好多年前外婆走時我大肚,當時都比我去送最後1程,但話要咩拖住對筷子咁,我本身信教,所以無咩為意理會,您問辦事D人會教您架啦~
響醫院認左遺體後，響太平間出口上靈車個門口做儀式，就直去火化
我爺爺當年Sars 都係咁 （唔係死於Sars）
你可以同返殯儀公司講一切從簡。無論醫定公眾殮房都會有地方俾家人做簡單送別。殯儀公司會幫你夾時間。不過你預係公眾殮房或者醫院要啲時間辦手續，未必會好smooth。如果你想參加者由殮房/醫院一齊去火葬場，就要book埋旅遊巴，都係殯儀公司會搞。
而去到火葬場都有禮堂，有啲新嘅火葬場禮堂好得體，如果想再簡潔啲，可以直接請客人去火葬場都得，不過用禮堂時間好似大約15-30分別左右。
可以問家屋企人洗唔洗要宗教儀式，都會有簡簡單單嘅方法做嘅，殯儀公司會知點安排。吉儀方面，殯儀公司嘅人都會幫你準備，因為場地未必可以做到有reception，如果收到帛金可以即時回返吉儀俾人。
好嘅殯儀公司其實做得好周詳嘅，始終失去親人都未必有心力安排咁多野。講左要求俾佢哋知，佢哋就係自動波安排，你需要做嘅決定可能係大概日子同時間（因為爐期要搶），有幾多人出席，同埋邊度等咁。最緊要㨂信得過嘅公司。
3個讚
雖然 Omicron 病徵唔重，但始終傳染性強，其實疫苗嚴峻最好唔好有來賓，直接由殯儀公司安排【院出】。即係喺醫院殮房認完遺體，直接在殮房附近小靈堂、或殮房外有瓦遮頭底，直接做簡易儀式後，靈柩直接上靈車直送火葬場。如果有宗教信仰就同殯儀公司講，否則如果無宗教信仰，一般都係由道教喃嘸師傳，唸經及小型破地獄後完成。去到火葬場靈堂再做簡單儀式，由宜屬至親按鈕送先人最後一程，之後就可以各自離開，如果有小量親戚朋友參加，家屬可一起去食飯或下午茶，當作英雄宴慰勞，否則如果只自己一家人，就可直接回家。
火葬後骨灰可申請、暫放火葬場臨時倉庫，直至申請及等待成功正式上位。暫存期間可預約去拜祭，但職員只會將骨灰袋，拎出倉庫在外給予突祭。有啲殯儀公司免費、式酌量提供暫寄存骨灰服務，一般都係擺喺殯儀公司內，拜祭時節可預去店拜祭，一般店會安排在店外，擺放一張摺枱給予拜祭。有啲殯儀公司可代買祭品、你亦可自攜祭品前往，亦有啲殯儀公司話祭品免費，但拜祭完後隨心給予一封利是。
至於你唔想參與出殯儀式，只想到火葬場參與都可，但要預早自行到火葬場外等候，詳情可與殯儀公司協商，保重。 
2個讚
我想知如果無宗教儀式，簡單送別可以點做和過程係點?
