緊急求助熱線（英國都有）

[LeslieW]

如果發現自己受 PTSD 嚴重影響，例如不斷發惡夢重演畫面、經常幻聽到現場尖叫聲等等，請即：

1. 遠離相關新聞及片段；
2. 向身邊親友、以至是社工等專業人士求助。

明愛向晴熱線 18288
協青社 9088 1023
Open 噏 9101 2012
香港青年協會 – 關心一線 2777 8899

Log in or sign up to view

7月28日晚上一場演唱會發生舞台意外，香港紅十字會對意外表示難過，並向傷者致以深切慰問。

本會已因應狀況啟動"Shall We Talk"心理支援熱線，為有需要人士提供情緒支援。所有人士包括工作人員、現場觀眾或從媒體得知有關消息的人士，若因事件而引致情緒不安，均可致電。服務由已受相關訓練的職員及義工提供，並由臨床心理學家作出專業支援。

熱線號碼：+852 5164 5040
熱線服務時間：

• 即時（7月29日淩晨）至7月29日晚上10時正
• 7月30日上午10時正至晚上6時正
  市民亦可以WhatsApp 短訊 +852 5164 5040或Telegram @hkrcshallwetalk預約服務

*大型意外突然發生在眼前，大家或會不懂反應、感到擔心或氣憤。
若你感到困擾，請：

1. 暫停觀看相關片段、社交媒體或新聞
2. 找朋友傾訴或陪伴
3. 照顧自己，盡可能休息

若情緒受困擾，請聯絡心理學家或心理急救員傾訴。祝福所有傷者早日康復。
#香港紅十字會 #心理支援 #心理支援熱線 #舞台意外

Log in or sign up to view

覺得唔舒服就打去傾吓計，唔洗諗咁多
英國部份喺2樓

再加一個放鬆法，【腹式呼吸法】
可以幫助放鬆心情、容易入睡

• 躺平床上> 正坐> 站立
• 慢慢用5秒吸氣，盡量用鼻吸氣，放鬆，腹部脹起。因為橫隔膜向下壓便可以腹部脹起
• 慢慢呼氣，用口呼氣。放鬆，腹部收起。因為橫隔膜向上便會腹部收起

你會感覺到全身肌肉放鬆，心跳由激動變得放慢

[LeslieW]

【英國鏡粉入一入嚟】
整個社交媒體都係唔同角度嘅片段，我都出現panic attack。如果真係出現嚴重嘅創傷性壓力症，一定要搵專業人士求助。Hongkongers in Britain 英國港僑協會 朋輩支援小組嘅同事留意到，有唔少英國鏡粉都開始出現唔同程度嘅情緒、身體反應，又擔心因為語言文化背景嘅差異，大家可能唔知搵咩人傾訴好，所以想提提大家，港僑有「朋輩支援傾訴服務」啊—

Telegram @hkb_mental_peer_support
Signal/WhatsApp 07936 998707
（上線時間係星期二、四 1000-1400&1800-2200；星期六1000-1800）

當然隨時PM我都可以～

以下分享同事嘅一段文字：
「知道大家內心仍然充滿擔憂、恐懼、嬲、難過等等不安心情，請大家暫停唔好再睇相關影片，唔想令到大家再不安下去。
或許大家今日瞓得到或者訓得唔係咁好，好多畫面喺裏面不斷出現，發惡夢或者好似身歷其境，放心正常隨著時間應該會有好轉，畫面會越嚟越少，顏色亦都會變得越嚟越淡，出現頻率愈來愈小。
如果會令你觸景傷情，暫時唔睇演唱會影片或聽mirror歌住。
當覺得個心好囈、難以呼吸嘅時候，嘗試比自己搵一個安靜嘅地方慢慢嘅深呼吸，嘗試比肌肉慢慢放鬆。
如果想嘅話建議可以搵信任朋友傾自己感受情緒，或者你想講嘅嘢。
如果發現兩個星期後情況冇大嘅改善，請搵專業人士求助。」

Log in or sign up to view

[Conniechiwa]

多謝分享

[LeslieW]

我唔識安慰大家，所以呢個post我最多只會up吓
大家圍爐自便

[shalom]

