以下係我喺fb見到，大家都慘：
家長們，其實老師都唔想 zoom， 唔想提早放假㗎。 用 zoom 教書，老師做多好～多～野。家長係喺背後睇唔到！
最簡單，平時老師派野比學生，只需要派 1 次，學生自己收落書包。而家老師要執好一份份，pack好，仲要記住唔好執漏野。 等家長拎／校車送。 一班30人，兩班就60。
家長們，你只係負責黎學校拎咋。你怕危險，怕有菌，老師一樣怕，老師屋企都有老有嫩㗎。 家長絕對可以唔返學校拎學習物資，唔拎功課，唔拎圖書架。冇人迫你㗎。
有學校出於好意，怕家長要走黎走去，於是就要小朋友上網交功課，結果呢，家長嫌麻煩，屋企冇 printer，小朋友唔識 scan，做唔到。老師追功課又怪老師好打電話去追。老師係要落咗堂，額外抽時間打電話比你尊貴既家長㗎。
除咗追功課，仲要關心學生喺屋企情況，呢啲陽光電話係要全班打。有時一講就十幾廿分鐘，老師仲有59個家長要打。仲有其他野要做㗎。家長，你地可以好好善用 email，同埋平時有咩意見可以平時都提出，唔洗等老師打比你嗰陣先講曬你半年既苦水，你地都可以主動搵老師㗎。 當老師講你小朋友有咩不足，可以再點進步嗰陣，請留心聽，唔好下下都覺得老師針對你個小朋友，下下都起曬"鋼"。 學習聆聽啦，家長們。學識聆聽好！緊！要！
其實小朋友可以喺屋企 zoom 咋，有老師到今時今日 （3月4日）都仲要返學校當值㗎。 學校維持開放直到放暑假，學校開放，老師就要當值。你地唔好成日以為老師好得閒先得㗎。
老師要備課，zoom 上堂要用 PowerPoint, 要時間整，要搵圖搵片，整動畫，整效果。仲要改功課。晚晚做到淩晨點幾 2 點，第二日又要教書，真係人都癲。有老師上咗年紀或者電腦冇咁叻既老師就要花多好多時間準備。仲有整工作紙，如果要做圖工就要準備物料，怕小朋友喺屋企咩都冇，做唔到。呢啲野都要返學校先可以 pack 到，姐係老師唔可能完全 wfh, 呢啲野都係要有人做㗎。
假如老師 wfh 係要拎曬所有教學物料返屋企，所有教師用書，學生用書，白板，工作紙，教案，要開會既文件。無錯，仲要開會㗎。老師都係要返工，個世界冇停到㗎。仲要拍片，剪片。喺屋企要 zoom 住同同事一齊拍片，難度高十倍。有同事屋企有剛出世既 BB，又有人屋企鄰居養咗隻長期都吠既狗，又有人屋企樓上長期都裝緊修，要搵個寧靜環境拍片真係唔易。好多老師都寧願返學校，方便好多。
小朋友上 zoom, 麻煩家長就配合一下啦。一班有10幾個小朋友一齊上堂㗎。明知小朋友要上堂就電視細聲啲啦。喺後面大聲講野又有，爸爸唔著衫行過又有，上上吓堂，無啦啦走黎攬住個小朋友錫一啖又有！喂，上緊堂㗎，可唔可以尊重吓個課堂，尊重吓老師，尊重吓自己個小朋友呀？！
小朋友唔坐好，唔合作，整怪聲，用 zoom 枝筆畫花老師個 share screen 或做危險動作 （塞枝筆入鼻孔），老師都唔想出聲話佢，因為會浪費時間，但奈何呢個係投訴之都，老師唔開口話佢，其他家長會投訴。到老師幫你教仔，你又投訴。你自己喺屋企坐喺旁邊睇住佢上堂，你都管佢唔到，老師隔住個螢光幕叫佢個名，你又唔鍾意。究竟你想老師點做好呢？
上 zoom 時間好緊迫，老師要教同平時一樣咁多既野。因為學校評估，做學習記錄都係繼續進行。你一日有上 zoom 就等如你有返學，有 take attendance。係當同平時喺學校一樣㗎。
教少左，你地家長又覺得唔抵；教咁多，自然小朋友要做既野會多，你地又為你地班寶貝覺得心痛。當初你地唔係認同學校理念先揀入邊間學校架咩？ 讀得傳統名校就預咗辛苦㗎啦，你又想讀名校，又想 happy school，搞清楚遊戲玩法未㗎？ 而家新開既國際學校都開始谷學術㗎喇。唔係讀國際學校就解決咗你小朋友上堂無禮貌，唔尊重別人既問題㗎。國際學校既老師都一樣會話你個仔架。