請問點樣歸依成為泰國佛教徙？自己有帶佛牌，但冇做過歸依。
身邊有香港的佛教徒朋友叫歸依中國佛教，一直考慮緊 因為2個佛教5同，5係5肯食素，因為2個佛教教規5同，5知點做
請問有冇香港的泰國佛教徒 係歸依中國佛教？
或者係2個佛教都有歸依？
請各位師傅 師兄師姐請教。
漢傳係北傳佛教、又稱大乘佛教，經典原文係梵文，古代由天竺僧人譯做中文。
泰國緬甸斯里蘭卡係南傳佛教，又稱小乘佛教、上座部佛教，經典係巴利文，近代有英文同中文翻譯。
我先學北傳後學南傳，兩個傳承都皈依過，都受咗五戒。
如果講三皈五戒既內容，南北傳係一樣。皈依係皈依佛法僧三寶。五戒是戒殺，盜，淫，妄語，酒。
漢傳想皈依的話，多數冇得個別同你皈依，會叫你參加三皈五戒法會同其他師兄弟一齊皈依。南傳就可casual啲，有相熟師傅就可向佢求戒。
漢傳有得只皈依三寶而唔受五戒住，南傳就通常要三皈五戒一次過受。
儀式係中文儀軌 vs 巴利文儀軌。
我問過我的泰國師傅，佢話南傳漢傳一齊學冇問題。
無論皈依邊個傳承都係好事，皈依佛法僧不墮三惡道，你戴開佛牌，可搵吓香港的泰國寺，同師傅傾吓偈，了解清楚三皈五戒意義，好多都識廣東話好慈悲。
2個讚
你好師兄
請問食物方面，你係跟隨泰國佛教還是中國佛教呢？
平日你係念中國的佛號還是泰國的經文？
我沒有相熟泰國師傅 只知道香港大埔有太和寺 但沒去過 不知道泰國師傅肯5肯同我做歸依
請問師兄你是在哪裡找泰國師傅做歸依的？
是泰國和尚還是白衣師傅同你做歸依呢？
師兄 你很清楚2國的佛教事項，請問可聯絡師兄你嗎？請問可否跟隨你一同學佛 謝謝
師兄你好！
講返啲背景。我自小有親戚住荃灣既漢傳寺院，所以好細個就接觸漢傳，都有上漢傳既佛理課。30幾歲時去泰國偶然認識一些南傳僧人，發覺佢地修行很好，就學埋南傳，在香港搵一啲原始佛教既課嚟上，同泰國那邊的師傅都很多聯絡，能力所及會幫佢地做事，以前仲有得旅行既時候，會放假過泰國搵佢地。
我食嘢方面是跟漢傳，不食魚肉、五辛、蛋（蛋呢樣好多時守唔到）。已經十幾年了。我漢傳的道場強烈建議五戒弟子素食，但冇硬性規定，呢方面嚴不嚴，視乎個別道場，例如志蓮要求五戒弟子一定要持素。
平時我多數唸中文的經，地藏經，金剛經，大悲懺悔文。南傳的經如 itipiso 之類都會照經本唸。但我比較懶，冇定時早晚課，呢方面唔好學我！
我漢傳和南傳都是出家師傅做歸依的，其實未出家（白衣）係唔可以幫人受三皈五戒的。如果有白衣話可以幫你歸依，反而要提高警惕。
香港的泰國師傅，大埔太和寺、元朗大棠寺、元朗崇山新村觀佛寺的住持，都識廣東話，另外下白泥和牛潭尾都有泰國寺，但佢地以嚴格清修為主。
如果唔方便去到新界咁遠，可去九龍城城南道搵師傅，除非天氣惡劣，否則周六周日早上11點幾至午後時間，觀佛寺住持龐師傅都會出去泰國街化緣，佢係第一個嚟香港既泰國僧人，廿幾年前set up咗大埔太和寺之後，十幾年前又成立咗觀佛寺，同佢講廣東話冇問題，可同佢結個緣先，直接問佢想歸依應該點做。如果去寺搵佢，佢化完緣返到寺就係下午4點打後既時間。
學佛就梗係跟師傅學啦，我差不多個個周日下午都會在觀佛寺幫手，想見到我呢條魚毛，或其他好勁既師兄，其實唔難㗎 
。
1個讚
師兄，萬分開心和感激你
我覺得我應該直接去觀佛寺見師傅最正確。
同埋我應該點搵到你？點先知邊個係你？ 謝謝
關於食素問題，我都係睇淨空老法師講過，其實佛祖在世，冇講過歸依佛的佛弟子一定要吃素的，佛說要有慈悲心。
泰國僧人都是托缽僧，眾民供什麼就要吃什麼，不能選擇的。所以泰國人都沒有吃素。吃素是中國的好似是梁武帝改革的，淨空法師說吃素是隨心的。
5辛除了辣椒和芫荽外，其他我都沒有守，因為我不吃辣。芫荽，我跟芫荽味道非常相沖 你懂的。
如果我係九龍黃大仙區，應該點樣去觀佛寺最為方便呢？同埋如果要轉車既話 邊度轉？
同埋我係路痴，認路麻麻
另外想問，師傅你有冇接觸過藏傳佛教呢？
我聽有D師傅講過，雖然可以歸依5同佛教，因為屬於5同國家，但歸依左佛教，就係佛弟子，點都要有個主修的，因為5同國家的佛教，要守的 （戒條）都不同，我在網上見有人說漢和藏都是屬於大剩佛教，但藏傳不用吃素。
我身體怕寒，虛弱，我通常吃豬和雞，我不吃牛肉。我身體虛弱，我不吃肉只吃青菜，我會暈倒和怕冷，和很多很多的白痰
雖然我天生也是非常非常喜歡吃深綠色青菜和沙拉的人 （紅黃綠彩色椒， 車厘子，士多啤梨，藍莓，蔓越莓， 奇異果，牛油果，蘋果， 堅果 ，紅肉火龍（好寒），通通是我最愛）
3個讚
唔好意思，遲咗覆! 其實係因為我都係見你問佛教問題先register babydiscuss, 平時好少登入傾計，今日我先至睇到你個msg 在spam email 度!
