本港爆發第5波疫情，政府實施史無前例的嚴苛封閉措施，惟確診數字未見壓下，本已千瘡百孔的各行業正式陷進水深火熱。其中每日服務大批學童的校巴，以至接載新界村民進出市區的村巴，營運者苦訴在第4輪「防疫抗疫基金」已被忽略，當局本承諾在第5輪基金重發津貼，惟多名業界炮轟政府「冇口齒」，再度遺忘他們。有公司直言月蝕200萬港元，恐新年後無以為繼宣告倒閉。業界直指復課無期，家長要求退回車費，預期新年後出現結業潮，將發起慢駛行動表達訴求。
「已經第2年喇，撐無可撐，去到要問親戚朋友借錢！」服務逾20間學校，營運約60輛校巴的康和旅運有限公司董事鄧梅碧霞一度嗚咽，直言學校又再停課，部分家長表明不繳付二月份的車費，公司已無資金出糧予員工，每月蝕足200萬港元。而政府曾承諾，若爆發第5輪疫情會按車輛發放補貼，如今竟再次落空，令她極之失望，坦言公司已水深火熱，借貸信用額用完，只盼政府做法能公平去支援業界，恐新年後就被迫結業，打破180名員工飯碗。
另一校巴營運商新輝旅運公司負責人張英發就指，百分百貸款的資金幾近耗盡，如今又再停課，一月收了的車費有家長已要求「回水」，二月更不會交費，公司靠積蓄苦撐兩年，現時每月要蝕本50萬港元，以為漸見光明卻再迎來惡夢，政府再度忽略旅巴車主，令他們深陷結業谷底，已有司機提出離職，即使日後復課亦擔心人手不足，只會苦了學童。同樣苦撐的村巴營運商率先受害，威達旅遊巴士有限公司經理陳子良慨嘆，政府要求企業讓員工在家工作，村巴的搭客即時減半，惟員工及營運開支如常，冀再推「保就業」及延長百分百貸款計劃，否則公司倒閉市民亦變相無車搭。
政府首3輪基金均向學校私家小巴及非專營巴士發放一筆過非實報實銷補貼，金額介乎1萬至3萬港元不等；教育局於第5輪基金中，為每名校巴司機及保母提供一次過6700港元紓困津貼，估計約9300人受惠。反觀營運者就繼第4輪基金落空後，再度被政府遺忘。
「點解國泰有，郵輪又有，我哋為學生同市民服務嘅商用車，就唔值得有補貼？」公共巴士同業聯會副主席郭思源指，業界約5000部客運車輛過去兩年又開又停，實際只有一半營業額，卻要全額支付員工及維護車輛開支，運房局局長陳帆在第4輪基金落空後曾親口承諾，若有5.0就會發放補貼，如今食言相信會出現結業潮，別無選擇下將發起慢駛行動表達訴求，冀政府有個大智大慧的人去處理這個疫情，病毒來到Omicron階段殺傷力大減、是否仍要清零、市民與感冒共存是否不可行，「政府成日話要保就業，唔保企業又點樣保就業！」
航運交通界議員易志明指，深明業界苦況，已多次向政府反映要求照顧非專營巴士經營者，現時津貼司機及保母，卻不支援出糧者，狠批「有冇搞錯」，對營運者不公道。而今次基金並非新撥款，故銀碼上肯定不夠，要求財委會追加撥款支援這批未有受惠的業界，同時亦要推行改良版的保就業計劃，向真正虧損的行業撥款，「如果政府唔增加撥款，我肯定新年過後會屍橫遍野！」
運輸及房屋局發言人指，考慮到大部分其他非專營公共巴士同時持有多於一種類型的服務批註，可從事其他服務範疇例如居民服務、僱員服務、合約式出租服務等，故未有涵蓋在第4及第5輪「防疫抗疫基金」的支援措施內。
3個讚