我父母叫做洗左禮，但係好耐無返教會無 join 團契，我老豆八十幾歲以佢身體狀況，唔會有幾多年剩。基督教嘅禮儀，又要出場刊，又要講見證，又要講我老豆生平，其實佢只係一個好平凡嘅人，根本無咩好講，都唔會有咩來賓，唔會有人來唱詩，我計落連埋至親，15人都無。 我老婆叫我返教會問定先，我唔想，自己洗禮間教會太藍太有錢，我唔想求佢哋，跟住又攞我單嘢來吹回轉見證。
點解我想從簡，因為廿幾年前，我呀婆死時係用天主教儀式，佢又係幾十年無去教堂，神父又唔識佢，成台戲叫錯名幾次，神父叫人出來講生平事蹟，成場 dead air 左分幾鐘，無人出聲，神父就直接 skip. 我哋呢一族人不至於有仇，但唔會為對方嘅死聲淚俱下，所以簡單咁攪對在生嘅人會好過啲。
至於點樣葬，因為我呀媽如果仲係度，佢都想年年去拜下山，但我都好明確話俾佢聽，唔拜得幾多年，我自己退休都打算走，孫仔去咗英國讀書都會落地生根, 個墓唔會有人理。
我媽媽早幾年過身，講明唔想有任何儀式。有朋友介紹左間殯儀公司俾我哋，對我說要求都全盤接受。
當日係咁嘅
- 去殮房領遺體，裝身。件衫係我哋自己帶去，係媽媽生前著過嘅，同埋自己帶左啲平價首飾，交俾師父就OK。
2.之後就係殮房一個小廣場瞻仰遺容。殯儀公司安排左花俾參加者一人一枝花,獻花落棺材 - 主持人會帶領默哀
- 會留時間俾家屬發言，如果有好朋友想講，都可以事前請佢哋準備，冇太多野想講可以skip。當日都有幾位親友發言。殮房部份大約一個鐘到。
- 上靈車出發去火葬場，參加者上旅遊巴
- 到火葬場可以最後告別，果陣我喊到都唔記得做過咩。好似都係請參加臨別可以再望一望先人。
- 最後家屬㩒制送先人入爐
幫手辦事嘅老闆本身好似都係基督徒。如果想要基督教版嘅簡單儀式應該都可以安排到。我諗請牧師帶禱告同念一段經文咁都得嘅。
曾經參加過天主教徒嘅喪禮，家屬揾左教開嘅敎會幫手，真係又神父講好長但係又唔係好熟先人咁嘅。之後成隊詩歌班一齊領唱。咁大排場似乎要係靈堂搞先夠位…
我又參加過簡單喪禮嘅中式版。辦事嘅係另一間公司，同樣係殮房出殯，請左三位師父，做大約十五分鐘左右嘅儀式。中式儀式師父講咩就跟住做。（好記得師父一唱南音喊到我收唔到聲）。之後好似係各位參加者裝香，就出發去火葬場。其他野就差唔多。
白事好多人都唔熟識，失去親人傷心緊仲要頻頻撲撲係好難受。希望啲資料幫到大家，唔好俾人呃。有啲公司真係好衰，報價貴都算，但係辛苦家屬做啲唔想做嘅野。touchwood 如果有需要，就算有人介紹嘅公司都好，要記得堅持自己意願做。祝各位平安。
1個讚
我媽生前話想海葬，但係我哋唔捨得。講白啲無論葬禮定墳墓，都係為在生嘅人做嘅。媽媽嘅親戚朋友想探佢，我哋冇可能拒絕，因為佢地同媽媽嘅關係唔係屬於我哋可以控制。
最後我哋拎左一部份骨灰放係佢想嘅地方（嚴格來講係犯法嘅，屬於非法處理）。淨返嘅就放係屋企，只用個防潮箱裝袋骨灰，等食環嘅骨灰位。等左3年到，有新龕位落成就排到。個位有十年期，我將來移民都唔知應該點處理。
年幾前我親人過身，都有在火葬場這個hall 搞簡單儀式（可能係殯儀公司安排，當時一個package 咁，都唔知包乜嘢內容），給我地呢個房（hall ）唔細，大過殯儀館個靈堂。但在火葬場呢個儀式就唔會好多時間，15分鐘左右，就要讓給下一家。儀式完咗我記得外面都有化寶桶化D 衣紙（都是匆匆的，給每家人的時間都緊逼）。
