有港媽於Facebook群組「淘寶開心share」上載快速檢測套裝圖片，指「之前聽到要排幾粒鐘做檢測，真係驚驚哋，淘咗啲檢測包，自行定時做下。有事先去檢測站覆檢」。
疫情下定時自我檢測本值得鼓勵，但有眼利網民發現樓主於淘寶購買的快速檢測包，原來並非用作檢測新冠肺炎，直指樓主「淘錯嘢」，「驗抗體喎，唔係抗原。買咗肺炎支原體喎，唔係covid……當買咗玩具啦……」、「肺炎支原體感染，這是由一種名為肺炎支原體的『細菌』所引起的傳染病，細菌同病毒係兩樣嘢嚟㗎」，「佢呢個應該驗極都唔會有事喎」、「結果永遠都係一條線（陰性）」、「自我感覺良好系列，見到肺炎檢測4隻字就衝咗先」。
究竟樓主購買的快速檢測包有什麼不同？翻查相片中檢測盒資料，列明是「肺炎支原體IgG抗體檢測試劑盒（免疫層析法）」，當中的肺炎支原體是一種可導致肺炎的支原體細菌，而目前常說的新冠肺炎，是由新型冠狀病毒引起，一種是細菌，一種是病毒，故「肺炎支原體IgG抗體檢測試劑盒（免疫層析法）」，理論上不可能用作檢測新冠肺炎病毒。