姊妹冇卑人情

話說我前排擺酒, 番屋企拆人情先知有個姊妹冇卑, 因為佢係幫我手收人情, 咁就唔知係咪佢唔記得左卑. 所以好婉轉咁問佢, 最後佢的回覆是佢冇卑, 仲話我搞到佢好尷尬, 同埋佢話想搵我地食飯…(我相信佢意思是請食飯當卑人情)

但我的問題有幾個…

  1. 如果我冇問佢, 其實佢係咪就諗住當冇左件事? (利申: 其他兄弟姊妹全部都有卑)
  2. 如果佢有心想請食飯, 係咪一早同我溝通好? 而唔係我問起先講?
  3. 去別人的擺酒, 我相信卑人情係好正常的事, 應該唔使講出黎掛?

利申: 佢地之前的化妝姊妹裙開門利是姊妹利是全部我都有卑, 甚至送左好多禮物和為左答謝佢地都請左好幾次飯, 我相信每位姊妹我都差唔多使左起碼兩千蚊左右…做新娘的責任, 我相信我已經做足咯, 甚至做多左!!!

我唔係要追收人情,我只係問下係咪整唔見左佢份人情,因為真係搵唔到佢個封,而佢係幫手收人情,免得中間有誤會:sweat_smile::sweat_smile:

佢係唔係第一次做姐妹,或者有經濟困難?

有啲年輕人第一次做兄弟姊妹,身邊又無朋友結咗婚,真係會以為做咗兄弟姊妹就唔使比人情,因為覺得已經幫咗手(付出勞力)。

婚禮都完咗,就算發現人哋無比人情,都唔應該追問啦,人哋嚟飲係祝福你兩公婆,做姐妹仲要特登請假,由早忙到晚,勁累。

你搵得佢做姐妹,應該都係好朋友掛,少少錢就算啦。

52個讚

你搵得佢做姊妹都應該係fd架啦, 仲同人計較果一千幾百… 其實我完全唔expect姊妹會俾人情, 雖然佢地有俾

23個讚

我結婚嗰時係回番姊妹俾嘅人情俾佢哋
佢哋又要早起又忙足一日,都幾辛苦

9個讚

我冇做過人姊妹,都唔知係咪需要俾人情。佢幫你收得人情,都有返咁上下地位啦。好朋友出席婚禮,仲幫你做野,走足全日都應該好感激佢地啦。

你係每位姊妹洗果二千蚊係因為會收返人情用架咩?係因為佢哋幫手,又係朋友嘛。定係你請化妝影相都會諗佢哋有冇俾人情?

3個讚

你同人講無比人情,你真係好核突囉,你想人地比番你呀?結婚請人飲,仲係做姊妹,好心就算喇,仲講番出黎,勁老土。
我當年擺酒,我伴娘同佢男友都無比人情我,我估佢忙得滯無比我,我都算數,請人飲,唔係要人地幫手找數。

30個讚

X2 點解會問?
唔理對方真心唔知,定太忙忘記左,都會令大家尷尬。
佢出到聲請你地食飯都係想補鑊(我唔覺佢大鑊),你仲懷疑人地冇同你溝通好?請人食飯都係yes/no, 需要點溝通?
Any肥,你預冇左呢個朋友

5個讚

X3啦
咩叫請飲呀?請呀!

5個讚

其實樓主係咪要計住人情擺酒回本?搵得兄弟姊妹,其實佢地幫你都忙左一日,你為左一個人無俾/唔記得俾就搞到咁唔開心,真係無必要

3個讚

其實你當人地嚟打工嗎?

7個讚

兄弟姊妹點解會去幫你?因為你錄緊人情牌囉,點解親戚朋輩會去飲?都係比面你同你地父母jar.
你咁鍾意計錢,有冇問過佢地大約幾錢人工?我覺得你要計返時薪比佢地wor

7個讚

其實你呢位‘姊妹’係真係好係熟嘅朋友定搭單湊人數?真係朋友係冇可能‘唔記得’俾,如果只係搭單咁你就問得核突,比著我直情覆都費事

1個讚

之所以我好L 憎擺酒

4個讚

其實我又唔憎,不過劣根性好易出曬嚟囉
我結婚真係 兄弟姊妹團都冇,人多實煩

1個讚

無錢嘅簽個字都結得婚

1個讚

姊妹都要比嘅,不過又冇理由問

1個讚

以家啲人係覺得朋友應該夾錢俾佢哋做show

3個讚

姊妹要俾。無俾係小錯。
但主人家唔可以問人點解唔俾。問咗係大錯。
所以你地一齊做錯,但樓主錯多啲。

最慘係,你哋無朋友做啦

6個讚

樓主好細個?
定係好重視錢?
定係凡要歸根到底嘅人?
咁都問得出口:sweat_smile:

又咁講,個姊妹本身都幾核突,唔比人情

但樓主又唔應該問嘅

1個讚