新朋友狂叫貴海鮮致6人埋單逾6500元 港女質疑遇「飯托」

朋友飯聚竟疑似慘遇「飯托」!有港女指早前與兩名友人到串燒店飯聚,其中一名友人另外相約兩女一男出席;惟樓主到達餐廳後,才得知3名新朋友已點了多款貴價海鮮,後來更發現其中一名新朋友是該店員工,最終「埋單」總數達6,543元,而不吃海鮮的樓主及友人亦要平均攤分費用,令她有「焗住畀錢」之感,質疑3名新朋友是「飯托」,刻意帶他們到涉事串燒店消費。

該名港女在社交媒體Facebook群組發文控訴,指平安夜當晚相約兩名友人到銅鑼灣一家串燒店用餐,其中一人另外約了兩女一男的朋友出席,即一行共6人。樓主指,當晚約好8時半,她與友人遲到約15分鐘,怎料到達時其中一名初次見面的年輕女生表示「嗌曬嘢食」、「嗌咗海鮮同好多嘢」;但樓主表示,她們當中有3人不吃海鮮,「佢亦都冇事前問過我哋食唔食就已經預咗我哋嗰份」。

食物送到時,樓主才得知新朋友點了龍蝦、蟶子及帶子等貴價海鮮,其他串燒下單時則最少須點3串,「我哋都冇乜點叫過就已經嚟咗好多」,當晚更沒有飯麵等主食提供,「我哋真係掂份Menu(菜單)嘅時候先知道呢件事」。最令樓主感到懷疑的是,她後來才發現其中一名新朋友竟是該店職員,「最好笑係個Staff(職員)問返個女仔『乜你冇同人哋講主食夜晚冇得提供嘅咩?』,我望向個女仔嘅時候,個女仔即刻眼神閃縮」。

最終6人「埋單」需付6,543元,樓主查詢後亦再度發現不妥,「後尾問多兩問先發現原來啲海鮮係要預訂,亦即係話之前我哋3個完全唔知道佢嗌咗咁多嘢食」。樓主直言當晚如被騙現場,質疑席間3名新朋友屬「飯托」,刻意帶他們到該串燒店「強迫」消費。

樓主強調自己並非未能負擔人均千多元的晚飯消費,而是不願意為別人分攤貴價食材的費用,直指3名新朋友當她及友人為「水魚」,「我哋睇咗餐牌唔會覺得貴,你劏我冇乜所謂,但起碼你嗌嘅嘢食我係知情先,想睇單又冇人理我。」她指,「見佢哋嗌海鮮嗰陣其實我已經想走,但我費事落我朋友面,而家諗起認真覺得搞笑,簡直就係當我哋係韭菜昆我哋」。

帖文引起網民熱議,不少人都認為帶新朋友出席的該名友人,需負最大責任,「你朋友好有可疑呀」、「你個朋友都衰衰哋嘅,其實佢係咪本身就知個女仔訂咗海鮮而冇話畀你知?落order又唔講聲,似係你朋友都想搵飯腳share錢咁,呢啲朋友疏遠好啲」。亦有網民指認為,樓主若用餐途中感懷疑,應立即離開而非「硬食」,「如果係我,我一定會問清楚先坐低開餐,因為同對方唔熟悉,根本冇必要畀面任何人」、「呢啲環境如果我同唔識嘅人食飯,佢哋叫咗我唔食嘅嘢咁我會離開各有各食,食完再出嚟」。

1個讚

絕交啦

我會唔俾!明知我唔食海鮮都要夾?唔通唔飲酒又夾酒錢咩

係, 我都唔會俾… 未問過我就嗌都成枱都係, 仲要貴嘢, 一D都唔尊重我… 最多夾番5舊水…

呢d其實係好難防,比著我可能都係比錢當買個教訓

我好多年前都遇過,起身走人,頭也不回

所謂朋友,冇再聯絡

2個讚

不如開埋餐廳名,等大家知道下有新朋友一齊食飯有提防

當人係水魚,根本唔係朋友嚟。

你返open rice佢comment 都多好評,價錢都係咁上下人均200至400, 海鮮預訂當然貴啲啦,但我覺得佢有啲片面同埋聖誕節你咁樣同啲三唔識七嘅人去銅鑼灣食日本野,你都預咗做傻仔。平時聖誕節夜晚食buffet人均冇1000都800

我自己同熟朋友食飯,預訂海鮮或貴價嘢都會喺谷到問大家食唔食先訂。

咩係飯托?
蝗語嚟架?

4個讚

我絕對唔會比錢,睇佢夠唔夠膽打我

有無影相?話曬都食過餐勁,睇下樣都得掛,等大家知曉知曉

Off topic 一下

3隻龍蝦$1500又唔貴喎~

其實我都唔知,我估係餐廳請個人返嚟帶朋友去飯,仲要唔貴唔食從中賺錢。
以前睇過新聞話有人請D女喺交友APPS 識男仔帶佢哋去間CAFE 到當佢水魚咁劏。

唔明好地地點解要同3個新朋友食飯
帶新朋友出嚟果條友都好可疑
你可以自己同你果3個朋友食飯
下次再約樓主+另一朋友,都已經3個人
點解要3唔識7約埋曬一齊食

該主題在最後一個回覆創建後30天后自動關閉。不再允許新的回覆。