嚟觀佛寺方法：朗屏站B2出口，一落地面左手邊就有73號小巴站，往崇山新村小巴，去到總站，下車後沿指示牌行上山，約10至15 分鐘就到觀佛寺。最近換咗一批新淨的路牌係師傅自己寫的。
周六師傅會化緣到好晏才回寺，周日則會4時左右回寺，所以不用太早嚟到，嚟到都係等師傅嚟。
如你嚟到，大門口一直行係大殿，中途右手邊斜路向下有間屋仔是kitchen, 見到講廣東話的泰國女人，可問吓佢阿mieow 喺邊度，又或者有可能直接見到我本人，高高大大紮馬尾戴眼鏡中女，通常著T 恤行山褲淺灰色防晒袖，做嘢身水身汗嗰個就係我。
注意現在寺裏面係冇冷氣咖 ! 記得做足防晒，帶把遮（行山上用），長袖褲 (多蚊)，寺裏有蚊怕水同蚊香，但好多人都係照咬既。另外如果怕貓狗要有心理準備，狗狗好乖既，但會吠吓陌生人咁。
1個讚
補充：如果你嚟寺度求受三歸五戒，最好帶細束花，少少蠟燭同香，受戒嗰陣師傅會叫你擺呢三樣嘢在托盤，有啲儀式感，少少即可。朗屏站B 出口附近落天橋有花店。一兩支拜神花咁就得。千祈唔駛豪華浮誇或大量。
另外鞋要舒服穩陣為主，嚟到你就知寺裏好多地方建築中，有上斜落斜樓梯同泥沙雜物。
有關素食問題，你所理解是正確的，佛祖在世時代，對出家弟子的飲食要求是1. 過午不食2. 食三淨肉 (不見殺、不聞殺、不為我殺)3. 有十種奇怪動物的肉唔可以食，如象、豹、人…4. 托缽乞食。而對在家弟子則冇飲食要求。
因為係乞食，所以唔可以揀食，人地供乜就食乜，有人供肉就可食肉。我泰國師傅話，就算有毒都要照食。
唔揀食既精神係，消除對食物、對自己身體既執著，其實唔易得過食素。
而佛教流傳到漢地，因為中國傳統對乞士的看法同古印度好唔同，而且氣候寒冷，所以做唔到赤腳托缽，就逐漸發展出農禪的傳統，自己種嘢食。而且可以揀食。有得揀，咁揀啲乜? 出家人要有慈悲心，當然做唔出殺豬殺牛，咁就當然係素食了。
所以，漢傳佛教既素食主義，唔係完全係教條，或者皇帝既意旨由上而下咁施加落嚟，而係有歷史文化既原因。而且有漢傳經典《梵網經》都講，肉食者斷大慈悲種。
5辛係包括蒜,洋蔥, 大蒽青蒽，蕎頭，韮菜。辣椒同芫荽反而唔算五辛既。
所以食唔食素都係睇自己個別情況啦，我都會虛寒，所以會食勁多薑，戒涷品、戒甜、戒生冷。
藏傳我都接觸過的，藏傳是比較後期傳入西藏的佛教，大約公元700年左右，有部份由中國傳入，屬於大乘。修藏傳嚴格嚟講是先學大乘顯宗十幾二十年，再學密乘。坊間好多人將所有西藏佛教都叫密宗，其實唔正確的，因為一開始一定係學顯教，有晒根基，先俾人學密教。師傅同弟子要互相觀察三五七年。所以淨空法師都話，西藏密教係屬於佛教既大學程度。
我以前接觸過白教（寧瑪派）同黃教(噶舉派)的師傅，參加過吓結緣灌頂、煙供嗰啲，但冇深入。有些師兄喜歡持咒，對大禮拜、四加行嗰啲有耐性，有意一路修落去，就同藏傳相應一點。我就覺得自己同南傳既師傅有緣一點，因為我冇乜耐性持咒，反而比較喜歡研究教理，有咩問題可以直接問師傅。
藏傳係可以食肉既，因為西藏又涷又乾根本種唔出啲乜，幾年前我去過西藏，當地人是食大隻動物如牛，不食小隻動物如雞、魚，因為前者取一條命可以俾好多人食，殺咗隻牛，會掛佢啲毛在寺院啲樹上超渡佢，個出發點同樣係慈悲心。
該主題在最後一個回覆創建後90天后自動關閉。不再允許新的回覆。