冇咗間車公司, 到最後都係麻煩到家長, 咁做家長嘅, 不如keep住俾住先, 睇吓車公司之後有咩可以credit返喇
2個讚
好多人唔會咁諗，我小朋友間學校啲媽媽一早話停課就唔會交錢，佢地覺得到時呢間無左，總有第二間公司接手，不過都明白嘅，如果自己本身份工都受影響，自己經濟都受影響
1個讚
真係好多人唔係咁諗
我之前個啲家長又係鬧鬧鬧，話冇服務又收錢
其實，人地夠要出糧比司機、比停車場錢之類
2邊都難做！
正苦好應該津貼！
可惜我哋正苦係不理民間疾苦
9個讚
好驚驚 無校車點返工返學… (之前都問過 真係唔收車費呀? 但明白唔係每個家長都可以比到)
停課期間好彩有長老幫手如果唔係要再駛錢請褓姆
惡性循環… 我哋學校停課時校巴有幫手交送功課，而家長都有繼續比校巴錢，叫做有原因繼續比車費。
停課係短期，如果因為咁而令校巴公司倒閉，開返學就好麻煩。所以如果各位家長仲有份工，能幫到手維持校巴營運，其實都係福氣。
7個讚
呢樣真，好彩我哋家長好多都明事理，對繼續比車費都冇好大意見，而校巴公司都有自己減咗少少車費。希望大家可以一齊渡過寒冬啦。
4個讚
呢個真
上兩年剛開始有疫情時，我大女間幼稚園好多同學都退咗學
有啲完全無通知，一嘢cut曬校車同學費自動轉賬
到可以復課時又要求學校收返
校車公司都無奈地要接送返佢哋啲仔女
好在細仔學校啲家長明事理，今年無人嘈過
除左村巴，好多父母都諗緊好無退學。講緊唔止n班，k3得返半年都退，話已經有私小offer所以想慳半年學費由私幼轉津幼，睇到眼都突！
呢d就係身教，做人係咪忘本，識唔識飲水思源，定係過橋抽板？k3仔女都大，識諗野，有自己社交，一個唔該都無，未黎得切同老師同學say bye就被轉去第2間學校重新適應，問題係返得幾個月，認曬d人黎又畢業，同你咁唔熟真係唔知搵唔搵埋你玩好，小朋友就夾係中間無say, 不被尊重，做父母既為左慳小小真係一d同理心都無，既然半年學費都覺得吃力一開波就咪充大頭讀私幼啦！
上面講緊不受疫情影響份工既父母安排。無眼睇。
6個讚
收返入pm班都係個好方法
我女嗰間係雞肋級幼稚園，唔係咁多人爭，所以啲家長肯返嚟讀大家就當無事咁收返曬，不過唔知學校係咪財政上受影響，當時啲有名氣嘅net已被其他名幼高薪撬走了，變相我哋乖乖交學費嘅其實都有受到影響㗎
1個讚
exactly! 為左慳個小小，而又唔係比唔起，做咩事要做到咁盡呢。
我覺得個媽無理過個小朋友意願就自己轉校好唔尊重。
3個讚
係，啱啱一月返咗少少就停課，真係好多人會即刻同校車公司講回水，我自己覺得就無所謂，我搭得校巴就預咗要俾依舊錢，不過都明，可能家長們經濟都唔好
真係好驚校車頂唔住
以前做過私幼，好多家長都係咁，唔鐘意就自己cut direct debit，諗住學校奈佢唔何。之後鐘意就番嚟，講到自己好無奈咁。
其實佢第一日咁做，成間學校嘅職員都會知道佢唔交學費好無品，背後話佢死cheap精囉。要退學唔係唔得，唔該跟規矩啦。
到後來我個仔讀N，又係私幼，撞正疫情，我都有跟規矩交番應付學費，學校都有照比我繼續番zoom多一個月（因為2月停課，我2月尾先退學）。而班上面有個家長竟然WhatsApp話我傻，做咩仲交學費比學校？我心諗你班pk第時點教仔女，咁都講得出。
5個讚
