苗圃有好多感人至深嘅小故事
有人陪爸爸返工 有人陪阿仔返工
呢個客 好搞笑 要我地每星期去探佢地一次
第一次去探大家 因為大家同target距離好遠
所以想我去了解下大家有咩困難
今日再去探大家 就係想我去讚下大家
有一個人 已經爆數再賺bonus 一路行
經理一直係度講 佢一日賺左169鎊 最勁個日用八個鐘
賺左成200鎊人工 佢見個個位好做 拉埋佢朋友去做
朋友都有一日賺到bonus
然後去另一邊 探另一group人
大家都接近target 開始摸到窿路
最記得同個爸爸傾計 當時係佢哋兩夫子一齊黎搵工
阿仔17歲 未知做嘢好定讀書好
而未夠18歲 唔做得工廠 
爸爸就陪佢一齊返工
每日揸45分鐘車 同阿仔一齊返
返工從來都係辛苦 賺bonus個個
都話有機會俾啲樹吉到 做室內 又要成日彎腰
做工廠 就長時間重複動作 又要企
今日同爸爸傾計 佢話阿仔想返去讀書
知道搵錢辛苦 係 當年我做左一陣暑期工
去左做sales 企左16個鐘一日 返六日工
半個鐘食飯 做完一個月 我就明白左 我要俾心機讀書
我記得第一次去苗圃 阿仔話 佢覺得佢拖慢左爸爸
我好記得呢句說話 我覺得好有愛 好感動
作為父母 尤其我諗有個青春期嘅仔女
總會有一種 無論我幾愛你都好 你好似覺得我唔愛你嘅感覺 但個一刻 我好真實咁感受到
阿仔知道爸爸好愛佢 亦都深深體會到啲人成日講
搵錢唔易架
英國有一個地方 我覺得幾好
暑假佢地會鼓勵學生出去返工
我以前都好鼓勵學生去返工（尤其我啲學生讀書唔叻
）我好記得 當佢地打完暑期工 成個人好似成熟左
無咁任性 可以話妥協 但亦都可以話圓滑
我好記得 我上次同經理講 呢個第一次返工
然後經理指住幾個女仔 話佢地都係17歲暑假黎返工
我份工 又係做到死 收入同工作量不成正比
但令我願意留係呢份工 或者係因為
我遇到好多人 而好多人佢地嘅人生態度
做人處事 價值觀 都好值得我學習
放低自己一切 到陌生地方生活 從來都唔容易
我好記得以前有個學生鬧佢阿媽出糧都唔買iPhone
然後我講左句 你知唔知一部iPhone係等如你樓下個保安做六日 唔食唔著唔洗錢 嘅一個月人工？
我記得有一次坐小巴 車費6蚊 個學生無散紙
就入左廿蚊落去 坐低 個小巴司機好肉赤
係咁講 下次先俾啦 一陣停車你撩返張廿蚊出嚟啦
無散紙出聲囉 搵錢好辛苦架 無啦啦做咩要洗無謂錢
我地會成日責怪年輕人 食米唔知米貴
但掉轉頭諗 年輕人有冇真心了解過 錢有幾重呢？
（我個仔成日都覺得我放工返屋企就有錢買玩具
有一次我放工 佢好開心咁拍手話 我地有錢lu)
仲有一對母子 我係Glasgow open day認識佢哋
我一直以為佢地係兩夫婦 然後個媽咪話我係佢阿媽 （希望我將來都可以同我個仔似兩公婆）
佢哋最後落左黎Crewe
我個日同佢一齊返洗衣廠
我話你個仔肯同你一齊返工
已經好乖仔
做左recruiting 一年 見好多阿爸或阿媽帶個仔黎見工
好多都係個仔懶懶閒 阿爸阿媽就好落力
好少有呢兩個仔咁乖 肯陪阿爸阿媽返工
當然 邊個陪邊個就唔知啦 但陪下陪下 感情咪好囉