張惠雅（Regen C）為宣傳自資製作的新歌《Wish You Were OK》，今日（23日）接受商台《星光背後》主持梁泰來訪問。
15歲簽約Neway娛樂入行，現年33歲的Regen，07年孖Crystal（張汶嘉）及Winkie（黎美言）組成HotCha，2014年拆夥，三人先後與公司解約。在節目中，Regen透露當年HotCha表面風光，「其實由我出道到離開，都係冇賺過錢，最後係畀咗舊錢先走。所以以前有無人工呢？我哋每個月都係有錢嘅，但屬於預支，到最後都係要還返畀公司。」
Regen坦言跟隊友合作7年，常有爭拗，「拗撬最多係同Winkie，佢唔喜歡就會直接講，未必每個人頂得順佢嘅性格。」
但她指HotCha解散與組員合作無關，最重要是長期無收入，「當時我哋三個都冇錢，希望公司搵多啲工作，但做極都唔夠冚番預支筆數。最初太鍾意唱歌跳舞，但後來工作時間長，又冇假放，每日瞓4小時，好唔成正比，精神亦有問題，係唔知為乜？（最多月薪有多少？）約八千至一萬多啲，但當不停做仲欠公司錢，就會反問自己點解要咁辛苦。」
【拍拖十多次 通常3個月分手】
她在2011年突然離隊赴日本及澳洲留學，被問到有沒有考慮隊員感受時，她說：「其實我已考慮1年先走，最大原因係精神狀態非常差非常辛苦，試過拍攝完電影後，瞓覺時仍見到一啲機器喺我床邊，好恐怖！唔能夠只為他人設想，當時我亦有幫番團隊，只收幾千就飛回來拍咗個齊人嘅代言廣告。」
對愛情充滿憧憬，Regen曾經視30歲前結婚為人生目標，但經過多段不如意的感情後，她揚言愛情在她的人生已不再重要，「我拍過十幾次拖，每一次都係『爛桃花』，鍾意過嘅都係衰人！」她難以容忍另一半對自己不忠，所以一般都是3個月分手，拍拖最長時間那次也未超過半年。
【不忿曾被指拆散陳法拉薛世恒】
Regen亦重提昔日與老闆薛世恒傳緋聞，不忿被指促使老闆與陳法拉離婚，她形容是她入行以來最憤怒的一次，「我自己有精神潔癖，曾因男友對舊愛未完全放下而分手，所以我絕對唔會做第三者。當時我好執著，一直想搵出係邊一位記者創作呢單新聞，我唔了解老闆點解離婚，一段關係要搞到離婚，一定有好多問題。」
