一時靚唔到一世

1個讚

岩岩先收奶,攪D咁既野 :face_with_spiral_eyes:

胸細會冇咩奶水

我空間成咁好慘

先唔講佢點解去隆胸同埋呢間野有無前科
聽到呢度已覺得有問題啦
唔俾錢唔公開得地址?!

2個讚

我有啲衰咁覺得事主有點蠢:see_no_evil:(當然間嘢都pk嘅)

要整啲嘢入身體,點解可以求其搵間,要俾錢先會講地址已經夠怪,去到間嘢名又唔同,又要過數俾醫生,都唔覺得怪架咩?
要食落肚或者整入身體嘅嘢真係要諗清楚。

1個讚

我都覺
而且俾左錢仲要無收據
真係當街市買棵菜?

人奶多少唔關個胸大細事架

3個讚

要靚都要有腦

該主題在最後一個回覆創建後90天后自動關閉。不再允許新的回覆。