要等三年有位，其實算快定慢？
同埋先人骨灰放屋企唔會對家宅唔好咩？（我呢方面真係唔多識
我唯一係貓貓骨灰放係屋企一個角落仔。
都唔洗諗講咩既，一來你老豆仲在生，係唔會諗到，到你老豆走咗，可能就會好多嘢想講。
其實都係講下你對父親大人係你人生中對你講過啲乜，敎過啲乜，生活片段等…有咩嘢你會好深刻亦令你永遠都唔會忘記。
我家人走咗頭七個晚瞓唔著就寫咗一封信，離出殯有成個月慢慢加加減減修飾一下封信，到火葬個日就放入棺木一齊燒。
如果揀屯門曾咀，應該唔洗點等。之但係嗰度真係勁遠，要轉車先入到去
我老爺骨灰放喺曾咀
我哋唔迷信，當時最睇重係爸爸嘅睇法。媽媽唔想上位都係唔想同唔識嘅人擺埋一齊，所以可以嘅時間之內我哋將佢放係屋企。
三年快唔快就見人見智啦，以前成日聽香港人死後龕位都要爭，媽媽死左冇耐果陣都真係隔一排睇下條隊排成點。一年條隊都排唔到10個位咁，不過時間耐左就冇乜留意啦，係睇新聞知道新一期龕位可以抽就apply左。點知原來供過於求，有入紙嘅都有位，個結果都幾好啦。
有朋友安咗向曾咀，我自己無親身去拜祭
但聽其他朋友講返話環境都幾好
同埋唔洗等，一申請就有
如果住新界西果邊應該唔算遠
我阿爸交帶身後事，又係話唔想放骨灰龕位，指定咗個地方叫我哋撒咗佢
講咗好多次話犯法，佢都好堅持，最後佢個仔應承話幫佢攪掂
我唔會理佢
唔想撒咪帶啲灰去果度行一轉當了左佢心願囉。始終聽過又唔做好似會唔安樂。
1個讚
我去食環個網頁睇過屯門曾咀有163000個位。
嘩，真係超多位同其他區靈灰位比較。
如果環境好，希望真係好快可以抽中啦。
。
佢話自己冇宗教信仰，人死後就乜都冇
但係又話唔想放啲骨灰向骨灰龕位，話咁細格迫向入面
咁又話人死咗乜都冇，咁啲骨灰放邊你都唔會有感覺架啦
之後就叫我哋撒佢啲骨灰向某個地方，話果度有佢嘅回憶
但我哋啲仔女就完全冇去過果度，對於我哋嚟講一啲回憶都冇
咁究竟係比在生嘅人去回憶你，定你死後撒向個你自己覺得有回憶嘅地方
但你又話死咗就乜都冇，咁撒你向果度你都回憶唔到架啦
我覺得如果你講到自己無神論，死後就乜都冇，咁你嘅身後事做成點都只係比在生嘅人睇
但你又對身後事咁多要求，覺得死後會感覺到回憶，唔想迫向骨灰龕位
咁真係自打嘴巴，其實話自己無神論，只係想逃避宗教上所講死後會有業道論對，即係人死咗，生前做過嘅壞事就關人鬼事，唔需要負責
但實際上，根本就好在意自己死後會係點
真係唔好意思講得太長編，講起撒骨灰呢單嘢我就勞氣，點樣同佢解釋都係堅持自己做法
係都要我哋做啲犯法嘢撒咗佢啲骨灰，唔做就好似唔幫佢完成遺願咁
到時佢就死咗啦，萬一我哋比人拉咗咪好無謂
咁又唔駛擔心喎， 火化後去食環攞左袋灰， 你做咩真係無人理。
呢排送先人走， 我諗搵東華應該好啲卦。
早幾年家人走， 都係搵東華， 我覺得幾好明碼實價， 解釋和服務都好好。
1個讚
我知道，好哋哋都唔會有人理你向荒山野嶺撒乜嘢
只不過係唔鍾意佢一邊不屑人哋有宗教信仰，但又好在意自己死後點樣
所以我冇應承佢，佢個仔話會幫佢攪掂，咁就由佢攪，我唔理
佢在世嘅時候你冇必要同佢拗啦，拗得贏佢又唔會有咩好處嘅。面對死亡唔理性係好正常，何況係講緊自己死後。死後想㨂自己遺體放係邊都係好正常嘅。講緊都只係個boby放係邊，又唔係要追求風水靚位，都唔算迷信啦。
老人家肯講自身後事嘅意願已經好好，好多人冇講之後一班兄弟姊妹就因為後事嘈。