謝謝你…
睇完報道，個心真係唔舒服。
希望傷者大步檻過，回復健康。

[goodvibe]

未瞓到
不斷睇有無新消息
頭先睇ig live
望住舊野跌落
跟住tg 勁多片
以為亞mo 就咁……
許願寧願鏡仔以後唔好開演唱會
都唔要人有事
睇到Update ，知道無生命危險
就開始擔心鏡仔情緒
遲一步、早一步，個電視就跌落佢地頭上面
亞撈、兒登，之後就到AK , Lokman , 王勁出場
唔知佢地依家係紅館入面情緒點樣
呢一關好難過
希望佢地能好好跨過

[LeslieW]

其實瞓著之後，我哋都係冇意識地【腹式呼吸】
不過首先要瞓得著
多練習，方便情緒波動時使用

[LeslieW]

Log in or sign up to view

睇到MIRROR演唱會意外嘅新聞，我諗好多人都瞓唔著。無論大家係喺現場定睇片，都係全體一齊經歷緊trauma，好可能會受到情緒困擾。

以下第1-5點資料節錄自英國皇家精神科醫學院 (Royal College of Psychiatrists)對遇到災難事件的人所提供的資訊，有朋友抽取咗一啲內容譯咗中文及加插標題，標示咗註嘅括號入面係譯者嘅意見。

另外，喺最尾有啲會做情緒支援嘅本地團體資料，如果有需要可以搵下佢哋幫手。

————-

以下內容並非正式醫學建議，如有需要請聯絡專業人士協助。

【 我睇完條片覺得好恐怖呀，一聽到Mirror啲歌就諗起條片，咁係唔係正常㗎？】

當人遇到災難事件，係會有機會出現以下情況嘅：

失眠、發惡夢或經常回憶起災難片段
想到相關事物時會感到難過
刻意迴避事件相關的記憶、感覺、處境及人物
失去與事件相關的記憶
感到難過、恐懼、憤怒、內疚及羞愧
對自己、世界及整個世界都有負面情緒，怪責自己或其他人
難以感到快樂、滿足或愛
表現出與平時不同的行為，例如對平常喜愛的事物失去興趣
感到與他人疏離
注意力下降、易怒、作出莽撞或自毀的行為
容易受驚、草木皆兵、對身邊環境感到高度警惕
肌肉疼痛、頭痛、腹瀉、心跳異常等

【 喂，咁如果我有呢啲病徵係唔係就等於患上咗創傷後遺症 (PTSD, Post-traumatic stress disorder)呀？】

經歷災難嘅人大部份都會喺頭一個月出現PTSD病徵，呢啲都係當你遇到危險時身體嘅正常反應，會出現呢啲反應係因為你個腦想保護你遠離危險。

不過，出現病徵並不一定等於患上創傷後遺症，事實上大部份人的徵狀都會隨時間而減退。有啲人幾日就無事，有啲人可能需要幾個星期或幾個月。

就算一個月後仍然有出現病徵，但徵狀有減輕或好轉，咁都係正常嘅事，未必需要睇醫生。但係如果成個月都一直無好轉，或者出現病徵持續三個月以上，咁就要睇醫生或尋求專業協助喇。

研究發現有社交支援 (social support)同埋能夠喺低壓環境 (low stress environment)復元嘅人，會無咁容易患上PTSD。（註：如果覺得自己唔妥就記得搵人傾下，同埋盡量令自己唔好太大壓力喇 ）

【 我睇完條片暫時情緒都唔算好困擾，係唔係就一定無事？】

PTSD病徵可以係即時出現，但有時係會幾星期甚至幾個月之後先出現，最長的話一般都會喺事件發生後六個月內出現，雖然有啲會係六個月後但唔普遍。

（註：多啲留意自己，觀察自己情緒，或者身體會唔會出現一啲訊號，好好照顧自己 ）

[LeslieW]

（承上）
【 我睇完覺得好困擾呀，我可以點做呀？】

畀啲時間自己：經歷完創傷嘅人係需要啲時間去接受件事，唔好畀太大壓力自己，亦唔洗迫自己要馬上開心番。

傾吓件事：雖然好可能你會唔想講任何同件事相關嘅嘢，但係研究顯示傾吓件事同埋你嘅感覺，係會有助增強你嘅承受能力 (more resilient)，專登避開唔講件事反而可能會令你感到更差。

