中港兩地對楊千嬅唱歌嘅評價一向有反差，內地網民曾指楊千嬅為「行走中的CD」；香港網民則指楊千嬅為「行走中的走音CD」；近日，楊千嬅一段內地獻唱片段又再喺網絡瘋傳，有香港網民更加質疑佢咪嘴。
網上流傳多段楊千嬅喺四川省南充市閬中古城錄影嘅片段，適逢係賀年節目關係，現場環境掛住大紅燈籠，鄉親觀眾們戴住紅色口罩，而楊千嬅就以一身火紅服裝登場，成個人肉利市封咁款。楊千嬅即場獻唱經典歌曲《可惜我是水瓶座》，雖然係廣東話，但楊千嬅唱歌時施展尤如陶大宇「水撥式」台風，令一班鄉親非常投入，跟住佢一齊90度揮手同大合唱，猶如迷你演唱會，成功炒熱氣氛。
影片被瘋傳後，中港兩地網民反應大不同，有內地網民盛讚楊千嬅唱現場穩定，不過亦有網民指楊千嬅唱得好似CD一樣，疑似有咪嘴之嫌：「這是真假唱，所有細節都跟CD一模一樣」、「這就是放的歌」、「這場絕對是對嘴」等等。而香港網民就留言指楊千嬅係咪好窮，要返鄉下唱歌，同埋話佢唔講真係以為係村民：「個妝厚到好似成塊面具咁」等等，有唔少網民仲指佢咪嘴，仲留言：「唔怪得叫行走的CD啦，真係播CD嘅。」
攞嚟賤
