自己中完招第十日，唔早唔遲，就在轉陰性的第二日，收到消息家中老人中招入院。
老人有長期病住老人院，唔打得針，終於到佢間院舍爆發，老人家中左招昏迷，病毒量好高，醫生都叫我地做好心理準備。
慶幸係我地個區唔係戰地醫院，老人瞓左急症室一日，第二日巳經上左負壓病房，連續幾日醫生都好有心打電話比我地，詳細解釋治療方法。
尋晚，醫院打黎叫我地見最後一面，我同老媽做入到去，都只能望住個Mon 。睇到佢比個氧氣罩罩住塊面，面露痛苦表情，頭部不斷擰來擰去同爭紮，我真係唔想睇、唔敢睇，好怕睇住佢慢慢失去知覺離開這世上。咁啱隔離床啱啱過世，我望住電腦屏幕上的維生指數，所有數字慢慢歸於零，心電圖亦變成一條直線，原來人生臨終的那一刻，一切都只是一堆數字……
我上網睇人地分享，這個「見最後一面」的醫院call，可能會重覆又重覆好多次，直到老人真正離世。如果話無心理壓力係呃人既，但我要係亞媽前表現堅強，因其他家人都中左招去唔到醫院，我係呢一刻惟一幫到手嗰個。而這等call 的過程是痛苦而又矛盾的，你想它早點完結，但你又害怕接到電話，但當你接到壞消息時，又可能會鬆左口氣。
呢一刻我只希望黑暗早日過去，太陽快快昇起來。而壞人，我相信係會有終極審判的一刻。
多謝大家睇我呻。
25個讚
家母兩年前都係間接因 Covid-19，肺炎入醫院剛唔準探病，家母一向由我照顧飲食，佢聽到我把聲先肯進食，因長時間唔準探病，加上醫院醫護人員，唔會咁好心機逐個喂到飽，而且家母聽唔到我把聲，多數其他人餵都唔多願進食，所以最後都因為咁，吞噬功能退化要插胃喉，之後成日哽襯致多次肺炎，最終胃喉都落唔到營養奶，營養不良及肺炎離世 ! 
樓主要堅強，保重 ! 
7個讚
呢段時間老人家入院真係好辛苦，佢哋唔中意長期帶口罩
好辛苦（訓住都要帶），但又無奈，以前都話探下見下，而家
聽到好心酸，無力感好大吧…辛苦你努力撐著，呢啲唔方便同家人傾訴，就黎呢度傾啦。
3個讚
好明白呢種等電話嘅煎熬，唯有同自己講，陪到老人家行最後一程，都係小小心意，樓主照顧家人之餘都要照顧好自己
二月我都剛剛經歷過，雖然唔係因為中招而走，收到電話就要趕去醫院。
望住老人家每次見佢都一日差過一日時侯，都有樓主矛盾既諗法。
最後一面我係得自己一個人去面對，望住數字去到30, 20, 10…心情除咗好傷心外仲有係好驚。
樓主同家人要諗定有咩說話要對老人家講，要堅強撐過去，保重。
睇住你篇文, 個心都好痛… 願故人一路好走, 願生者堅強… 加油, 樓主…
我屋企都有老人家確診走左
有得見最後一面已經好好，我哋無得見最後一面，facetime送終都話安排唔到
佢明明住緊院舍，理應有好好既照顧，有屋企人錫⋯