搵啲同伴圍吓爐：同啲共同經歷創傷嘅人傾下係可能會對你同佢都有幫助嘅，不過記住每個人復原嘅步伐都唔同，唔洗比較邊個傷心啲。

避免自己一個，盡量搵人陪吓你：朋友又好、屋企人又好、或者任何可信嘅人都可以，唔一定要做啲咩特別嘢，純粹搵多個人陪下你都會對情緒有幫助。同時如果你嘅狀態太差，仲可以搵佢哋幫手處理一啲生活瑣事。

保持日常習慣：盡量保持番平時嘅作息或習慣，注意下自己飲食或睡眠質素有無受到影響。

留意自己嘅情緒：呢幾個月多啲注意自己情緒變化，睇下自己嘅情況有無好轉或變差。

好好照顧自己：情緒影響狀態，狀態唔好就好容易發生意外，所以萬事要小心。另外，避免以酒精或藥物去麻醉自己，因為呢啲嘢治標唔治本。

唔好睇咁多相關資訊：明白大家可能會緊張事件發展（註：由其是今次事件係頭條中嘅頭條），但係如果你睇完會覺得不安，就最好遠離下啲相關資訊。

【 我自己唔算好困擾，但我朋友超級唔開心呀，我點先可以幫到佢？】

陪伴：問下朋友想唔想有人陪，如果佢話暫時想自己靜下，就話畀佢知你隨時都喺到，叫佢有需要就話你知。唔好夾硬迫佢畀你陪，但可以喺適當嘅時候換個方式問下佢，睇下佢有無改變主意。

聆聽：如果佢唔想講唔洗迫佢講，但如果佢想講的話就專心啲聽，唔好打斷佢講嘢或加太多個人意見。

問問題時注意語氣：對話中如果想問佢嘢的話，唔好帶有任何批判嘅語氣，盡量空泛啲 (general)。

睇吓有咩幫到手：有需要的話可以幫佢手買飯、執屋（註：於我經驗嚟講，如果朋友失眠的話你幫手morning call佢都係一個能夠幫到佢嘅辦法，但當然係要先得到佢同意而唔係無端端朝早打去叫醒佢）。

以下請盡量避免

有你講無佢講：如果你嘅目的係安慰朋友，就畀多啲空間佢講自己嘢，唔好同佢爭嘢講。

「好彩佢無事」：所有災難都係不幸嘅，唔好話好彩邊個邊個無事，咁做可能會令倖存者感到內疚。

「你都唔係好慘啫」：唔好用創傷嚟做比較，雖然你可能係出於好意安慰，但聽到嘅人會覺得好唔舒服。

【 我仲係好唔開心，可以去邊到尋求專業協助？】

一講到要睇精神科醫生，可能好多人都覺得好抗拒，如果想搵人傾下偈，可以聯絡以下熱線

明愛向晴熱線(24小時服務)：18288
生命熱線 (24小時服務)：2382 0000
香港撒瑪利亞防止自殺熱線(24小時服務)：2389 2222
東華三院芷若園危機介入及支援中心熱線(24小時服務)：18281
香港心理衞生會心理健康資訊熱線：2772 0047
醫院管理局精神科熱線：2466 7350

好好照顧自己，明白係會難過但你唔係孤獨㗎，有餘力就關心下身邊嘅朋友，大家互相扶持依靠，保重！

內容來源：

A）Coping after a traumatic event | Royal College of Psychiatrists

B）Post-traumatic stress disorder (PTSD) | Royal College of Psychiatrists

[Luckystar]

希望情緒受到困擾既朋友仔可以睇下

[LeslieW]

Log into Facebook

觸目驚心之後

昨晚演唱會的意外震驚了無數香港人，我和大家一樣都正為受傷的舞蹈員擔心，希望他能早日康復，繼續在舞台發亮。

今早在某電台節目中，聽到主持人提到該電台有女職員是昨晚演唱會的觀眾，她因目睹意外而受驚，其驚恐的情緒於今日仍然持續，令她不能獨自留在辦公室內工作，而要站在室外讓自己舒緩。如果你亦是昨晚演唱會意外的現場目擊者，你可以留意以下提及的情況，這可能會為你帶來幫助。

為什麼你會有驚恐的反應？

當你在欣賞演唱會的表演時，基於你對表演者的信任和欣賞，你在心理上是處於一個非常開放的狀態，你過濾不安全訊息的心理機制近乎被關掉。因此，所有外來訊息的吸收都變得暢通無阻。如果你難以明白甚麼叫做心理開放的狀態，那你試想像你在面對賊人時的防衛及警覺狀態，與這防衞狀態相反的就是開放的狀態。

因為心理上處於非常開放的狀態，所以在目睹大電視掉下並壓倒舞蹈員的一刻，大量危險及恐懼的訊息能直接，正面並毫無阻隔地衝入你的腦海。情緒的本質是能量，恐懼的情緒會在你的內心不停混動，形成進一步的恐慌反應，情況就如煲滾水一樣。恐慌的情緒又引發更多的負面聯想，負面聯想又為恐慌情緒助燃，形成惡性循環。

當你內心形成了恐慌的情緒狀態，你對周圍的環境及事物會變得非常敏感。為什麼呢？因為周圍的環境及事物會勾起你對於意外的回憶，這些回憶能以畫面，聲音，觸感，想法及情緒的形式重現，重現的強度令你像重回意外一樣。為了避免這些高強度的回憶，所以你會避開引起這些創傷回憶的連結。你也可能會害怕獨處或靜下來的時候，因為當沒有人或事可讓你分散注意力時，你會更加注視你的內心世界，因而更感受到內心的恐慌，進而恐慌「恐慌」的出現，產生更多的恐慌。

那怎麼辦？

首先，你要知道，一般來說，目擊意外而產生的恐懼情緒通常都會在一至數天內自然消退。換言之，大部分人是會自然康復的。

但是，如果你平時已經是容易焦慮或情緒低落，那你有可能會比一般人容易出現恐慌反應，又或是俗稱的創傷後遺症。

如能及早調整自己的情緒，就能有效地避免創傷後遺症的出現。

1. 如果你對意外仍然有強烈的恐慌或低落的情緒，你可找一個能耐心聆聽你的人，抒發你的感受。重點是，能耐心聆聽。這就像是把裝滿滾水的煲蓋打開，讓情緒的負能量散走一樣。耐心聆聽你的人能幫你降溫，但多多批評或事事判斷的人就會反過來為你的負能量加柴添火。因此，聆聽你的人的素質好關鍵。

2. 若你發覺恐慌的情緒持續影響到你的生活，你會害怕獨處或靜下來，會害怕別人提及有關這次意外的事件或人物，會逃避任何勾起這回憶的事物或地方，那你就要幫助自己清醒腦袋。你可在內心提醒自己，因回憶而出現的恐懼屬於假警號(false alarm)，而不是真危險(real danger) 。這些恐懼是回憶殘留的情緒，它儘管強烈，但沒有真正的殺傷力。你越勇敢去面對回憶，越了解當中的恐懼是假警號，恐懼的能量就自然消散。情況就如看恐怖片，你第一次看恐怖片時會恐懼，但看了四五六七次後，你會知道它只不過是一套電影。回憶不就是我們人生的電影嗎？

3. 當你恐慌的情緒出現時，你亦可以透過深呼吸去舒緩情緒。在深呼吸時，你可把你的注意力轉移到雙腿，就像是用心眼注視雙腿一樣，這對某些人來說更為有效。

4. 如果以上的方法都未能有效，而你的恐慌或低落的情緒持續地影響你超過一個月，那你就有可能要尋求專業的協助了。

最後，祈願好人一世平安！

[LeslieW]

Up
唔舒服嘅朋友，可以打去搵人傾吓偈，唔好客氣

[LeslieW]

Up
唔洗怕羞，打電話傾吓偈，個人會舒服啲
情緒嘅嘢，未必可以一兩次就斷尾㗎

[LeslieW]

Up
Send 定比朋友都得

[LeslieW]

Up
希望大家都用唔著啦
萬一用得著，其實都冇乜嘢，唔洗同佢慳

[LeslieW]

Up吓先